Read Wancho Naga 2 Korin 8 Bible Online

2 Korin 8 - Wancho Naga bible

2 Korin 8

¹Khristan tüinaohom, Mesidonia angkya müimüithombu ma Zang chingchae mwot tsuakle ahodaokya bama kwome awanse tsule.

²Hwome kaile toxdaokya sikngünbu füi hwom ozya ma lüjao wanle ano daokya changle; ikoxlechu ibukuxle hwom chitüi chinang le maxkox ngaxchu hwom ma mongmüi chongle tüikya khoma chakzun ma hwom ozya lyemle mongtsukya tüi.

³Hwome otukux tsuakpuix itukux kox, ilaxle koxtsuakse zia to lyemle hwome koxkya bama kue hünzom hama akax tsuaküi.

⁴Hwom küntsu monglua tokhange Jehudi ma ngokya Zang khünaknu to fong angkya bama hwom süntom tüikoxle müisele kwom ma tsaiju kaxju.

⁵Ija a kwom monghomkya to nüile chang: Pongwang ma hwome ma tsün Zang ang koxle kop; ilaxle Zang mongtex makhange hwome ma alüile kwom chak to dan.

⁶Hünzom khama küntsu monglua to koxkya tö sai angkya mwot Tita-e owang wangkya changle, idaile ija mongkün mwot chak ma laxle mokle ashuk aza angkya bama kwome chix wüi tamtompu.

⁷Khrista tokya mongong, Kaxho Müikya apuk-apuakya, otsingtsing tsingwankya, mwottho tha ang tsukya ilaxle hünzome kwom to mongkünkya, ibu pangnu lom ma wüi hünzom mixtho thoma tüile. Idaile, kue ija khristan mongkün chakzun mwottho machu hünzom wüi mixtho thoma naxsüt le texpu.

⁸Kue ija chimok-mokba le atsangkya kax münchang. Itülüi thüikox, Mesidonia angkya müimüithombue mongtsu laxle kox-zunkya ahokya füi, otsingtsing hünzom mongkün obukux hexle awan ang azongkya changwüi.

⁹Kem to künkya Jowanpa Jisu Khrista mongkün chemtukux chongle tüipuix ija hünzome awanpu. Zang chifün chikao ma chasa ma chix ahak-aluale tüikya, ikoxlechu hünzom khosün angkya kuxma chix chaxwannu to ngui ilaxle chitüi chinangkya mix tuita ang ngo. Hünzom chasa ma ahak-aluale tüi angkya kuxmale chixe ija mok.

¹⁰Hünzome müzang otua laole mokle hüikya mwot otua athax ashuk azale mokle hüikoxle müiüile kue texkya changa. Hünzom a mokle hüikya tata ma owang le chichang ikoxle moksele tsuluakya machu wüi owang changle.

¹¹Otua ma sütle moklaxle ija mwot ashuk azadao! Mwottho azut ajang pongma chatsu mongluakya ningle ashuk aza angchu wüi tsukox, ilaxle hünzom ma tüikya füi mokle alyetkox.

¹²Nange otukux tsuakpuix itukux mongtsu laxle jangmok thüiba, nang hingho füi Zang mongzom müikya tüiüi. Nang ma ngax chitüi khato koxüi changtüi angpu le Zange otuechu münthüt.

¹³Nang hün alixlaxle mix hün acha angle ku münazong;

¹⁴ikoxlechu anyixkha hünzom ma okhonguile tüikya daile, chitüi chinangkyabu to fong angkya hünzom zongto asule tüile. Ilaxle hünzom ma chitüi chinang ikoxle hwom ma a tüile asu, iningle hwome hünzom to fong angkya changle. Ija a tata füi tomwüi azutle tomwüi atom ahanle saxlaxkya müikya olom changle.

¹⁵Otsao Laikaxe akaxle, “Aluile kop-lokya mix ma, aluile tüikya münchang; ojao chikopkya mix ma, hidaole wüi tüile le münchang.”

¹⁶Hünzom to fong ang kwom mongtsukya ningle Tita angchu mongtsu ang koxkya khoma kwome Zang ang münchong fapu.

¹⁷Hünzom hato pao ang tomkya kwom kax ma chixe laxle; otsing tomtata ma, ile mok ang chix mong sisi tsule tüikya khoma chix paoüihex le jao laikya changle.

¹⁸Kaxho Müikya apukle mokkya mwottho ma müimüithom pangkha to wüi achuak achenle tüikya tüinao tuitachu chix füi tomle apaopu.

¹⁹Chix a noke awankya mix tata le chichangle kwom füi tomle aham angkya hanpakma müimüithom chito khange zünle kopkya mix tuita changle. Kwome saile hüikya mongkün ngunsai to chixe humeüi, ilaxle ijaetix Jowanpa Jisu Khrista fuazangkya tüiüi ilaxle chitüi chinangkya khristan üitho to fongsele tsukya kwom mong ahoüi.

²⁰Ma küntsu monglua to koxkya ija hingho chaktwon twonjaokya bama owawae tsaitsat kaxtsa le naktüi le kwome khünzaile mokpu.

²¹Jowanpa miksho tata ma chichangle khünak mikngün machu sule mok angkya a kwom tutex.

²²Ilaxle kwome hwom füi tomle kwom tüinao tomle apaopu; obi thomthom ma hexle kwome chix to wanle anokoxle chix ma fongtsoxse le tsukyakya wüi ngün ang kople. Üntoxle athax chixe hünzom to mong ojao chiao laxle sisile chix mongto fongtsoxse le tsukya tüile.

²³Tita hanpakma, chix ku üitho ilaxle hünzom to fong ang ku füi tomle thothapa tuita changle; chix füi tomle nguingokya tüinao nyi a müimüithom mün ma hüikyabu ilaxle hwom mwot makhange Khrista hato fuazang apüikyabu changle.

²⁴Ibu hato hünzom mongkün aho laxkox. Hwom tsanle apaokya müimüithombue ija zing atatle laxüi, ilaxle ija a kwome hünzom bama achuak achenle lükya kaxkhi ang achangüi.