Read Wancho Naga Jihusua 10 Bible Online

Jihusua 10 - Wancho Naga bible

Jihusua 10

¹Jeriko tingnu hia ija wanghom to lailaile Jihusua-e Ai tingnu komkaile hwop laxle ija wanghom füi tomle olithule amütdaoata le Jerusalem angkya wanghompa Adonizedek-e atat ang kop. Gibeon noke Israel nok füi nokmüi laxle hwom tomwüi ngole ta lechuwüi atat.

²Jerusalem tingnu angkya khünaknu ang ija zingtho to na nwon, chemthüikoxle Gibeonbu chuwüi tingnu tu ma wanghom füikya chongkya tingnu tuita tamchu ija a Ai füi ngaxchu chongkya, ilaxle ikha angkya khünakbu a azan ang tüle thokyabu chang koxle.

³Ikhoma Adonizedek-e, Hebron nok wanghompa Hoham, Jarmuth nok wanghompa Piram, Lakish nok wanghompa Jafia ilaxle Eglon nok wanghompa Debir, ibibi hato kaxho ile akat:

⁴“Gibeon noke pi Jihusua hia Israel nok füi nokmüi zingle changdaoa ta, idaile Gibeon nok tingtak ang ku to asunhüi.”

⁵Ibibi Amor nok, Jerusalem, Hebron, Jarmuth, Lakish tamchu Eglon, hwom bibi wanghombu athüt üntoxle tingtakle amüt ang Gibeon akhople kop.

⁶Gibeon noke Gilgal ma pom zailaxle ngokya Jihusua hato kax akat: “Alixachong! Nange kwom kwom tata taxdan! Athax wüi hüihüi, ilaxle kwom khosün hüi! Haxhua tokya Amor nok wanghom atüitüi komle asüilaxle kwom zan to ka ang achwonle tüia!”

⁷Ikhoma Jihusua hia chix süpahibu, ataxle müikya othom chuwüi koplaxle, Gilgal angkya achexle lai.

⁸JOWANPAe Jihusua ang thüi: “Hwom thua taxza. Kue nang ang lüt ang tomdaoa. Hwom opupuechu nang füi alünle chang ang münthopu.”

⁹Awünning tungle Jihusua hia chix süpahibu Gilgal makhange apüile Gibeon to ka, ilaxle Amor nok to hwome allele single kox.

¹⁰Israel nok süpahibu ngünkya thoto Amor nok süpahibu ang JOWANPAe tüle abüt ang kox. Israel noke hwom Gibeon ma lang ilaxle hwom to single lang-ngale achuale Beth Horon angkya haxnu akaile shuathong chito Azekah hia Makkedah alople jwon.

¹¹Chemtue Amor nok Israel nok süpahibu thoto longzi akaile zikle jupuix, JOWANPAe hwom Azekah alop ang paole ngopongma tüpong chongkya junbu hwom hato adüt. Israel khünakbue langkya füi süluile jun füi thuple lang.

¹²JOWANPAe Israel nok ang Amor nok to lüt ang tomkya nyix Jihusua-e JOWANPA füi zangwün. Israel khünaknu tüipongma chixe thüi: “Zanghannu, Gibeon hwom khangkho ma nang tangle ngoün; Lyetnu, Aijalon haxsha tang ma zakkox.”

¹³Israel noke zan to lütle machang tanto zanghannu tangle ajong ilaxle lyetnu chiaham. Ija a Jashar laipex ma zakya tüile. Zanghannu a dingkho to khanghomhua tang ma nyixtungle nui.

¹⁴Ithomachu, ifüimachu, anyix kopkya mong ma ilailaikya hanpak nyixta malaitox, ija nyix a JOWANPAe khünak kax ma laxkya nyix changkya dai. JOWANPA a Israel nok chima sütle azan!

¹⁵Ifüima Jihusua hia chix süpahibu hwom thongnui Gilgal to chat.

¹⁶Ikoxlechu Amor nok wanghom hwom a paole azang laxle Makkedah longkun ma azwonle ngo.

¹⁷Owawae hwom atak, ilaxle hwom azwonle ngokya kha Jihusua hama apuale kox.

¹⁸Chixe thüi: “Chongkya longnu füi ija longkun ka hakle thomdao. Ikhama nyetmixbu thomkox;

¹⁹Ikoxlechu hünzom a ikhato taxngo. Zan to hungale tan-ngolax, ilaxle toknachi tokhange singkox. Hwom tingnu angkya paolaxle azang ang taxtom. JOWANPA hünzom Zang-e hwom to lüt angkya hünzom ang koxdaoa.”

²⁰Jihusua hia chix khünakbue hwom to hüt-hütle lang, ikoxlechu züizüi hwom tingnu pan katuk mongto azwonle azang ang kop.

²¹Ilaxle Jihusua khünaknu pangwüi müimüi-zangngaile chix ha alople Makkedah to chat. Chaxwan tok angkya owaechu athaxpi Israel nok mün amale zangwün ang ngaxchu za.

