Read Wancho Naga 1 Thesalonika 5 Bible Online

1 Thesalonika 5 - Wancho Naga bible

1 Thesalonika 5

¹Tüinaohom, ibu chemtue changüihex le hanpak zanghan bama textya le kue hünzom hato za ngo angkya mwot münchang.

²Chemthüikoxle Jowanpa hanpak zangnake ahuxmix nguikya ningle chang angkya le hünzome ipong müile awan ngopu.

³Otue khünakbue “Pangnu wüi khuakhomle müile tüile”, le thüiüihex, ipong khae allele thama apongle. Sheko tuita hato naongün wokkak allele chemle ngangle hüipuix, ija lailaile ijachu ngangle hüiüi, ilaxle khünakbu azang ang münkopüi.

⁴Ikoxle tüinaohom, hünzom a zangnak to ngokya chichang, ilaxle Ija nyixe hünzom ahuxmixe kopkya ningle abütsünsün le chikopüi.

⁵Hünzom pangnusa zangngai hia anyixning kux changpu. Kwom awünning hia zangnak kux chichang.

⁶Idaile kem mix khünakbu ningle jiple chingoüi; kem mik azangle tamchu tok-ngakya füi atsaile ngo angkya changle.

⁷Khünakbu a zangnak ma tix jippu; hwom to jutok saxnga awünningletix.

⁸Ikoxle kem a anyixning kux, üntoxle kem a tok-ngakya füi atsaile ngoüi. Mongong hia mongkün keme tata khaxtok khwop jan ang apong angkya changle, ilaxle khosün bama kem monghom khohom tuita ang lax angkya changle.

⁹Zange kem chix mongtsik sikngün aponglaxo le zünle kopkya chichang, ikoxle kem Jowanpa Jisu Khrista makhange khosünkya kop ang zünle kop wüi;

¹⁰chemthüikoxle chix nguikya thoma kem ozün ma wüi nuilax chichangba zile wüi banglax, tütale wüi changkoxchu kem chix füi tomle ozün ma ngo angkya hanpakmale chix zikya changpu.

¹¹Idaile hünzome athax ponge mokle ngokya lailaile tata mong achen kox ilaxle tata to fongkox.

¹²Opange hünzom khristan tsün lom ma zun ilaxle adangle fa ang hünzom khama mwot mokle tüipuix, hwom to olom ma chathua zakya tüikox le, tüinaohom, kwome zingmüi ma hünzom füi chingcha jule akaxpu.

¹³Hwome mokkya mwot khoma chathua zakya hia mongkün ahole hume kox. Hünzom tata füi mongsom ma ngolax.

¹⁴Tüinaohom, hünzome chem mwot chimokle ngokyabu ang kaxkhün laxkox, mongchyen chitüikyabu ang mongchyen laxkox, shonaikyabu to asunkox, pangnu füi thuakjokkya tüikox.

¹⁵Owawae oma lüix to oma khom angkya mix jangtüi thüiba hukox, ikoxle tata füi tamchu pang füi wüi jento omüimüi wüi mok angkya nang mongjang ang achangkox.

¹⁶Othuithuima mongmüikox,

¹⁷othuithuima zangjopkox,

¹⁸tütatue hex münchong fale tüikox, Khrista füikya notom ma hünzom tsün ma Zang mongtex a ija changle.

¹⁹Otsao Chasa wünchua taxamüt;

²⁰Chasa kaxhobu taxahai.

²¹Pangnu li to thwonle anokox; oja müipuix ija thomkox

²²ilaxle chimüikya oli komle tsiakle toxkox.

²³Pangnu lom ma hünzom otsao ang achangle Zange kwom ang mongsom naxfa ilaxle hünzom ozün komle, thüikoxle chasa khüzün tamchu tsangtsa pangnu, Jowanpa Jisu Khrista nguipongma othai lili füi atsaile sünle thomüi.

²⁴Zang owae nang laxpuix, chixe ija moküi jao, chemthüikoxle mongong ma chix jeile nui angkya münchang.

²⁵Tüinaohom, kwom hanpakmachu wüi zangjop hüi.

²⁶Tüinaohom, tun apongkya füi mongong mixbu pang ang wüi salam fakox.

²⁷Jowanpa tsakzong füi kue thüipu: Ija lai a mongong ma tüinaohom pangnu hato wüi ele ahokox.

²⁸Jowanpa Jisu Khrista chingcha hünzom füi naxngokox.