Read Wancho Naga Galatia 4 Bible Online

Galatia 4 - Wancho Naga bible

Galatia 4

¹Ikoxle pangnuli chix kux changkoxlechu, chix ziato madong dongba naosa owae hopa mantswon angkya hex, chix da tuita thatha changle,

²Chix naosa ang ngopongma, hopae athaxpi naxchangkox le mathüi tanto chix to hume angkya hia chix sütmwot akox akom angkya khünakbu tüile.

³Ilailaile chasa ma matsong tanto kemchu wüi zangfang apünle ngokya chasabu da ang achangle ngokya changle.

⁴Ikoxlechu tu-hi-wan thütkhak le nguile hüikya zuma mixcha tuita makhange Jehudi wanlom fangma puxle Zange Hosa ajo.

⁵Ija chix nguikya a: Wanlom fangma ngokyabu sünle kop angkya ilaxle kem Zangsu Zangsabu ang achang angkya hanpakmale changle.

⁶Nang a sasün changle le aho ang, Chasa owae “Apa, Ku Apa”, le akhongpuix, ija chix Hosa chasa Zange kem mongto ngui ang kox.

⁷Ija makhange, athaxpi nang a da tuita münchang ikoxle sasün tuita ang achangüna; ilaxle nang chix sasün daile, Zang ma chixsu chixsabu hanpak ang chempang tüilaxpuix ibu pangnu nang ang koxüi.

⁸Ledaokya wan ma hünzome Zang chitsing homtoxle ngole hüi, ikhoma hünzom Zang chichangkyabu chak to da ang ngole hüi.

⁹Kue thüipu, athax a hünzome Zang tsingle hüi tamchu Zange hünzom tsingle lax, jangchangba ibu zong chitüikya hia chilaxli chasabu hato chatse le chemle tsu? Chatlechu wüi hünzome büthüikya to hwom da ang achangle ngose tsupu?

¹⁰Hünzome züizüi hanpak, lyetkua, tu-wan ilaxle zangpua, ibu to onüi ang mongkoxle.

¹¹Hünzom hanpakma mokkya ku mwot chem angchu chichangle tüiüi hia le hünzom khoma ku abüt-aban maxle.

¹²Kue mong bakle akaxpu, kutüi-kunaohom, ku ningle changhüi. Ku hünzom füi tuita ang ngopu. Hünzom ku zongto thaikya kha müntüi.

¹³Pongwang ma wai pongma kue Kaxho Müikya hünzom hato büthüikoxle apuk-apua puix ija hünzome texle atak-hu; ija a ku kakkya khoma changle.

¹⁴Ku tsangtsa müimüi chitüikya hünzom fan chimüikya tamchu hünzom zongto thwontsing chongkya changdao koxlechu, hünzome ku wün chiahai tamchu pongle chikople chichang. Itülüi, Zangkangting kaxtaimix tuita tukuxle hünzome ku pongle kop; hünzome Jisu Khrista bütukuxle ku pongle kop.

¹⁵Hünzom ang mong huanuma müikya! Tsuak angkya oli hex thüikoxba, hünzome ma mik ngaxchu loklaxle ku ang koxtsuaküi le kue akax ang those, ikoxle owang pongkya hünzom mongmüi ojong?

¹⁶Changkya kax akaxkya tokhange ku hünzom zongto zan ang achangünpia?

¹⁷Ibu mama khünakbue hünzom to zule mong koxkya ahole, ikoxlechu hwom tutexbu a omüi münchang. Hwome hünzom to zule mong koxkya ningle hünzomechu hwom to mong naxkox le, hünzom ku füi afan ajan ang kox angkya, ibibi a hwom tutex changle.

¹⁸Athax, tutex omüi changkoxlea, itukux zule mongkoxkya tüikya a müihupu ilaxle ku hünzom füi ngokya tuk lanlan ma chichangle Ija a othuithuima changkoxle müihuse.

¹⁹Mongkün kusahom, Khrista zanglom hünzom ma zingle machang tanto, honu tuita ang nao ngünpongma kakpupu le ku mongto hünzom khoma kakle maxle.

²⁰Hünzom füi zingmüi ma wün-zexkya kuxma, athax ku hünzom füi tüikoxle müihuse dai le texmax üntong. Hünzom bama ku tüle-tüle abüt aban maxle!

²¹Hünzom Wanlom fangma ngose texkyabu füi kue kax tuita atwon fang: Hünzome wanlom ma akaxkya kax münlax lea?

²²Chemthüikoxle Abraham ang sasün anyi tüikya, tuita a hokakonu da ang ngokya mixcha makhange, ata mix a hokakonu makhange pux, le zale thomkya tüile.

²³Abraham ang dacha makhange puxkya nao a zangjang naoput ma pux, ikoxlechu hokakonu makhange ngünkya nao a Zang kaxtsao makhange pux.

²⁴Ibu a kaxpyen tuita ang tsingle laxtsuaküi: Mixcha anyi a Tsaotsüt anyi hanpak ang changle. Hagar a da ang ngolaxle dasu-dasabu puxkya mixcha changle, ilaxle she a Sinai haxnukho to zingkya Tsaotsüt hanpak changle.

²⁵Arabia angkya Sinai haxnu tsyen to ajongle tüikya Hagar a Jerusalem hanpakchu changle; chemthüikoxle ija a masu masabu füi da ang ngokya tingsho tuita changle.

²⁶Ikoxlechu Zangkangting füikya Jerusalem a pankya changpu, ilaxle ija a kem honu changle.

²⁷Chemthüikoxle Otsao Lai-e thüile, “Mongmüilax, nang nao chitüikya mixcha! Mongmüi füi ozing alaile akhongkox, hünzom naongün wokkak matsingkyabu! hokakopa-e danle chitoxkya mixcha füi, chilaxle thomdaokya mixcha angwüi, sixli onüi tüiüi!.”

²⁸Kutüi kunaohom, athaxpi hünzomchu Isak lailaile, chix kaxtsao makhange Zangsu Zangsabu changle.

²⁹Ija pongma zangjang nao ngün olom ma ngünkya naoe Zang kaxtsao makhange ngünkya nao to zothup; ilailaile athaxchu changle.

³⁰Ikoxlechu Otsao Lai-e chemle thüi? ijae akaxle: “Danucha sasün nyi apaodao; chemthüikoxle da chichangkya mixcha sasün füi tomle danucha sasün ang hopa mantswon angkya olom chemchu müntüi.”

³¹Ikhoma, kutüi-kunaohom, kem a dacha susabu münchang ikoxle pankya mixcha susabu changle. Mixcha susabu changle.