Read Wancho Naga Jihusua 1 Bible Online

Jihusua 1 - Wancho Naga bible

Jihusua 1

¹JOWANPA dapa Mosa zikya füima, JOWANPAe Jihusua hama, chixe Mosa to fongle hüikya apua.

²Chixe thüi: “Ku dapa Mosa a zidaoa. Athaxpi nang üntoxle Israel khünaknu pangwüi, Jordan shuanu tale, kue hwom ang koxle ngokya haxtok to ngui ang achwonlax.

³Kue Mosa füi akax daokya ningle, kue nang ang tamchu ku khünaknu ang, hünzom oja haxtok alop ang nguile ngopuix, ija haxtok bakle koxpu.

⁴Hünzom haxsüt longzi a shuathongchi sak-hax makhange shuakuxchi ma Lebanon Haxnu alople; handünchi ma Eufrat shuanu makhange Hit nok haxtok akaile, hannopchi ma Mediterenian Tinu alople changüi.

⁵Jihusua, nang ozün ma ngokya kople owaechu nang to lüt ang münthoüi. Mosa füi chemle ngokyahex, ilailaile ku nang füi ngoüi; kue nang chemtuechu münawüt.

⁶Mongzangwünle tsuaklax tamchu mongong tüilax, chemthüikoxle kue hwom pupa hwom ang tsaokya haxtok hwome kopkya zuma nang a hwom lompa ang achang angkya changpu.

⁷Mongzangwünle tsuaklax ilaxle ku dapa Mosa-e hünzom ang koxkya Wanlom pangwüi kax ma laxle tüileo le thüilax. Ikha angkya oli tuita ahaile taxchang ikoxle nange nang alele pangkhato wüi tho-lünkya tüiüi.

⁸Hünzome Zangshwom pongma chithaile Wanlom laipex e angkya münalak-o thüilax. Zangnak zangngai ija müile aju-ajanglax, ilaxle ima zale tüikya pangwüi kax ma laxle tüile-ole thüilax. Ile jangchangba nang a ahak-aluale tamchu tho-lünle changüi.

⁹Kue nang füi mongzangwünle tsuak angkya hia mongong tüile chang angkya bama kaxtom fadaokya taxalak. Taxza chichangba mong taxasho; chemthüikoxle, JOWANPA, ku hünzom Zang, nang alele pangnu chito nang füi tüile ngoüi.”

¹⁰Ifüima Jihusua-e lompabu ang

¹¹pom pangwüi to aham angkya ilaxle khünaknu füi akax angkya kax koxle thüi: “Osüt-oling muapong achwonlax, chemthüikoxle nyix azom ma wüi hünzome Jordan shuanu talaxle JOWANPA hünzom Zang-e hünzom ang koxle ngokya haxtok lax angkya changle.”

¹²Jihusua-e Reuben hia Gad üntoxle Manasseh süifi, ibu homjenbu füi akax,

¹³“JOWANPA hünzom Zang-e Jordan shuanu zongma handünchi haxtok hünzom tingtok ang koxüihex-ole JOWAN dapa Mosa-e hünzom füi akaxkya texle ataklax.

¹⁴Hünzom sa-nu hwom tamchu tsom-pom ima zakle nuiüi, ikoxle hünzom zankat naomüimüi azan ang akhyep-adi laxle, ma füikya Israel nok mamabu füi tomle Jordan shuanu tale le angkya changle.

¹⁵Jordan shuanu zongma hannopchi haxtok koplaxle tingtan nokzingle changkya kople hwom to asunle azanüi. Chemtue chixe Israel homjen pangwüi ang khosün fale tsuaküihex, ifüima hünzom chatlaxle, JOWAN dapa Mosa-e hünzom ang koxle toxkya haxtok, Jordan shuanu zongma tsaxchi ma hünzome tingtan nokzingle ngo ang tsuaküi.”

¹⁶Hwome Jihusua kax to lan: “Kwome nang kax ma bakle laxüi ilaxle nange atomtom khato kwom paoüi.

¹⁷Kwome Mosa kax ma laxle hüipupule nang kax ma laxle changüi, ilaxle chix Mosa füi chemle ngole hüidaopuix ilailaile JOWANPA hünzom Zang nang füi naxngo!

¹⁸Owae nange apün-adakya to atüi-atuale changüihex chichangba nang kaxtom tütali kax ma chilaxle abaüihex, chix a mik max ang tomüi. Mongzangwünle tsuaklax tamchu mongong thomlax!”