Read Wancho Naga Filipi 2 Bible Online

Filipi 2 - Wancho Naga bible

Filipi 2

¹Hünzom tsün Khrista ma ngokyae hünzom tsakzong ang koxle, ilaxle chix mongküne hünzom ang künsom mong adangle. Hünzom chasa füi notomkya tüile, ilaxle hünzom ma tata to chingcha jajakya tüile.

²Idaile, mongjang tuita ma tomlaxle, mongkün tuita ahanle, ilaxle chasa hia kün-mong tuita ma tomlaxle ku ang okhonguile mong amüi angkya bama hünzom zongsaipu.

³Ma fün müi angkya tata thütlaxle chichangba mixtha naxjao le chemchu taxmok, ikoxle ma füi mix wüi si le thütlaxle tata zongto puinai le tüikox.

⁴Ma mongtsukya tata chichangle mix mong tsukya tochu hukox.

⁵Nang ma tüi angkya zanglom saikha a oja Khrista ma tüipuix, ija changle:

⁶Jento chix ma Zang jaopo tüikya, ikoxlechu Zang füi tomwüi ang, achang angkya changle le, chix mongto zongma laxle, otuechu chithüt.

⁷Itülüi thüikox, chix küntsu monglua to; chix ma tüikya kwomle dantox, üntoxle da tuita zanglom twon. Chix khünak ningle achang, ilaxle khünak lailaile ngaile aho.

⁸Chix a puinai le tüikya; pünsak ma zi angkya to lünle, ziklom ma chix kax ma laxle aham.

⁹Ikhoma Zange chix pangnu thakma nwon, üntoxle pangnu thak tokya, mün chix ang kox.

¹⁰Idaile Jisu mün achuak achenle, ding to tüikya pangnusa, chaxwannu angkya hia amachi tokyabu; pangnue wüi chix chitong ma, akhuxle shwomüi.

¹¹Hopa Zang fuazang ma, Jisu Khrista a Jowanpa changpu le; ngaitho le apuk angkya changle.

¹²Ikhoma ku mongkün zuikhuibu, ku hünzom füi tomle tüipongma hünzome ku kax ma laxle ngohomkya ningle, ku hünzom füi atsaile ngopongma sisile hünzome ku kax ma laxle ngokya sümüi. Hünzom khosün okho angui ang za-nga le ilaxle abün ngale omok-omok mokkox;

¹³chemthüikoxle chix kax ma lax angkya ilaxle mongtsule tüi angkya hanpakma Zange hünzom ma mwot mokle tüile.

¹⁴Jali lom to apüikya hia kax ma alankya chitüi homle mokkox,

¹⁵ikoxletix chimüikya chaxwannu hia ochax khünakbu füi tomle ngokya okhonguikya Zangsu Zangsabu ningle ilaxle mixe omale thüi angkya olom chemchu chitüi le hünzom tsaotha le changüi. Hünzom khüzün tsün bama kaxho fakya zuma, lyettsibue zangding to nyankya lailaile hünzomechu hwom khato nyan angkya changle.

¹⁶Hünzome ile jangmok thüikoxle, Khrista Hanpak Nyix nguikya zuma hünzom bama ku ang mongngam angkya olom tüiüi, chemthüikoxle ile changkyae ku azongkya hia mwot oba to tomta le chichang khato le ahoüi.

¹⁷Ku khüzün aji a kue Zang ang tö koxle ngokya hünzom mongong to li angchu laxtüilax. Ile namchang thünchu ku zongma mongmüimüi wüi changpu ilaxle hünzom pangnusa füi ku mongmüi atom-ahanüi.

¹⁸Ilailaile hünzom chuwüi mongmüi ilaxle hünzom mongmüi ku füi atom-ahan angkya oli changle.

¹⁹Jowanpa mongtex jangchang thüikoxle, kue chwonle wüi hünzom hato Timothi akat ang thoüile monghompu; ikoxletix hünzom bama kaxho atatkya tokhange ku ang mongchyen tüiüi.

²⁰Ku mongjang atom-ahanle laxkya hia hünzom hanpakma otsing tomtata ma tuitex füi tüikya mix chix tata wüi changle.

²¹Mamabu pangwüi mamwot mwot to mongkoxle tüile, Jisu Khrista hanpakma mongkoxkya mix owachu müntüi.

²²Kukhi hopa tuta sasünnyi ningle, Kaxho Müikya kuxma motomle saxmokle hüilaxle, chix tuita sukya mix changle le ahokya hünzome jao awanle hüipu.

²³Idaile ku bama zangwün chempang le changüihex, ija opaktik laxle kue chix hünzom hato chwonle wüi akat ang thoüile monghompu.

²⁴Üntoxle ku jao jaochu hünzom hato chwonchwonle wüi ngui ang thoüile Zang to mongongkya tüipu.

²⁵Epafrodita owae kuchima süt laxle mwot mok üntoxle azanle hüilaxpuix, tamchu hünzome ku to fongkya tukma kaxho mix ang achangle hüidaokya mix, kue chix hünzom hato akat angkya tuita khütkhaxkya mwot changle le texle.

²⁶Chixe hünzom ngündaose le sungle tamchu hünzom ang chix kakkya zing atat ang koxkya bama chix mongto kakle.

²⁷Changle chix kaktomtata daoa ilaxle chix pazizisa. Ikoxlechu Zange chix to chingcha, chix tata to le chichangle ku tochu wüi chingcha, ilaxle ku hato ija akhokya mongma hüi ang chitom le abax.

²⁸Ikhoma hünzom hato chix akat angkya ku mong sisi tsule, ikoxletix chix ngün ang koplaxle hünzom ang mongmüiüi, ilaxle ku mongmachu maxünüi.

²⁹Idaile Jowanpa ma tuita tüi-hi-nao changle le hünzome chix wün pwonle pongkop lax. Chix ningkya mix pangnu ang wüi chathua zakya ahokox.

³⁰Chemthüikoxle hünzome fa ang chithokya, ku to fong angkya bama, Khrista mwottho hanpakma chixe ma khüzün koxle among ilaxle pazizisa le chang.