Read Wancho Naga Jihusua 14 Bible Online

Jihusua 14 - Wancho Naga bible

Jihusua 14

¹Ibibi a Jordan zongma hannopchi Kanan haxtok, Israel khünaknue hwom bama chemle tom-hanle laxpuix, ija mowün changle. Nguapa Eliazar, Nun sasün Jihusua, ilaxle Israel nok saxthom homjen lompabue hwom khünak huak to hulaxle haxtok tomhanle kox.

²JOWANPAe Mosa ang kaxtom koxkya ningle, homjen aku hia süifi bama, Jordan zongma hannopchi haxtok a chizing tswonle ahan.

³Jordan zongma handünchi haxtok a Mosa-e homjen anyi süifi ang ami wüi tom-hanle koxtsuakdaoa. (Jusep sixli hwom a homjen anyi ang ahan: Manasseh hia Efraim nyi.) Mosa-e Liwi hwom ang haxtok süntswon ma wom ang chitom. Itülüi hwome hwom ngwotnui ang tingnubu kop, ikhato hwom ang osu-maihu hia chunbue fumtsüt angkya onuibu tüikya.

⁵Israel khünaknue haxtok JOWANPAe Mosa ang fakya kaxtom lailaile ahanle lax.

⁶Nyixta Jihusua hato Gilgal ma Judah homjen angkya khünakbu ngui. Hwom khama mixsün tuita, Jefuneh sasün Kaleb, Ken nok-e akaxle thüi: “Kadesh Barnia ma tüipongma JOWAN dapa Mosa makhange künyi bama JOWANPAe chemle akaxkya dai, ija nange awan ngotüi angpu.

⁷Kadesh Barnia makhange ija haxtok to zyet ang Mosa-e tsanle akat pongma ku zanglao 40 changkya. Kue chix hato otsingtomtata kax wünle wang.

⁸Ikoxlechu ku füi tomle paokya khünakbue kem khünaknu aza. Ikoxlechu kue mongong thomkya füi JOWANPA ku Zang kax ma lax.

⁹Kue ile mokkya khoma, Mosa-e, ku tamchu kusu-kusa hwome, kue tingle aham toxdaokya haxtok ma kwom süntswon tüi angkya hex-ole tsaosax.

¹⁰Ikoxle hulax, athax chemle changpuix. JOWANPAe Mosa füi ija kax akax füima athax zanglao 45 nguile hüidaoa. Ija a Israel khünaknue sak-hax akaile le ngopongma changkya. JOWANPAe chix tsaosüt lailaile athax kople ku ozün ma tsünlole ngo ang tompu. Ku to hulax! Athax ku zanglao 85 nguidaoa.

¹¹Anyixchu ku ma Mosa-e tsanle apao pongma tüikya janzüi otya ma wüi tüipu. Athaxchu ku zan to kahax thüichu chichangba tütali mok-hax thüikoxchu moküile tsakle wüi ngotüipu.

¹²Jangchangba athaxpi, ku füikya khünakbu hia kue ija kaxwün wangpongma JOWANPAe koxüihex-ole tsaosaxdaokya haxhua chikao haxtok ku ang laxhüi. Ipongma kwome nang hama Anakim le tomchong-hualo li, tüpong-tüpong tütle tingnu pan zailaxle tüile le apuapu. JOWANPA wüi ku füi ngohüi, ilaxle JOWANPA kax lailaile kue ibu jwonle apaoüi.”

¹³Jihusua-e Jefuneh sasün Kaleb to mohiman ilaxle chix tingtok ang lax ang Hebron tingnu kox.

¹⁴Hebron a anyixchu Ken nok Jefuneh sasün Kaleb su-sabu chak ma wüi tüitan. Chixe mongong tüikya füi JOWANPA, Israel nok Zang kax ma laxle tüikya khoma ija mohiman atak.

¹⁵Ija khoma Hebron ang a Arba tingnu le nyakkya (Arba a Anakim nok khama süchongkya). Ifüima ija haxtok ma tumüi-lomkhaole hüi.