Read Wancho Naga 2 Korin 7 Bible Online

2 Korin 7 - Wancho Naga bible

2 Korin 7

¹Ku mongkün zuikhuibu, kaxtsao ibu pangnu kem hanpak ang zingkya changle. Idaile, tsangtsa chichangba chasa ma tsao ang chikoxkya oli pangnu tokhange malualua to atsai le ngolax, ilaxle Zang thuazale ozün ma ngokya tokhange kem komkaile otsao ang achangle ngohax.

²Kwom hanpakma hünzom mong ma nui zinghüi. Owa zongtochu kwome thaikya mamok; kwome owawa ziachu münama, chichangba tütapu ngan-jut le saxlax ang münazong.

³Kue ija hünzom tha ajao ang akaxkya münchang; chem ang, amiba wüi kue akaxdaoa, hünzom to kwome huanuma kak-kün le ikhoma zikoxlax chichangba ozün ma wüi ngokoxlax kem a othuithuima tuita.

⁴Hünzom to ku mong ojao münao; hünzom hanpakma ku mong itukux ngampuix! Kwome apongle hüidao künu sikngüne, otuechu ku ang mong münahik; itülüi, othuithuima ku mongmüie awang laxle ngopu.

⁵Kwome Mesidonia alople ngui füima ngaxchu, kwome nazak ojao chikop. Pangnu khato wüi tuwuk, mixfüi atsi-alakyabu, mong ma chazakya tüihukya.

⁶Ikoxlechu Tita hüikya makhange, künmax mongshanle ngokyabu mong achenle fakya Zange kwom mong machu zong adünle fa.

⁷Kwom ang mong amüikya chix nguikya tatae chichang, ikoxlechu hünzome chix ang zong adünkya bama chix kaxho khomachu changle. Hünzome ku ngünse le thütkya, jangbahex le hünzom mongto texkya, ku khose ang hünzom atha anyem le tüikya, ibu chixe kwom hama wünle; ibu atatlaxle sisile ku ang mongmüipu.

⁸Ku laizae hünzom to tübit le akakdaoa le awanlaxle ku mongto jangba hex le texngole, ikoxlechu janba ma kakwüi le awanlaxle athaxpi kue ile müntex.

⁹Ikoxlechu athax ku mongmüipu; kue hünzom mongma ang koxkya khoma münchang, ikoxle hünzome mongmakya tokhange hünzom zanglom saikha lüikya khoma changle. Ija mongma a Zange twon idaile kwome hünzom to okak münkox,

¹⁰chemthüikoxle oja mongma Zange twonpuix, ijae khosün hato zun angkya monglüi apüile, ikhoma ija ma mongto aduakkya müntüi! Ikoxle khünak zangjang mongma lanlan jangchang thüiningle ija ma zikmüt mangkho tüile.

¹¹Ija hünzom mongma füi Zange chem mokpuix hulax; ijae hünzom ang otukux khünzai ang koxpuix, chitsing chiwan tomta le changpu le aho ang hünzom otukux tsupuix! Iningle mongto kakkya, na nwonkya, mong ma sungkyabu, mongkoxkya, changle mok ang tsukya, ibu mwotlom makhange hünzom thaikya müntüile ahole.

¹²Kue ija lai zadaobachu, owae thaile mokdao laxpuix chichangba owae thai ang tomlax puix, hwom kuxmale zakya münchang. Hünzome kwom hanpakma sukya mokle ahose le thütkya, Zange awanle tüile le hünzom bama tsaotha le angai angkya hanpakmale kue ija zakya changpu.

¹³Ikhoma kwom ang zongdongpu. Kwom ang zong adünkya lan münchang; ikoxle chix mong amüi ang hünzome chix to fongkya olom bama Tita-e wünkya tokhange sisile kwom ang mongmüile.

¹⁴Kue chix hama hünzom achuak achenle wündaopu, ikhoma hünzome ku ang thünzak chiakop. Kwome othuithuima hünzom bama changkyakya wünpu, ilaxle kwome Tita bama achuak achenle wünkya otsing tomtata changpu le ahodaoa.

¹⁵Hünzom pange wüi chix wün müile pongle kopkya hia hünzome chixe adangle fakya hwon-nwot jaono kax ma lax ang achwonle tüikya texle atak laxle Tita mong ma hünzom to mongkünle texkya mong süzu süzule chong.

¹⁶Kue mongao angkya ojao chitüile hünzom ngünlaxle ku ang mong huanuma müipu.