Read Wancho Naga 1 Thesalonika 2 Bible Online

1 Thesalonika 2 - Wancho Naga bible

1 Thesalonika 2

¹Kutüi kunaohom, kwome hünzom waikya a oba to waikya münchangle hünzome awanpu.

²Kwom Thesalonika to hünzom hato nguiüi thoto Filipi ma kwom to chisumüile tamchu ahai le chemle hwondao laxpuix, ija hünzome awan ngopu. Ile kwom zan to kale mokkyabu tüihu koxlechu, chix makhange hüikya Kaxho Müikya hünzom hama wün ang kwom Zange kwom ang mongchyen fapu.

³Kwome hwon anokya ma chisukya mongjang hia ochax tutex chemchu chitüikya, chichang thüiba kwome owawa dyen-ngan ang azongkya chemchu chitüikya.

⁴Itülüi kwome Zang mongtex chem hex ijaja akax, chemthüikoxle Kaxho Müikya apuk angkya mwot kwom ang koxkox le asule tüile le chixe ngünle tsuak. Kwome khünak mong amüi ang chiazong, ikoxle Zang owae kwom mongthwon lop, chix mong amüi ang azongpu.

⁵Kwom hünzom hato chiajingkya zangwün koplaxle nguikya münchang le hünzome müile tsingpu, tamchu kwom nüfux to chwop-khom angkya kwome zang chiwün, kwom kaxkhi ang Zang tüile!

⁶Kwome owa angkyachu kwom to achuak achenkya chilom, hünzom angkyachu chilom chichangba mamabu angkyachu wüi chilom.

⁷Khrista wangshembu ningle kwome hünzom atsang ang those, ikoxle kwome ija chilom. Ikoxle kwom hünzom füi ngotanto, nao honu tuitae naosa akox-akomkya ningle, kwom a somdangle tüikya.

⁸Kwom ma hünzom to mongkünkya tüikya khoma, Zang tokhange hüikya Kaxho Müikya tata chichangle kwom tsün ngaxchu hünzom füi atom-ahan ang achwonle tüikya. Hünzom a kwom zongto mongkünle tüikya.

⁹Kutüi kunaohom, kwome mokdaokya hia sikngün apong daokya, hünzom mong ma tüiün angpu! Zang tokhange hüikya Kaxho Müikya hünzom hato apuk-apuakya zuma hünzom zongto kwom tuita tingtui dongle nakchang ünkox le kwome zangnak zangngai mwot mokpu.

¹⁰Hünzom mongongkyabu zongto kwom zanglom saikha tsaotha le tüikya, sukya ilaxle thaikya kha chitüi le tüikya changpu le kaxkhi ang hünzom changle ilaxle Zang chuwüi changle.

¹¹Hopa tuitae naosa to humekya ningle kwom hünzom zongto tüikya hünzome awanle ngopu.

¹²Zang owae chix wangting hia fuazang süntswon ma hak ang hünzom nyakpuix, chix mong amüi angkya olom ma hünzom tsün ngo angkya bama kwome hünzom ang zong adünpu, mong asompu ilaxle tsyale ngopu.

¹³Ilaxle kwome jento Zang ang münchong fakya chatle mama kaxhuachu tüihupu. Otue kwome Zang Kaxho apukpuix, hünzome ija atat ilaxle ija pongle kop, khünak kaxho ningle chichang ikoxle Zang kaxhole pongle kop, ija changchu changpu, chemthüikoxle mongong tüikyabu hünzom ma Zange mwot mokle.

¹⁴Kutüi kunaohom, Jehudi haxtok angkya müimüithombue thüikoxle Khrista to ongkya khünakbue apongkya sikngün hünzomechu apongpu. Ma khünakbue hünzom to chemle zothupuix ilailaile hwom tochu manok Jehudi khünakbue zothupkya changpu.

¹⁵Jowanpa Jisu tamchu ajebu hwome langpu, ilaxle kwom to zothuppu. Zang miksho ma hwom otukux chix mongma ang tomkyabu hex! Hwom a pangnu zongto otukux chichangle tüikyabu hex!

¹⁶Hwom hato khosün apüi angkya kaxho mixnokbu hato apuk-apuale ngokya kwom abax ang ngaxchu hwom tüle azong daoa. Ile hwome othuithuima mokle hüikya ochax okhongui le mokdaoa. Üntoxle athax oshuk ma hwom hato Zang mongtsik nguile tüile!

¹⁷Kutüi kunaohom, otue kwom onox ma hünzom füi atsaile changpuix bachutix mongjang ma chichang ikoxle tsangtsa tata janwüi; kwome otukux hünzom sungpuix ilaxle hünzom ngün ang kwom otukux azongpuix!

¹⁸Kwom hünzom hato chatse tsupu. Kujaojaoe obi thomthom ma hexle chat ang azongdaoa, ikoxle haxshixe lom chidap.

¹⁹Kwom monghom, kwom mongmüi, ilaxle chix nguikya zuma Jowanpa Jisu Khrista thüntho ma kwome tholünkya bama kwom ngam angkya, ija a owa khoma: Ija a mama owa khomachu münchang, hünzom khoma tix changpu!

²⁰Otsing tomtata ma hünzom tix kwom mongngam üntoxle kwom mongmüi changle!