Read Wancho Naga Jihusua 13 Bible Online

Jihusua 13 - Wancho Naga bible

Jihusua 13

¹Athax Jihusua tüle azule taiko ang achang. JOWANPAe chix ang thüi: “Nang a müimamale azudaoa ikoxle athax ngaxchu makoptsuakkya haxtok tüihupu:

²Filistia hia Geshur haxtok pangwüi,

³ilaxle shuathongchi ma Awim nok haxtok bakle. (Ija haxtok a Ijip nok longzipong angkya Shihor shuasa makhange shuakux chito Ekron longzipong alople Kanan haxtok ang laxle tüikyabu: Gaza, Ashdod, Ashkelon, Gath, hia Ekron) ibu ma tüikya Filistia nok.

⁴Anaole chuwüi Kanan nok haxtok tüihupu, ilaxle Mearah (oja Sidon nok kux changpuix), Amor nok longzipong Afek alople;

⁵Gebal nok haxtok; Balgad makhange handünchi Lebanon pangwüi, oja Harmon Haxnu zongma shuathongchi Hamath lomnu ma Tüikyabu.

⁶Ija ma Sidon nok haxtok pangwüi womle. Hwom a Lebanon Haxnu hia Misrefoth Maim nyi zo ma ngokyabu changle. Israel khünaknue ziakople hüikya zuma kue ibu khünak pangwüi jwonle apaoüi. Kue nang füi kaxtom koxle akax daokya ningle nange haxtok Israel nok ang tom-hanle kox angkya changpu.

⁷Athaxpi, ibibi haxtok a hwom homjen aku ilaxle Manasseh homjen süifi tüikya hanpak ang tom-hanle changlax, ilaxle ibu hwome ma tingtok ang laxüi.”

⁸Reuben hia gad homjen tamchu Manasseh homjen süifie, JOWAN dapa Mosa-e koxle toxkya haxtok hwom tingtok ang koplaxle tüile; ija haxtok a Jordan shuanu ta to tüile.

⁹Hwom haxsüt a Aroar (Arnon haxsha otua ma tüikya) ilaxle ija haxsha osungwa ma tüikya tingnu ilaxle Medeba makhange Dibon alople tüikya haxsha chuwüi womle tüipu.

¹⁰Imakhange Amon alople, Amor nok wanghompa Sihon-e Heshbon makhange apünle tüikya haxtok pangwüi womle tüipu.

¹¹Gilid, Geshur hia Makah haxsüt, Harmon Haxnu komkaile, Salekah alople Bashan haxtok pangwüi ima womle tüipu.

¹²Og wangting, Refaim wanghom akiakya owae Ashtaroth hia Edrüi makhange apünle hüipuix, chix haxtok pangwüi ima womle tüipu. Mosa-e ibu to lüt ilaxle hwom jwonle apao.

¹³Ikoxlechu Israel noke Geshur hia Makah nok jwonle chiapao; anyixchu hwom Israel nok füi tomle ngole tüile.

¹⁴Liwi homjen ang Mosa-e haxtok chemchu chikox. JOWANPAe Mosa füi akax daokya lailaile hwome hwom süntswon ang JOWANPA, Israel nok Zang hato apüile koxkya tö-tsap angkya tö hwome kopüi.

¹⁵Mosa-e haxtok jongta kha Reuben homjen ang hwom süntswon hex-ole koxdaoa.

¹⁶Hwom haxsüt a Aroar alople (Arnon haxsha otua ma) ilaxle haxsha osungwa ma tüikya tingnu ilaxle Medeba akhople tüikya haxsha pangwüi ima womle.

¹⁷Ija ma Heshbon hia haxsha ma tüikya tingnu: Dibon, Bamwoth Bal, Beth Balmeon,

¹⁸Jahaz, Kedemoth, Mefath,

¹⁹Kiriathaim, Sibmah, Zereth, haxsha angkya haxkho ma tüikya Zereth Shahar,

²⁰Piska haxnu angkya haxlya ma tüikya Bethpeor, üntoxle Beth Jeshimoth, ibu pangwüi womle.

²¹Haxsha angkya tingnu pangwüi ilaxle Amor nok wanghompa Sihon, owae a Heshbon makhange apünle ngokyahex, chix wangting pangwüi ima womle. Mosa-e chix to lüt ilaxle Midi nok apünkyabu: Ewi, Rekem, Zur, Hur, üntoxle Reba hwom pangwüi to lüt. Hwom bibi pangwüi Sihon wangting ma apünle hüikyabu changle.

²²Israel noke langkya hwom bibi khama tuita a ashipa Balam changkya. Chix a Beor sasün changkya.

²³Jordan a Reuben haxsüt longzi hannopchi kao changkya. Tingnu ibu a Reuben homjen haxnu-homsabu ang hwom süntswon ang koxkya changle.

²⁴Mosa-e haxtok jongtakha Gad homjen haxnu-homsabu ang hwom süntswon ang kox.

²⁵Ija haxsüt ma ibibile womle: Jazar hia Gilid angkya tingnu pangwüi, Aroar alople Amon nok haxtok süifi, Rabbah zongma handün chikao, ibibi.

²⁶Hwom haxtok a Heshbon makhange Ramath Mizfeh hia Betonim alople, Mahanaim makhange Lodebar longzipong kople.

²⁷Jordan haxsha ma ibibile womle: Beth Haram, Bethnimrah, Sukkoth, üntoxle Zafon, Heshbon angkya wanghompa Sihon wangting pangwüi. Hannopchi hwom haxsüt longzi a Jordan shuanu makhange dongle Galili Shinthuk-titung alople.

²⁸Tingnu hia Tinglong ibu a pangwüi Gad homjen haxnu-homsabu ang hwom süntswon hanpak ang koxkya changle.

²⁹Mosa-e haxsüt jongtakha Manasseh homjen süifi tüikya ang koxle tox.

³⁰Hwom haxsüt a Mahanaim hia Bashan pangwüi: Bashan nok wanghompa Og wangting komle ima wom. Ibomachu Bashan angkya Jair tingkhuabu 60 ima wom.

³¹Gilid haxtok süifi ilaxle Ashteroth hia Edrüi, Bashan wanghompa Og pongwün tingnubu pangwüi ima wom. Ibibi pangwüi Makir sasün Manasseh homjen süifi tüikya ang bakle kox.

³²Chix Moab haxsha to tüitanto wüi Mosa-e Jeriko zongma handünchi haxtok hia Jordan ile ahanle tox.

³³Ikoxlechu Mosa-e Liwi homjen ang haxsüt chemchu chikox. Hwome ma süntswon ang JOWANPA, Israel nok Zang hato apüile koxkya khünaknu tö kha angkya kop angkya changpule akax.