Read Wancho Naga 2 Korin 9 Bible Online

2 Korin 9 - Wancho Naga bible

2 Korin 9

¹Jehudi angkya Zang khünaknu hato fongkya ahüile ngokya bama kue zale fa angkya ku zongma chem mwot müntüi.

²Fongtsox angkya bama hünzom mongtsukya kue awanle, ilaxle Mesidonia nok hato kue hünzom achuak achenle wündaoa. Kue thüipu: “Akaia angkya tüinao thome müzang tokhange wüi fong ang achwonle tüikya.” Hünzom küntsu mongluae iningle mok ang hwom pangnu mong towüi pole zong adün.

³Ija ngunsai mwot bama kwome hünzom mo achuak achenle wünkya kax otsing tomta changle le tsingle lax angkya kuxmale, kue ibu tüinao hwom azom hünzom hato tsanle akatpu. Mesidonia nok hama kue akaxle ngohomkya ningle hünzom atha anyemle bangüi changtüi angpu.

⁴Chemthüikoxle Mesidonia angkya khristan üitho füi ku ikhato nguikya zuma, hünzome saikya tö dan ang chem ngaxchu münachwon le bang angkya ku mong müntsu. Ile jangchang thüiningle, hünzom to mong ojao chiaokya khoma kue huanuma zak kop angkya changle! Hünzomechu thünzak münkop le münchang.

⁵Ikhoma, hünzome koxsese hingho chaktwon achwonle bang angkya kuxmale ku thoma achale ibu tüinao hwom ang kakox le tsan angkya ku mongto texle laxpu. Ilaxle ku nguikya thoma atha anyemle bangüi, üntoxle ile changkyae, atsangle chichangle hünzome koxsele tsukyae koxpule ahoüi.

⁶Hidaole alikya mixe tsaxziak hidaole wüi kopüi; aluile alikya mixe tsaxziak aluile kopüi, lükya kax texle ataklax.

⁷Mong to kakngale chichangba mok angkya othui tuita ningle chichang homle, pangnusae wüi, mae mongto thütkya ningle kox angkya changle; chemthüikoxle mongmüi to koxkya mix to Zange chingchale.

⁸Nang hanpakma khütle tüikya komle atak apong laxle ngaxchu mwot müikya mok ang ziato lyemle tüi angkya hanpakma, Zange nang ang okhonguikya boma ngaxchu onüi kox ang thoüi.

⁹Otsao Lai kax ma tüikya ningle, “Chixe chitüi chinangkyabu ang, mongtsule kox; chix chingcha othuithuima ngoüi.”

¹⁰Khünak tuita ang ali angkya tsaxli ilaxle sax angkya sütle fakya a Zang changle. Ikhoma Zange nang ang nange küi-thwomkya tsuak tang tsaxli koxüi, ilaxle opün tsong-lo ang koxüi, üntoxle ija ningle chingcha aho ang nang tsuluakya tokhange huanuma puamün ang koxüi.

¹¹Kwom makhange ataile fakya hünzom hinghobu hanpakma khünaknue Zang naxachuak ang, othuithuima chingcha ang tsuluakya tüitsuak tang okhonguile chixe ahak alua ang koxüi.

¹²Hünzome mokkya mwottho Ija makhange khünaknu chitüi chinang pongthapkya tata chichangle khünaknue Zang ang münchong fale zangjop angkya alai hule.

¹³Hünzome mokkya mwottho ijae hünzom ma khristan chingcha mong zaikya ahole, ilaxle hünzome ngaikya hia Khrista Kaxho Müikya kax ma laxkya olom khoma tomwüi khristanbue Zang mün achuaküi. Hwom füi ilaxlechu mama tomwüi mongong mixbu füi hünzome ma ma tüikya mongtsu laxle tom-hanle laxkya chingcha khoma hwome Zang achuaküi.

¹⁴Zange hünzom ang koxkya ataxkya chingchajaja khoma zule künkak mongkünkya füi hwome hünzom hanpakma zangjopüi.

¹⁵Otha chitüikya chix hingho khoma keme Zang ang münchong fahax!