Read Wancho Naga Galatia 3 Bible Online

Galatia 3 - Wancho Naga bible

Galatia 3

¹Hünzom Galatia nok ongatbu; hünzom to owae khunpu? Jisu Khrista pünsak ma takle langkya bama kue hünzom hama komkaile wüi wündaopu.

²Ku hama ija apuahu: Hünzome Zang Chasa, wanlom lwot tokya makhange koppia hia Kaxho Müikya atatlaxle ija to ongkya makhange koppuix?

³Hünzom itukux anga ang büthüikoxle achangpu; hünzome Zang Chasa ma owang wanglaxle athax hünzome ma tsakzong ma ashukse texpia?

⁴Hünzome apongle hüikya sikngün ibu chemchu münchang texpia? Tütakoxlechu ija a lilita changjao changle!

⁵Zange hünzom ang Chasa kox ilaxle hünzom khama ohünotün mwot mokkya a hünzome wanlom lwot tokya khoma hia hünzome Kaxho Müikya atatlaxle ija to ongkya khoma changpuix?

⁶Abrahame apongle hüikya texle anohu; Otsao Lai-e thüile: “Chixe Zang to mongong, ilaxle chix mongong khoma Zange chix otsao khünak le lax.”

⁷Idaile Abraham sixli tsingtsing a mongong füikyabu changle le hünzome awanle lax angkya oli changpu.

⁸Mongong makhange Zange mixnokbu sukya ang lax angkya bama Otsao Lai-e achale wüi akaxle thomkya changle. Ilaxle Otsao Lai-e ikhoma Abraham hato Kaxho Müikya tsingang kox: “Nang makhange Zange khünaknüsa to mohimanüi.”

⁹Abrahame mongong ilaxle mohiman atak; idaile ongkyabu pangnu towüi chix lailaile mohiman.

¹⁰Wanlom lwot tokya to onglaxle ngokyabu a othuak-ozome awang laxle tüile. Chemthüikoxle Otsao Lai-e akax: “Owae Wanlom Laipex ma zale tüikya pangnuli to othuithuima kax ma laxle chitüi üihex chix a Zang othuak ozom fangma tüile!”

¹¹Athax a, Wanlom makhange owachu Zang zongto sukya ang achang ang müntom le tsingle laxdaoa, chemthüikoxle Otsao Lai-e thüile: “Mongong makhange Zang zongto sule tüikya mix tix khosünle ozün ma ngoüi.”

¹²Ikoxle wanlome mongong füi mok angkya chemchu müntüi. Otsing tomtata ma Otsao Lai-e akaxkya ningle: “Wanlom ma alomlom lwot owae tole tsuaklaxpuix chixchu wüi imakhange ozün ma ngoüi.”

¹³Ikoxle kem khoma othuak ozom ang achang laxle wanlom tokhange apüikya thuakzom chak tokya Khrista-e kem azündaoa; chemthüikoxle Otsao Lai-e thüile: “Owa pün ma ashaüihex chix a Zang thuakzom fangma tüile.”

¹⁴Chasa mongong makhange keme Zang kaxtsao pongle kop angkya hanpakma, Zange Abraham ang tsaodaokya mohiman chix makhangetix mixnokbu ang kox angkya bama Khrista Jisu-e Wanlom thuakzom chak tokya kem khosün.

¹⁵Kutüi kunaohom, kue nyixfokya to apongle hüikyabu apyen le twonüi: Otue mixhuak anyi mwotli tuita bama motom üntoxle notom laiza le sohi shingüihex, owaechu ija ama ang chichangba ito tütalichu bo ang müntsuaküi.

¹⁶Athax, Zange Abraham hia chix sixli füi tsaosax daokya tüihu daoa. Otsao Lai-e “sixlibu”, le khünak huak huanuma womle münwün, ikoxle mixhuak tuita Khrista mo wünle.

¹⁷Ku kax a ija changle: Zange Abraham füi Tsaotsüt ilaxle ija otya ma thom angkya tsao. Wanlom oja zangpua ho-ali tsübün füima tix koxkya hex, ijae Tsaotsüt tamchu Zang kaxtsao ama ang müntho.

¹⁸Chemthüikoxle Zang hingho wanlom ma athong laxle jangtüi thüiba, ija a chix kaxtsao ma onglaxle müntüi. Tamchu, Zange Abraham ang ija hingho a chix kaxtsao khoma koxkya changle.

¹⁹Jangchangba, wanlom thomkya chem hanpak? Ija a thaikya chemhex ija aho angkya obo, üntoxle ija a Zang kaxtsao owa ang koxle thomlaxpuix, ija Abraham sixli mahüikya bama ngo angkya hanpak changle. Wanlom a pongtai mix chak tokhange kaxtaimixbue apongle fakya.

²⁰Ikoxle mixhuak tuita mwot ma sütle nguikya zuma ija pongtai mix laxngo angkya oli münchang; ilaxle Zange tsaotsik le chixjaoe moküi.

²¹Ile thüikoxle wanlom a Zang kaxtsao füikya opüi le hia? Ile otuechu münchang! Chemthüikoxle khünaknüsae khüzün koxtsuak angkya wanlom pongle kopkya jangchang thüikoxle, ija kax ma laxkya tokhange pangnusa wüi Zang zongto sukya ang achangse.

²²Ikoxle Otsao Lai-e thüile: “Zangfang abakle ochax zonge womlaxle tüile; ikhoma Jisu Khrista tokya mongong ma tix koxüi hexo le tsaole thomkya hingho a opange onglaxpuix hwom angtix koxle.”

²³Ikoxle mongong hüiüi thoto wüi ija wanlome kem pangnu wüi koplaxle kun ma thomkya ningle ija nguiüi tüikya mongong ngaile aho angkya kople khakle thom.

²⁴Ikhoma, ifüima tix mongong makhange Zang zongma sukya ang achang lax ang, Khrista mahüi tanto ija wanlom a kem nyet mix ang achang.

²⁵Athax a mongong angkya hanpak ikhama tüile, Wanlom a kem nyetmix tammünchang.

²⁶Khrista füikya notom ma hünzom Zang susabu ang achangkya a mongong makhange changle.

²⁷Khrista füikya notom ma hünzom bapti daoa, ilaxle athax hünzom a nyie, thüikoxle Khrista chix khüzüne awunlaxle tüile.

²⁸Idaile Jehudi hia mixnokbu bama da hia panle thomkyabu bama, lüka hia sheko bama le süichapkya chemchu müntüi, Khrista füikya notom ma hünzom pangnu tuita.

²⁹Nang Khrista kux jangchang thüiningle, nang Abraham sixli changle ilaxle Zange kaxtsao daokyabu nange ataküi.