Read Wancho Naga Jihusua 22 Bible Online

Jihusua 22 - Wancho Naga bible

Jihusua 22

¹Reuben, Gad hia Handün Manasseh homjenbu Jihusua-e komle sele asox.

²Chixe hwom ang thüi: “JOWAN dapa Mosa makhange hünzom ang fakya kaxtom pangwüi hünzome mokle hüidaoa, ilaxle hünzome ku kaxtombu kax ma laxle hüidaoa.

³Ibibi bama hünzome matüi manao Israel khünaknu ojao danle chitox. Tüle khünzaikya füi hünzome JOWANPA hünzom Zang kax ma laxle hüidaoa.

⁴Athaxpi chixe tsaokya jaojaole hünzome mamix Israel khünaknuechu mongsom atakle changdaoa. Idaile, athaxpi, JOWAN dapa Mosa-e hünzom ang koxle toxkya haxtok, Jordan shuanu zongma handünchi, ojongkha hünzome ma haxsüt sungdün ang laxpuix, ikhato chatlax.

⁵Mosa-e hünzom ang koxle toxkya wanlom: ‘JOWANPA hünzom Zang to mongkünkox, chix mongtex mokkox, chix kaxtombu kax ma laxkox, chix to mongong tüile ngokox, ilaxle hünzom kün-mong hia chasa pangnu makhange chix thothakox; le tüikyabu kax ma laxle-ole azongkox.’”

⁶Jihusua-e hwom chix mohiman füi tamchu ibibi tsai-kax füi ma chaxwan to chat ang tom: “Hünzom ma hom to tüle ahak-aluale chatüi, tsom-pom, khop hia hun, wi, jan, ilaxle nyizabu tüle koplaxle hom to nguiüi. Hünzome zan-nok angkya kopkyabu mamix hwom füi tom-hanle laxkox.” Ifüima hwom ma hom to chat. Mosa-e Manasseh homjen süifi ang haxsüt Jordan shuanu zongma handünchi kao koxpu, ikoxle mama süifi tüikyabu ang Jihusua-e Jordan shuanu zongma hannopchi kao, mama Israel homjenbu füi asüile koxpu.

⁹Idaile Reuben homjen, Gad homjen hia Manasseh homjen süifi mahax mahom to chat. Hwome ma füikya Israel khünaknu Shiloh ma danle tox ilaxle hwom a ma chaxwan to chat ang achex. Hwom haxtok ang Gilid nok ngole hüikya kha changkya ikoxle Mosa makhange JOWANPA kaxtom hüikya lailaile hwome ija haxtok a makux ang kop.

¹⁰Chemtue Reuben, Gad hia Handün Manasseh homjenbu Galiloth alople chatpuix, ija a Jordan shuanu zongma hannop chito wüi, hwome ikhato shuakax ma tüle osün müikya tö-tsap tuita zing.

¹¹Israel nok mamabu ang thüi: “Apalax! Reuben, Gad hia Handün Manasseh homjenbue Galiloth ma tö-tsap tuita zingdao; ija a Jordan shuakax kemchi kao ma changle!”

¹²Chemtue mama Israel khünakbue ija zangwün atatle lax, hwom pangwüi Shiloh ma asox ilaxle handünchi Israel nokbu füi azan ang achwon.

¹³Ifüima Israel nokbue nguapa Eliazar sasün Finehas, Gilid nok to, Reuben, Gad hia Handün Manasseh homjenbu hato akat.

¹⁴Chix füi tomle lompa hwom mixsün bün ka. Hwom a hannopchi homjen fo tokya mixhuak tuipong ilaxle tuita a hwom khama konu tüichong tuita.

¹⁵Hwom Gilid chaxwan to ngui, ilaxle Reuben, Gad hia Handün Manasseh homjen khünakbu füi apong,

¹⁶ilaxle JOWANPA khünaknu pangnu mün ma hwome ibu ang thüi: “Hünzome Israel Zang zongto chimüikya ochax mwot büthüikoxle mokpu? Hünzome ija tö-tsap hünzom tata hanpak ang zailaxle JOWANPA zan to kakya ang changdaoa! Athaxpi hünzome chix man münto changa!

¹⁷JOWANPAe chix khünaknubu to okak-olak füi sikangün pongkya Peor angkya kem ochax texle ataklax! Keme anyix kople ikhokho ma sikngün apongle hüipu. Ebibi ochax okho münnguile hia?

¹⁸Hünzome chix man taxtongohax le hia? Anyix hünzome chix zan to kale jangchang, ngainyix Israel nok pangwüie sikngün apong angkya changle.

