Read Wancho Naga Efisia 6 Bible Online

Efisia 6 - Wancho Naga bible

Efisia 6

¹Naosombu, hünzome manu mapa kax ma lax angkya a hünzom khristan mwot, chemthüikoxle mok angkya sukya olom a ija changpu.

²“Hünzome manu mapa chathua zale tüikox”, le thüikya a pongwang lükya kaxtom oja füima:

³“Nang shomüi wanmüi le tamchu tsünlo khothole chang angkya hanpakma” lükya kaxtom azuile hüipuix.

⁴Honu hopa hom, hünzome ma naosom to hwom mongma adün angkya olom taxmok. Itülüi, Jowanpa zongma müikya olom ma hwom ajung atangle zünsaikox.

⁵Dahaibu, hünzome zakya hia abünkya füi ma tsangtsa hopunu hwom kax ma laxle hwom chak to dankox; ilaxle Khrista thothakya ang laxle, nange ija mongkoxle mokkox.

⁶Hwome nang ang sule naxthüi le, hwome hünzom to hule ngopongma tata ile taxmok; ikoxle Khrista ma dahaibu ningle, Zang mongtsukya chemhex ija to mongkoxle mokkox.

⁷Hünzome khünak tata chichangle Zang thothakya changpu le, dahaibu ningle da mwot mongmüi füi mokkox.

⁸Dahaibu wüi changlax, dan-pan thomkyabu wüi changlax, müile mokkya chix mwot khoma, Jowanpa-e pang ang wüi hingho fa angkya mong ma koplax.

⁹Opupa hwomechu ilailaile ma dahaibu füi ile saxmok kox ilaxle aza-anakya olom twonkya zakün. Nok to chifün tuita makhange kaxfün fa angkya tuita hopupa kux changle le hünzom pangwüi hopupabue hex ilaxle dahaibue hex mong ma koplax.

¹⁰Oshukma, chix tsakzong chongkya makhange, Jowanpa füikya notom ma hünzom tsakzong alailax.

¹¹Haxshix ochax tsingtsang füi alünle ajong tsuak angkya hanpakma hünzome, Zange hünzom ang fakya khyepdi komle laxkoplax.

¹²Chemthüikoxle kem a khünak füi chichangle ding hia hax nyi ba angkya chasa zong, apün-awangkyabu, chapu-lwompabu, ilaxle chaxwan angkya zangnak zong füi azan ngopu.

¹³Idaile athax wüi Jowanpa khyepdi laxlax! Ile changkox tix ochax din-pan hüikya zuma, zane singkyabu hünzome abax ang thoüi; ilaxle oshuk kople azanle hüikya füimachu wüi, hünzome ziakople thom ang thoüi.

¹⁴Idaile, otsingtsing a züpak ang laxlaxle, chasa ma tsaokya khaxtok khwop ang laxlaxle,

¹⁵üntoxle mongsom Kaxho Müikya apuk ang achwonkya a chisox ningle laxlaxle;

¹⁶othuithuima mongong a di ang twonlaxle; chemthüikoxle ija füi nange ochax wün sanhapbu komle abax ang thoüi.

¹⁷Khosün a khohom ang pongle kop; ilaxle Zang kax a chasae nang ang fakya changlo tuita ang pongle koplax.

¹⁸Ibu pangnu wüi, Zange asun azu angkya jule zangjopkya füi moklax. Chasae zunkya ningle, othuithuima zangjoplax. Ija bama mik-hing le ngolax ilaxle otuechu danle taxtox; Zang khünakbu hanpakma othuithuima zangjop lax.

¹⁹Ku akax ang achwonle ngoponge Zange ku ang kaxho fale; Kaxho Müikya huxsa zangwün tsing ang koxle, ku mongchongle akax tsuak angkya kuxma ku hanpakmachu wüi jop-hüi.

²⁰Ipongkhae ku kun to tüikoxlechu ija Kaxho Müikya hanpakma ku Zang khünak tuita changpu. Akax angkya olom ma Kaxho Müikya bama mongchongle naxakax tsuak ang ku bama zangjop-hüi.

²¹Ku chemle ngotüilaxpuix ija opaktikle hünzom hama, ku bama, kem tüinao ibomachu Jowanpa mwottho ma mongao chitüikya da tuita, Taikhika e hünzom hama naxwün fa.

²²Kwom chemle ngopuix ija kaxho fa ang tamchu hünzom ang zong adün angkya le, ipue kue chix hünzom hato tsanle akatpu.

²³Hopa Zang hia Jowanpa Jisu Khrista-e khristan tüinao hwom ang mongong makhange mongsom hia chingcha mongkün naxfa.

²⁴Chizi angkya mongkün makhange kem Jowanpa Jisu Khrista to mongkünkyabu to Zange chingchakya naxtüi.