²²Ipongma Jihusua-e akax: “Longkun ka daplaxle wanghom ibu ku hato apüihüi.”

²³Ikhoma longkun daplaxle Jerusalem, Hebron, Jarmuth, Lakish hia Eglon, ibu nok wanghombu alai

²⁴ilaxle Jihusua hato apüile kox. Jihusua-e Israel khünaknu pangwüi sele asox ilaxle chix füito zan to kakya nguakax-wangkhobu nguilaxle wanghom ibu to dingkux ma hwom cha füi ting ang tom. Hwome ile mok.

²⁵Ifüima nguakax-wangkhobu ang Jihusua-e thüi: “Hünzom taxza chichangba mong taxhi. Chachen-mongchen füi tüilax büthüikoxle hünzom zan pangwüi füi JOWANPAe ile mok angkya changle.”

²⁶Ifüima Jihusua-e ibu wanghom aga, hwom pangwüi lang ilaxle hansong kople mang ibu pün ma ashale thom.

²⁷Zanghan mik düt füima Jihusua-e ibu mang ajo ang tom ilaxle ami hwom azwonle ngokya longkun khato awüt. Ija longlua ma longnu chongkyabue huxle tox, ilaxle ibu anyix kople tüile.

²⁸Ija nyix Jihusua-e Mekkedah nok tingtakle ija nok wanghompa kop. Tingnu mong ma chixe pangwüi mik amüt; owachu ozün ma danle chitox. Jeriko wanghompa to chixe chemle hwonpuix ija lailaile Mekkedah wanghompa to chuwüi hwon.

²⁹Ija füima Jihusua hia chix süpahibu Mekkedah angkya Libnah to ngui ilaxle ija tingtak.

³⁰JOWANPAe ija tingnu to chuwüi Israel nok ang lüt ang tom. Hwome tuita oli danle chitox ikoxle ikhama atüitüi bakle lang. Jeriko nok wanghompa to chemle hwonpuix ilailaile ija nok wanghompa tochu hwome hwon.

³¹Ifüima Jihusua hia chix süpahibu Libnah angkya Lakish to ngui, ija akhople kop, ilaxle tingtak.

³²Nyix anyi-azom laxle JOWANPAe Israel nok ang Lakish nok to lüt ang tom. Hwome Libnah ma mokle toxdaokya lailaile ija tingnu ma atüitüi oli tuita chitoxle komkaile amüt.

³³Gezer nok wanghompa Horam Lakish nok to fong ang ngui, ikoxle hwom to chuwüi Jihusua hia chix süpahibue lüt ilaxle hwom owachu ozün ma chitox.

³⁴Ifüima Jihusua hia chix süpahibu Lakish angkya Eglon to ngui. Hwome ija akhople kop ilaxle tingtak.

³⁵Hwome ija nyixta ma wüi kop ang tho, ilaxle Lakish nok to hwonkya ningle hwome mixhuak tuita ozün ma chitoxle hwon.

³⁶Ifüima Jihusua hia chix süpahibu Eglon angkya Hebron haxsha to ngui ilaxle ija tingtak.

³⁷Tingtak laxle ija kop. Hwome wanghompa tamchu tingnu ma atüitüi pangwüi langle awüt ilaxle tomzi nok tokyabu ngaxchu wüi lang. Jihusua-e ija tingnu komkaile oli thule Eglon nok lailaile amüt. Ikha angkya ozün ma owachu chitox.

³⁸Ifüima Jihusua hia chix süpahibu Debir nok to chatlaxle ija tingtak.

³⁹Chixe ija ting kop, ikha nok wanghom tamchu tomzi nok wanghombu pangwüi kop. Hwome ikhama pangwüi mik amüt. Hebron hia Libnah nokbu, ibu wanghombu füi afomle chemle hwondao laxpuix, ilailaile Jihusua-e Debir tingnu hia ija wanghompa tochu hwon.

⁴⁰Jihusua-e haxtok pangwüi lütle kop. Chixe haxhua nok wanghombu pangwüi to lüt, ilaxle handünchi haxsha nok, hannopchi haxnu chithong ma tüikya nok ilaxle shuathongchi ma haxkozan to tüikya onok, ibu pangwüi to chixe lüt. Chixe owachu danle chitox; pangwüi langle awüt. Ile chang angkya a JOWANPA Israel nok Zang kaxtom chang koxpu.

⁴¹Ija zankate Jihusua a Kadesh Barnia makhange shuathongchi Gaza Tinu kax alople, Goshen haxsüt pangwüi womle, ilaxle shuakuxchi ma Gibeon alople longzi achen.

⁴²JOWANPA, Israel nok Zang hwom hanpakma azanle chang koxle, Jihusua-e ibibi haxtok hia wanghombu pangwüi zankat tamfang ma wüi kop ang tho.

⁴³Ifüima Jihusua hia chix süpahibu hwom thongnui Gilgal to chat.