Read Wancho Naga Filipi 1 Bible Online

Filipi 1 - Wancho Naga bible

Filipi 1

¹Khrista dabu, Pol hia Timothi nyi tokhange: Khrista Jisu füikya notom ma Filipi angkya Zang khünaknu, tamchu müimüithom lomzun mixbu hia fongmixbuchu womle; hwom hato:

²Zang kem Hopa ilaxle Jowanpa Jisu Khrista-e hünzom ang chingchajaja hia mongsom naxfa.

³Kue hünzom texle atak pongma, hünzom hanpakma kue ku Zang ang münchong fapu;

⁴üntoxle kue hünzom pangnu hanpakma zangjop pongma,

⁵pongwang tokhange athax kople Kaxho Müikya mwottho ma hünzome ku to chemle fongle hüidao laxpuix, ibu texlaxle kue zangjop pongma mongmüi atungle joppu.

⁶Idaile Khrista Jisu Hanpak ashukle mahüi tanto, hünzom ma ija mwot müikya owang wangkya Zange ija zunle alyet angkya changpu le kue hünzom ang thüipu.

⁷Hünzom a othuithuima ku mongtsang ma tüile! Idaile kue hünzom hanpakma mok pongma, hünzom bama ku mongto ile ajang angkya a olom jao changle; chemthüikoxle, athax ku ile kun ma ngopong machu. Üntoxle Kaxho Müikya khose ang danle tüipongmachu, ilaxle ija oshing mongle zingpong machu wüi hünzom pangnu Zange ku ang fale thomkya ija shomüi atom-ahanle lax.

⁸Ku mongkha to zule hünzom hanpakma sungle tüikya oja Jisu Khrista mongthong tokya hex, ija bama zangwün pongma, ija a otsing tomta changkox a le ku kaxkhi ang Zang changle.

⁹Tsingwankya hia asukhakkya kaxfün füi tomle hünzom mongkün ma otsün-otsünle tsonghüio le kue joppu;

¹⁰Ija a hünzome amüikya zün ang tsuak angkya kuxma changpu. Ifüima tix Khrista zangngai ngünkya nyix hünzom chitsaokyabu pangnu tamchu oma laikho khakyabu pangnu füi atsaile ngo ang thoüi.

¹¹Zang fuazang hia achuak achenkya tüi angkya hanpakma, Khrista-e tix alai tho angkya otsingtsing müikya olie hünzom tsün awangle ngohüi.

¹²Kutüi kunaohom, hünzome naxtsing laxsele kue thütkya a ija changle: Ikhato ku füi chempang apongle hüidao laxpuix ibue Kaxho Müikya mwottho thoto alyet ang huanuma fongle hüidaopu.

¹³Ija khoma, ikhama chongwang hom nye ang ngokya süpahibu hia mamabu noke wüi ku kun to ngokya a tuita Khrista da ang achangkya khoma changpu le awanle.

¹⁴Üntoxle ku kun to ngokya makhange Khrista ma tüi-hi-naohom süchong tukux ang Jowanpa hanpakma mongao ojao chitüikya mongong fale, ikhoma kaxho apukkya zuma hwom ang mong süchong süchongle chongle.

¹⁵Changle züizüie Khrista-e apuk apuakya a nüfux hia hyet lomle mokkya changle, ikoxlechu mamabue a otsingtsing mong füi mokkya changle.

¹⁶Ibu ile mongkün makhange mok, chemthüikoxle Kaxho Müikya khose angkya mwot ku ang koxle thomle le hwome awan.

¹⁷Mamabue Khrista mongkoxle apukkya chichang, ikoxle ma fünmüi tata thütlaxle mok; ku kun ma tüipongma hwome ku to tingtui onüi adünüi le ajang.

¹⁸Hwome tütale wüi thütngo koxlax, chem münchang! Mongtex sukya lom makhange wüi changlax, chisukya lom makhange wüi changlax, tsuakkya olom ma Khrista apuk-apuale jangchangba müipu, ija khoma ku mongmüipu. Üntoxle ku mongmüi le wüi ngoüi,

¹⁹chemthüikoxle hünzome zangjopkya makhange ilaxle Jisu Khrista Chasa tokhange hüikyae ku danüi le kue awanpu.

²⁰Zudaole ku mongtsukya hia monghomkya a kue ma mwottho ma otuechu thaile chichang angkya, itülüi thüikox, othuithuima, tamnüilechu ipongkhae, ku ozün ma wüi ngolax chichangba ziwüi-zilax, ku khüzün tsüne komle Khrista hato münchong achuakkya apüi angkya hanpakma ku a mongchyene awangle ngo angkya changle.

²¹Ozün ma ngokya le thüikoxle chem? Ku zongma ija a Khrista changle. Zikya le thüikoxle isisi sümüi.

²²Ikoxle ku ozün ma jangngo thüiningle, khünaknu Khrista hato apüi angkya mwot kue süchongle mok ang thoüi, jangchang thüikoxle ozün ma ngo angkya hia zi angkya nyi opupu shongzünüihex, kue müntsing tsuak.

²³Pangnyichi tokhange wüi ku to bele. Ataitox le müikya tsün ma ngo ang, ija tsün dantoxlaxle Khrista füi tomle ngoünse le wüi süchongle thütle;

²⁴ikoxlechu hünzom kuxmale ku ozün ma ngo angkyachu akhokya wüi changle.

²⁵Ibama chemkho münsam, idaile ku ozün ma wüi ngo angkya changle le kue awanpu. Hünzom thochi to lekya hia mongong ma mongmüikya to fong ang, ku hünzom pangnu füi tomtomle ngo angkya changle;

²⁶ikoxle tix otue ku tamchatle hünzom füi ngo ang ataküi hex, izuma Khrista füikya notom ma hünzom tsün ma ku bama mongngam angkya hünzom ang olom sülui le bangüi.

²⁷Khrista Kaxho Müikyae lomkya ningle hünzom zanglom saikha tüi angkya mwot changle. Ile changkoxle tix ku hünzom hato chatle ngui angkya chitsuak koxlax tsuak koxlax; Kaxho Müikya apuk angkya bama mongtex tuita ma tomle, ku füi chakta le hünzom ajongle tüikya, hünzom bama müikya kax-ngao kue atat ang kopüi.

²⁸Hünzom zanbu thua taxza; jento mongchongle ngolax. Ile changkoxtix hünzome hwom to anaoüi ilaxle hwom chithokya ang achang angkya changle le hwome ngün ang kopüi, chemthüikoxle hünzom ang anao angkya zong a Zange fa angkya changle.

²⁹Tamchu chix to ongkya makhange tata le chichangle chix hanpakma sikngün apongkya tokhangechu wüi, hünzom ang Khrista thotha angkya shomüi fadaoa.

³⁰Athax a hünzomchu ku füi tomle zantho ma ajong ang tsuaküi. Ija a amiba wüi hünzome ku azanle ngokya ngünle hüikya zantho changle; ilaxle hünzome atatle hüipu, athaxchu ku ija füi azanle wüi ngopu.