Read Wancho Naga Jihusua 17 Bible Online

Jihusua 17 - Wancho Naga bible

Jihusua 17

¹Jordan shuanu hannopchi kao haxtok jongtakha Jusep sasün tüichongpa Manasseh su-sa hwom haxtok ang kox. Gilid hopa Makir a Manasseh hosu tüichongpa jao. Chix a mixtsak naomüi tuita changhupu, ikhoma Gilid hia Bashan, Jordan zongma handünchi haxtok chix ang kox.

²Jordan shuanu hannopchi kao haxtok a Manasseh haxnu-homsabu ibibi ang ahanle kox: Abiezar, Helek, Asriel, Shekem, Hefar, üntoxle Shemida. Jusep sasün Manasseh makhange lüka züjen hüikya ibu changkya. Hwom a konu tüichongbu changkya.

³Zelofehad a Hefar sasün, chix a Gilid sasün, chix a Makir sasün, chix a Manasseh sasün ikoxle chix ma lüka miktsang chitüi, shekoko wüi lai. Hwom mün a Mahlah, Noa, Hoglah, Milkah, ilaxle Tirzah, hwom bibi.

⁴Hwom a nguapa Eliazar hia Nun sasün Jihusua üntoxle mama Israel nok lompabu hato ngui ilaxle thüi: “JOWANPAe Mosa ang, kwome tamchu kwom füikya haxnu-homsa lükabu füi haxtok tomwüi kop angkya kaxtom koxle toxpu.” Ikhoma JOWANPAe kaxtom koxle tüikya ningle, hwom füikya haxnu-homsa lükabu füi tomwüile hwom angchu haxsüt tom-hanle kox.

⁵Ikhoma Jordan zongma handünchi kao ma Manasseh-e Gilid hia Bashan to bole haxtok thombün kop.

⁶Chemthüikoxle, chix sixli shekodabu chang koxlechu hwome chuwüi lükabu füi tomwüi ma haxsütsütle kopkoxle, Gilid haxtok a Manasseh su-sa mamabu tüile ngokyabu ang kox.

⁷Manasseh longzie Shekem zongma handünchi kao Ashar makhange Mikmethath alop. Imakhange longzi shuathong chito kwonle Entapuah khünaknu womle le.

⁸Tappuah akhople tüikya haxtok Manasseh kux changkya, ikoxlechu longzipong ma tüikya Tappuah tinglong a Efraim su-sa hwom kux ang chang.

⁹Ija longzi Kanah shuasa fole ju. Ija shuasa zongma shuathongchi ma tüikya tingnubu a Efraim kux, ikoxle haxsüt a Manasseh haxsüt changhupu. Manasseh haxsüt longzi ija shuasa fole shuakux chito dongle Mediterenian Tinu ma ashuk.

¹⁰Efraim a shuathong chikao ma tüikya, ikoxle Manasseh a shuakuxchi kao ma tüikya. Mediterenian Tinu a hokhi hannopchi longzipong. Ashar a shuakuxchi hia hannopchi kao ajale tüikya, ilaxle Isakar a shuakuxchi hia handünchi kao ajale tüikya.

¹¹Isakar hia Ashar nyi haxsüt mong ma, Manasseh-e Beth Shan hia Ibleam nyi hwom tinglongbu füi tomle, Tinu kax ma tüikya Dor, Endor, Tanak, Megido iboma akhople tüikya tinglongbu, chix haxsüt ang kop.

¹²Ikoxlechu Manasseh hwome tingnu ibu na tüile ngokya khünakbu jwonle apao ang chitho, ikhoma Kanan nokbu hwom füi tomwüile ngole hüi.

¹³Israel khünaknu tsak-zongle chang füima ngaxchu hwome Kanan nok jwonle chiapao ikoxle hwom da ang laxle atsangle mwot amokle thom.

¹⁴Jusep su-sa hwome Jihusua ang thüi: “Nange kwom ang haxsüt jongtakha wüi büthüikoxle koxpu? JOWANPAe mohiman koxle kwom a khünak huanuma tüipu.”

¹⁵Jihusua-e lan: “Hünzom khünak huanuma jangtüi ilaxle haxhua nok Efraim haxtok hünzom zongto huanuma janghix, Peri hia Refaim haxtok to paolaxle ikhato hünzome jansuma ling dakle hünzom haxtok akhao lax.”

¹⁶Hwome lan: “Haxhuachi a kwom zongto ojao münngui ikoxlechu haxsha angkya Kanan nok ma man-kanlin jan füi zingkyabu tüihule. Beth Shan hia ija akhople tüikya tinglongbu ma ngokya tamchu Jezril haxsha ma ngokya pangwüi ma tüile.”

¹⁷Jihusua-e Efraim hia Hannop Manasseh füi akax: “Changle, hünzom khünak huak müimamale tüile, ilaxle hünzom ma janzüi tüile. Hünzome haxsüt thom tuita to nüile kop angkya changle.

¹⁸Haxhua nokbu hünzom kux wüi changüi. Ija faonu chang koxlechu hünzome ija atsao koxle ichikao makhange ata-chikao alople ija ma haxsüt ang laxüi. Kanan nok bama, hünzome hwom jwonle apao angkya changle. Hwom ma jan füi zingkya man-kanlinbu tüile le hwom thua taxza.”