Read Wancho Naga Galatia 6 Bible Online

Galatia 6 - Wancho Naga bible

Galatia 6

¹Tüi-hi-naohom, owawae thaile mokmo ngokya janglop thüiba, hünzom chasa otsao ma ngokyabue chix achangle kox angkya oli changle; ikoxlechu hünzome ija jonai ma mok angkya changle. Ilaxle hünzom tochu wüi thwontsingkya naktüio le khünkhi lax.

²Tata jua fongle tüikox, iletix hünzome Khrista wanlom kax ma laxle tüiüi.

³Chix a chem ngaxchu chichang khato owawae ma lita changpu le ngamle jangtex, chixe ma alüile dyen ngopu.

⁴Pangnusasae wüi mae mokkya mwot chimüi hia müipuix ajangle huno angkya changle. Chixe müikya mwot mokdaokya jangchang thüiba, owawae mokdaokya füi tamchiapyen ngo homle, mae mokdaokya bama chix zongdong ang tsuak.

⁵Chemthüikoxle noke wüi ma hün-hün hün angkya changle.

⁶Khristan Kaxho anwot-anole fadaokya mixe chix ma tüikya jali bakle hwon-nwot mix füi ahanle lax angkya oli changle.

⁷Alüile ma kho taxhang; Zang a owaechu dyen ang müntho. Khünak tuitae chixe chem küile thomlax puix ija oziak tix khaiüi.

⁸Chixe müi-hi-aji tsuluakya haxtok ma ali akanle jangchangba, ikha angkya chixe mikmüt puamün afoxüi; ikoxle chixe chasa haxtok ma ali akanle jangchang thüiba, chasa angkya chixe oshuk chitüikya tsün khüzün zütle afox ang ataküi.

⁹Idaile müikya mwot mok ang kem taxna-taxjua hax; chemthüikoxle keme danle chitoxle jangmok thüiningle, züt ang hanpak tuita kem hato hüiüi.

¹⁰Idaile kem ang otukux oshua tüipuix itukux keme noknusa towüi müikya mwot mok angkya oli changle, tamnüilechu mongong ma kem füi homkha tuita ang ngokyabu ang mok kox angkya oli changle.

¹¹Kue ku chak jaofüi hünzom hato lai zakya zuma chakza chongle zakya to hulax.

¹²Khwonzüt-Zom kai angkya bama hünzom to atsangle ngokyabu a mike ngünkya otok mwot bama tsaichong-kaxbong ilaxle zaxzangle ahose tsukyabu changpu. Hwome ija a, Khrista pünsak khoma hexle hwom zothup angkya chitüi angkya kuxmale mok wüi.

¹³Khwonzüt-Zom twonle hüikyabue ngaxchu Wanlom kax ma münlax; mike ngünkya zom fangto ahüi tsuaklaxpu le hünzom tsangtsa khoma hwom tsaichong-kaxbong kuxmale hwome hünzom ang Khwonzüt Zom koxsele tsukya changle.

¹⁴Ikoxlechu ku hanpakma pi Khrista pünsak bama tix tsaichong-kaxbongüi; chemthüikoxle chix pünsak makhange chaxwannu ku zongto omang, ilaxle chaxwannu zongto ku omang.

¹⁵Khünak tuita khwonzüt zom ma chiwompuix wompuix, ija tüichongpa münchang, ikoxle tüichongpa a hozün zingkya ang achangkya ma tüile.

¹⁶Tsün ma ija wanlom tole hüikyabu hanpakma, mongsom ilaxle chingcha hwom füi naxtüi; hwom füi tomle tamchu Zang khünaknu pang füi wüi naxtüi!

¹⁷Kaxshuk ang: Owaechu tamchatle kusik taxangün, chemthüikoxle ku tsangtsa angkya janmane wüi Jisu da tuita changle le ahole.

¹⁸Kutüi kunaohom, hünzom pangnu füi wüi kem Jowanpa Jisu Khrista chingchajaja womle ngohüi. Amen.