Read Wancho Naga Kolosi 1 Bible Online

Kolosi 1 - Wancho Naga bible

Kolosi 1

¹Zang mongtex makhange wangshem tuita ang achangkya Pol hia Timothi nyi tokhange:

²Kolosi angkya Zang khünaknu, Khrista füikya notom ma opang kwom tüinaobu hex, hwom hato: Zang kem Hopae chingcha üntoxle mongkün fahüi.

³Otue kwome hünzom hanpakma zangjop üihex, kwome chithai le kem Jowanpa Jisu Khrista Hopa Zang ang münchong fapu.

⁴Chemthüikoxle Khrista tokya hünzom mongong üntoxle Zang khünaknu tokya hünzom mongkün bama kwome atatle.

⁵Otue hünzome Kaxho Müikya bama otsingtsing kaxho pongwang ma atat laxpuix, hünzome ijae fakya monghombu bama atatpu. Idaile hünzom hanpakmale oja monghom zangkangting to sünle thomlaxpuix, ija hünzom monghom a hünzom mongong ilaxle mongkün chifün changle.

⁶Pongwang ole atatkya nyix ijae hünzom mong alüixkya üntoxle Zang chingcha chongkya tsingle lax ang fakya lailaile, hünzom hato hüikya Kaxho Müikya tuitata wüi khünaknu tsün lüile koxle chaxwannu faole aham ngole.

⁷Hünzom hato ija Kaxho Müikya apüile koxkya mix a, kwome tamnüile mongkünkya kwom üitho Epafra changle. Chix a ikhato hünzom lüix ma kwom to fongkya mix, Jisu Khrista mongong da tuita changle.

⁸Otsao Chasae hünzom ang fakya mongkün bama kwom hama chixe wünle.

⁹Ikhoma kwome hünzom bama atatle hüikya tokhange wüi hünzom hanpakma zangjople hüikya changpu. Otsao Chasae fakya hwon-je hia tsingle tsuakkya pangnu füi, tsingwankya chix mongtex füi hünzom awang ang laxkoxle kwome Zang to joppu.

¹⁰Ifüima hünzome chix mong amüi angkyakya mokle Jowanpa mongtex ma ngo ang thoüi. Hünzome tsün ma müikya mwot pangnu li mokle alai ilaxle hünzom Zang tsingwankya ma tsongüi.

¹¹Hünzome pangnu li to thuakjokle adu tho angkya hanpakma, chix fuazang zong makhange hüikya zong pangnu füi hünzom tsakzong le naxchang.

¹²Zangngai Wangting to chix khünaknu hanpakma Zange chem achwonle thomtüi laxpuix, ija süntswon ma nang hak ang tsuakle owae zinglaxpuix, ija Hopa Zang ang mongmüi füi münchong fakox.

¹³Chix owae kem zangnak tsakzong chak tokya sünle kop ilaxle chix mongkün Hosa wangting to khosün laxle apüipuix;

¹⁴chix a kem dan-pankya mix, thüikoxle kem ochaxbu thailak koxkya mix changpu.

¹⁵Khrista a mike ngünkya tuita mike chingünkya Zang ocha changpu. Chix a pongwang ole puxkya nao, chakzing pangnu thakma akhokya changpu.

¹⁶Chemthüikoxle Zange chix makhange ding hia hax ma, mike ngünkya ilaxle mike chingünkya, tamchu chongwang tüntong wüi changlax, Chasa tsakzong wüi changlax, apün-awangkyabu wüi changlax, tsakzongbu wüi changlax; Chix hanpakma tamchu chix makhange Zange zangfang komle zing.

¹⁷Pangnuli thoto wüi Khrista tüikya, üntoxle chix füi notom laxle pangnu li ang ma chifün tüi.

¹⁸Chix a ma tsangtsa thüikoxle müimüithom ma okhang; chix a tsangtsa khüzün otong. Pangnu li to chix tata ang pongwang lükya chifün tüi angkya hanpakma, zidaokya chatle azangle azwotkya oput wangkya nao chix changle.

¹⁹Chemthüikoxle Hosa ma Zang jaopo komkaile tüi angkya a Zange chix mongto wünle tsuak daokya tuita changle.

²⁰Ifüima Hosa makhange zangfang abakle chix hato chat ang tom angkya Zange mongzangwünle tsuak. Chix Hosa pünsak ma zikya tokhange Zange tumüi lomzing ilaxle ding hia hax ma tüikya pangnu li chix hato chat ang tom.

²¹Hanpak tuita ma hünzome mokkya ochax mwot hia mongjang khoma hünzom Zang füi atsaile ochu to tamchu zan ang achangle tüikya.

²²Ikoxle athax a chix Hosa müi-hi-aji ma zi ang koxkya makhange, otsao ma, ofwot chitüile tamchu thaikya kha chitüi le chix ngwotnui to apüi angkya hanpakma Zange nang chix zuikhui ang achangle.

²³Zangfang ma tüikya chakzing pangnu hato anwot-anokya oja Kaxho Müikya hünzome atatle lax, ilaxle ku Pol oja bama thothapa ang achang, ija Kaxho Müikya monghom angkya chiachikchex le mongong ma jang ajong thüiba, hünzom chix füito wom ang tomüi.

²⁴Ilaxle hünzom hanpakma kue sikngün apongkya bama ku a mongmüipu, chemthüikoxle ku tsangtsa ma sikngün apongkya tokhange, chix tsangtsa thüikoxle müimüithom bama Khrista sikngün okho angui ang atale tüikya ashuk aza angkya to fongle hüile.

²⁵Zang, owae hünzom fün amüi angkya kuxma, chixe tsün-tsün to khünaknu thüntho ma pyenle thomkya huxsa mwot ikoxle oja athax a chix khünaknu hato ngaile apukpuix,

²⁶owae ija kaxho komkaile apuk ang ku tsan laxpuix, chixe ku Zang müimüithom ma da ang achangkya changle.

²⁷Zang katzua wünkhom a, oja ahak aluakya hia fuazangkya huxsa chix khünaknu nok hanpakmale pyenle thomkya hex, ija huxsa chix khünaknu hato ngaile tsing ang kox angkya changle. Huxsa Ija a ile changle: Khrista a hünzom ma tüile, thüikoxle, hünzome Zang fuazang süntswon ang kopüi.

²⁸Ikhoma kwome nok hato wüi Khrista apuk apua. Khrista ma mixhuak pangnu wüi tsongkya ang achangle Zang ngwotnui to pangnu wüi apüi angkya hanpakma kwome otsuaktsuak ma hwom ang kaxkhün akax ilaxle anwot-anopu.

²⁹Tamchu ija hanpakma ku ma owae je füi mwot mokpuix, chixe mokkya lailaile kuechu wüi azongle mokpu.