¹⁹Jo, athaxpi, hünzom haxtok a chix to shwom ang asukya münchangle hünzome jangtex thüiningle, JOWANPA haxtok, chix Nyihom tüikya khato oman. Kwom khato hünzomechu ma haxsüt koplax. Ikoxle JOWANPA kem Zang ang tüikya tö-tsap boma mama tö-tsap tamzing laxle hünzome JOWANPA füi alün ang taxthüi: chichangba ija khoma kwomchi makhange hünzom to tsale hyet lai ang taxtom.

²⁰Zerah sasün Akhan-e amüt-toxdao-o lükya tuina tüikya makhange kax ma chilaxle ochax lyen; ikhokho ma Israel khünaknue sikngün apongkya texle ataklax. Ija chix ochax khoma Akhan chix tata ahuakle zikya chichang.”

²¹Reuben, gad hia Handün Manasseh homjen khünakbue hannopchi homjen lompabu kax to lan:

²²“Pangnu to lütkya a Zang tix changpu! Chix a JOWANPA changpu! Pangnu to lütkya a Zang! Chix a JOWANPA changpu! Kwome büthüikoxle mokpuix chixe awan ngopu, ilaxle kwomchi tokhange hünzomechu awanle kopkoxle müiüile texpu! Kwome chix to mongong chithomle chix zan to kale jangchang thüiningle, kwom jaojao ngo ang taxtom!

²³Kwome JOWANPA kax ma chilax homtoxle kwom lualua to kwome tö-tsap süile zinglaxle tö zokle ashun chichangba ija saxziak tö hia notom-tusüi tö kox ang jangtwon; JOWANPA chix jaojaoe kwom to sikangünle naxchang kox.

²⁴‘Hünzome JOWANPA, Israel nok Zang füi chemmok angkya tüipu?

²⁵Chixe kwom tamchu hünzom Reuben hia Gad, kem bama longzi ang Jordan shuanu zingdaoa. Hünzome JOWANPA füi chem mok angkyachu müntüi’ le hünzom su-sabue kwom su-sa hwom füi nak-akaxle zalaxle kwome ile mokpu. Füichima hünzom su-sabue kwomsu-kwomsa hwom ang JOWANPA to shwomkya chu abaxle wüi changtüi.

²⁶Ikhoma kwome tö-tsap tuita zingpu, ikoxle ima zokle tö kox angle chichangle

²⁷hünzom hia kwom, kem bama tamchu kem füima füichi-naoli hwom tsün thoma, kwome JOWANPA to chix Nyihom ma zokle ashunle tö koxkya hia notom-tusüi töbu koxle otsao nui ma JOWANPA to shwomkya changtomtapu lükya münwan tuita ang naxngolax ang tamchu hünzom tokfüi ma, füisu füisabue kwom ang JOWANPA füi tüta mok angkyachu müntüile akax angkya kaxlom naxtsyen ang mokpu.

²⁸Ile namchang thünba, ‘Hulax! Kwom pupa hwome ngaxchu JOWANPA tö-tsap lailaile wüi zingpu, le lanüimale ija ma chemchem zokle ashunle tö koxüile münchang, ikoxle hünzom hia kwom khünakbu bama tuita münwan ang naxngonui’ le kwome mokpu.

²⁹Kwome JOWANPA füi chemtuechu münalün chichangba zokle ashunkya tö hia saxziak tö chichangba mama töbu koxle tö-tsap zinglaxle kwome chix mantokya danüile münchang. JOWANPA Ngwotnui Nyihom ma tüikya boma JOWANPA kem Zang hanpak ang mama tö-tsap tam-münzing.”

³⁰Nguapa Finehas hia Hannopchi Israel nok lompabu hwom mixsün büne Reuben, Gad hia Handün Manasseh hwome akaxkya kax komkaile atatle lax, ilaxle hwom ang mongzom müi.

³¹Nguapa Finehas, Eliazar sasün-e hwom ang thüi: “Athax kwome tsingle laxdaoa, Zang a kem füi tüile. Hünzome chix füi chialün, idaile hünzom Israel khünak to JOWANPAe sikangünse chak tokya khosünle changdaoa.”

³²Ifüima Finehas hia lompabue Reuben hia Gad khünaknu Gilid haxtok to dantox ilaxle hwom, ma khünaknu Israel nok hato Kanan haxtok to chat ilaxle hwom hato ibu tsaiwün-kaxwün wang.

³³Israel khünaknu pangnusa ang mongzom müi ilaxle JOWANPA achuak. Ifüima hwome Reuben hia Gad hwom ngokya haxtok amale hwome tingtakle zankat mowünkya ojao chialaile zak.

³⁴Reuben hia Gad hwom noke thüi: “Ija tö-tsap a kem noknusa hanpakma JOWANPA, chix a Zang changpule ahokya münwan changpu.” Idaile hwome ija ang “Kaxkhi”, le nyak.