Read Wancho Naga 2 Korin 5 Bible Online

2 Korin 5 - Wancho Naga bible

2 Korin 5

¹Chemthüikoxle, kem ngokya nyihom: chaxwannu angkya kem pum-tsa pünle amakya zuma, chixjaoe zingkya hom, oja oshuk chitüi le ngo angkya hex, zangkangting to Zange ija hom ma kem ngo ang koxüile keme awanle.

²Ija tsangtsa tsün ma ngopongma, kem ang mongmüi chitüi ilaxle zoshunpu, chemthüikoxle keme zangkangting tokhange hüikya mama tsangtsa kem ma nyizün ningle awundaose le texpu.

³Ija nyie awun füima kem a ohua ma chibangüi.

⁴Ija chaxwannu nyihom ma ngotanto, kem mixfang to ngokya tukuxle zoshunpu; keme chaxwannu tsangtsa füi atsaiünse le münchang, ikoxle maxün angkya tsün chimax angkya tuita khüzüne ole thomse le texpu.

⁵Ija lüi angkya hanpakma kem achwonle fakya a Zang changle, ilaxle chixe kem hanpakma athünle thomkya pangnu bama münwan ang chix Chasa kem ang koxle.

⁶Idaile kem a othuithuima mongchongle ngopu. Ija tsangtsa hom ang laxle ngotanto kem, Jowanpa hwom füi atsaile ngokya keme awanpu.

⁷Chemthüikoxle kem tsün a mikngün füi chichangle mongong füi ngopu.

⁸Kwom a mongchyen füi ngopu ilaxle tsangtsa hom ang laxlaxle ngokya dantoxlaxle Jowanpa hom to tomle ngoünse texpu.

⁹Kem hom ikhato wüi changlax chichangba chukha towüi changlax, tüta khato wüi ngokoxlechu, pangnu to nüile keme chix ang mong amüise tsupu.

¹⁰Kem pangnu wüi, kem kaxfünpa Khrista thüntho ma ajong angkya changle. Chixe hingho wüi changlax chichangba sikngün wüi changlax, ija chaxwannu tsün ma ngotanto mae mokdaokya thatha nok ang wüi faüi.

¹¹Zang thua zale le chem ang thüipuix ija kwome awanpu, ikhoma kwome Kaxho Müikya füi anom-anai ang azongpu. Zange kwom bama bakle awan ngole ilaxle hünzomechu mamong mongto ku abakle loplaxle ngopule monghompu.

¹²Chatlechu hünzom hato kwom wüi supu le aho ang azong ngokya mix münchang. Itülüi, kwom azong ngokya a, kwom hanpakma hünzom chem bama bong-chong le tüiüihex, ija otong awan kox angkya hanpakma changwüi. Ikoxletix hünzom mong ma chemchu chitüi homtoxle otok sünngün to bong-chong le tüikya khünakbu kax to lan ang thoüi.

¹³Khünakbue wünkya ningle, kwom ongat jangchang thünchu ija a Zang kuxma; kwom khangka hingle jangtüi, ija hünzom kuxma changle.

¹⁴Kwom a Khrista mongküne apün-awang laxle tüile, chemthüikoxle pangnu hanpak ang khünak tuita zidaoa, ikhoma pangnu wüi ija zik ma womüna le kwome laxle.

¹⁵Chix a noknusa hanpakma zipu, idaile ozün ma tüikyabu ma hanpakmale chingoüi, ikoxle hwom hanpakma zilaxle chatle azangle zokya Khrista hanpakma ngoüi.

¹⁶Idaile athax kwome otuechu khünak chifün to hulaxle owa angchu tsaifün kaxfün münfa. Hanpak tuita ma kwome Khrista bama khünak chifün tokhange tsaifün kaxfün le changdao bachu, kwome athax ile otuechu münmok.

¹⁷Tüta mix wüi changlax, otue Khrista po ma nyemüihex, chix a tuita hozün khüzün changpu; ozang a toxdaoa, hulax, hozün ang achangle hüile.

¹⁸Ibu pangnu a Khrista makhange, zan ang ngokya kem zuikhui ang achangle tamchu mama mixbuchu kem makhange chix füi zuikhui ang zing ang tsankya a Zang mwot changle.

¹⁹Zange Khrista makhange khünaknu füi muamüikya a kwom kaxho changle. Zange khünaknu ochax akiakle chithom ikoxle chemle hwom chix füi zuikhui ang achangpuix, ija kaxho kwome taipu.

²⁰Zang chixjaoe kwom makhange chix zangwün thwonkya tukux, ikhama kwome Khrista bama zangwün ngopu. Zan ang ngokya chix füi zuikhui ang achangle, Zange hünzom mong alüix ang laxkoxle kwome Khrista mün ma Zang to joppu.

²¹Ikoxle chix füi notomkya tokhange, kem, Zang otsao ma wom angkya kuxmale, ochax chitüikya Khrista, Zange ochax ang achang.