Read Wancho Naga Efisia 2 Bible Online

Efisia 2 - Wancho Naga bible

Efisia 2

¹Hünzom kax ma chilaxle hüikya ochax khoma amiba hünzom a chasa lom ma omang changkya.

²Ija pongma hünzome chaxwannu ochax manto; ding hia hax angkya chasa zongma apün-awangkyabu chasa owae athax Zang kax ma chilaxkya khünakbu akumathum le ngopuix, hünzome ija chasa kax ma lax.

³Wünhax thüikoxle kem pangwüi hwom lailaile changle ilaxle kem tsangtsa hia tutex ma asukyakya saxmok le jaopo küntsu monglua ma ngole hüi; kem jaopo chifün ma kemchu, mix lailaile, kemchu wüi Zang mongtsik zothup ma wom angkya hexo le bangpu.

⁴Ikoxlechu Zang chingcha okhonguikya, üntoxle kem tokya chix mongkün namchongkya changkoxle,

⁵kem kax ma chilaxle ochax ma ngotanto wüi Khrista füi tomle ozün ma ngo ang chixe kem shak. Idaile hünzom khosünle kopkya a Zang chingchae tix changle.

⁶Khrista füikya kem notom ma kem chix füi tomle zangkangting to apün-awang le ngo angkya hanpakma chixe kem chix füi tomle azwot.

⁷Khrista ma kem hato ahokya chix mongkün ma atakkya chix chingcha othuithui hanpakma aho angle chixe ija mok.

⁸Chemthüikoxle mongonge nang khosünkya a Zang chingcha makhange changle. Ija a nang azongkya tokhange le münchang, ikoxle Zang hingho changle.

⁹Ija a mokkya mwot khoma kopkya chichangkya daile, owawachu ija bama tsaichong-kaxbong angkya müntüi.

¹⁰Kem chemle tüipuix ija a Zang chakzing changle, ilaxle Khrista ma kem notom makhange chixe kem müikya mwot mokle ozün ma ngo ang zingpu. Ija a, kem Ija ma aham angkya hexo le Zange acha achwonle thomdaokya changle.

¹¹Hünzom nuput tokhange wüi mixnokbu changpu, ilaxle Jehudi khünakbu opange hwom alüile khwonzüt zom kaidaokyabu le epuix (Chak füi hwom tsangtsa to mokle hwonkya) hwome hünzom ang khwonzüt zom ma chiwomkyabu le nyakle. Hünzome ami hünzom chem changkya dai Ija otuechu taxalak.

¹²Ija pongma hünzom Khrista füi janle tüikya. Hünzom a mixnok ilaxle zünle kopkyabu khama chiwom. Zange chix khünaknu ang fakya kaxtsao Tsaotsüt hünzom zongto chem mwot ang chichang, üntoxle hünzom ija chaxwannu ma monghomkya chemchu chitüi tamchu Zang chilax homtoxle ngokya.

¹³Ikoxle athax a, Khrista Jisu füikya notom makhange, hünzom opang ochu to ngohomkya hex, hünzom a Khrista zikya makhange Zang hato soxle apüidaoa.

¹⁴Chemthüikoxle Khrista chix jaoe Jehudi nok hia mixnokbu lita kanta ang achangkya tokhange kem hato tumüikya apüidaoa. Hwom afan ajanle hia zan ang achangle atsyenle tüikya katuk chix tsangtsa füi jao thuple amadaoa.

¹⁵Ile chix ma notomkya füi majat malili angkya lita kanta jat hozün alai ang chixe ija ma tüikya kaxtombu füi Jehudi wanlom amüt le tu amüi.

¹⁶Khrista-e chix pünsak ma zikya tokhange tata füikya hwom mongtsik amüt; pünsak makhange chixe pangnyi jat-li tompo tuita ang achangle Zang hato hwom chatle apüi.

¹⁷Ikhoma le Khrista nguilaxle mixnokbu, owa Zang füi atsaile ochu to ngokya hex, ilaxle Jehudi nok, owa chix hato soxle tüikya hex, hwom pangnusa hato tumüi angkya Kaxho Müikya apuk.

¹⁸Jehudi nok hia mixnokbu kem pangwüi Chasa tuita ma Hopa Zang ngwotnui to ngui ang thokya a Khrista makhange tix changpu.

¹⁹Athax a, hünzom mixnokbu a püntüi le münchang; athax hünzom a Zang khünaknu füi nokpu tuita ilaxle Zang homkha ma kako tuita changle.

²⁰Hünzom chuwüi, homkom-longnu ang Khrista lax üntoxle wangshembu hia ajebue tanle toxkya homting ma athong laxle zingkya changle.

²¹Jowanpa ang atsaole koxkya zangshwom-hom ang achangle atsün ilaxle hompopo jao kople among thomkya a chix changle.

²²Chix Chasa ma Zang ngokya khato mamabu pangnu füi tomwüi hünzomchu ngo ang Khrista füikya notom ma zingle alaikya changle.