Read Wancho Naga Galatia 2 Bible Online

Galatia 2 - Wancho Naga bible

Galatia 2

¹Zangbün ali füima tix, Tita koplaxle Barnaba kukhi Jerusalem to tamchatle nguipu.

²Zange ku hama pao angkya wüi changle le ahokya khoma ku ikhato paopu. Lompabu füi huxsa tusox ma kue mixnokbu hato Kaxho Müikya apuk-apuakya bama wünle kox. Ledaokya machu ilaxle athaxchu wüi kue thothojole mokse chitsu.

³Ku üitho Tita, chix Grik khünak changkoxlechu, chix ang khwon züt angkya chiatsang; züizüibue mokkox wüi müisele texkya.

⁴Mongong mix-mix wüihexle atsing üntoxle, Khrista füikya notom ma kwome kopkya khangkho zangngai bama opak otua tikle laxsele khwalop mix ibu kwom othom khato zuile ngui.

⁵Hwome kwom da ang achangse tsu, ikoxlechu Kaxho Müikya Otsingtsing hünzom hanpakma sünle thom angkya bama, hwom zangwün to na ojao chitha.

⁶Ikoxle hwom opang lompa ningle tüikya hex, hwom chem changkya hex, ibu bama ku mongto chemlechu e-sele chitexkya khoma kue ija akaxpu; Zange otok osün to hulaxle kaxfün münfa: ibu lompabu, kue thüipu, hwome apuakya ku zongto chemnu otax: onüi le münchang.

⁷Itülüi thüikox, Pitar ang Jehudi nok hato Kaxho Müikya apuk angkya mwot koxkya ningle, kue mixnokbu hato Kaxho Müikya apuk-apua angkya Zange ku ang koxle thomkya mwot mix hwome ngünle lax.

⁸Chemthüikoxle chemle Zang tsakzong makhange Pitar Jehudi nok hato wangshem ang zingpuix, ilailaile ku a mixnokbu hato wangshem tuita ang zingkya changle.

⁹Jakop, Pitar üntoxle Juhan, hwom opang lompabu ningle ngopuix, hwome, Zang tokhange ku ang ija mwot koxle thomkya tsingle lax; ikhoma, kwom pangnu wüi üitho tuita ang achangle aho ang hwome Barnaba kukhi füi chak apong. Barnaba kukhie mixnokbu khato ilaxle hwome a Jehudi nokbu khato le Jowanpa mwottho ma süt angkya kwom mong notom.

¹⁰Hwomechu ku mongto texle ngokya lailaile, hwomkha tokya tuimix nuakmixbu taxalak le akax.

¹¹Ikoxle Pitar Antiok to nguikya zuma, thaikya mokkya khoma, kue chix to tangthole noknu thüntho ma sa.

¹²Jakop-e tsanle apaokya khünakbu ikhato mahüi tanto, Pitar-e mixnok tüinao hwom füi tomle saxling le ngokya. Ikoxle hwom nguikya füima, chix hwom füi siatsai-siatsaile chang ilaxle mixnokbu füi tomle saxling le chichang, chemthüikoxle chixe ibue khwon züt zom zingkox wüi müi angkya le akaxkya thua za.

¹³Mama Jehudi nok tüinaobuechu Pitar füi tomlaxle koshwot mwot mok ang süt; ilaxle Barnaba-e to apüile hwom koshwot mwot khato mole le.

¹⁴Otue kue hwom Kaxho Müikya otsingtsing lom ma tangthole chilekya ngün ang koppuix, hwom thüntho ma kue Pitar ang thüi: “Nang a Jehudi khünak changkya ikoxlechu nang Jehudi nok tuita ningle chichang homtoxle mixnok ningle ngole hüikya changle. Inga-ingale mixnokbu ang Jehudi nokbu ningle ngo angkya nange atsang angkya chemtüi?”

¹⁵Changle, kem nuput ma wüi Jehudi khünakbu changle. “Mixnok ochax khünakbu”, le nyakkya ningkyabu münchang.

¹⁶Ikoxlechu khünak tuita Zang zongto sukya ang achang angkya a Jisu Khrista tokya mongong makhange tix changle. Wanlome alomlom mokkya tokhange tix le otuechu münchang, ija keme awan ngopu. Wanlom ma tüikya lwot tokya makhange le chichang homtoxle kem mongong makhange Zang zongto sukya ang achang angkya kuxma kemechu wüi Jisu Khrista to ongpu. Chemthüikoxle wanlome alomlom pangwüi lwot tokya makhange ochaxbu Zang zongto sukya ang münachang tox.

¹⁷Ile jangchang thüiningle, keme chemle Khrista ma notom tokhange Zang zongto su ang azongpuix, izuma keme wüi mixnokbu füi tomwüi ochaxbu changpu le atakle…jangchangba Khrista a ochax mün ma nguikya mix changtüi ngün? Ile otuechu münchang!

¹⁸Kue ama daokya wanlom chatle zing ang jangsüt thüiningle, ku tuita wanlom amakya mix changpu le ahole.

¹⁹Wanlom to hule ano koxle lom tuita ma Zang kuxma ku ozün ma ngo angkya bama, ku a wanlome alüile lang daokya tuita omang changle. Ku a Khrista füi tomle pünsak ma takle lang daokya changle.

²⁰Ikhoma athax ku ozün ma ngokya a ku münchang, ikoxle kuma khüzün tüikya a Khrista changle. Ija tsün ku ozün ma ngokya a, owae ku to mongkün ilaxle ku bama chix tsün koxlaxpuix, ija Zang Hosa tokya mongonge ku ozün ma ngopu.

²¹Kue Zang chingcha chilax homtoxle münawütüi. Ikoxle khünak tuita wanlom lwot tokya makhange Zang füi muamüi angkya jangchang thüiningle, Khrista zikya a obato zingün?