Read Wancho Naga Jihusua 24 Bible Online

Jihusua 24 - Wancho Naga bible

Jihusua 24

¹Jihusua-e Shekem ma Israel nok pangwüi sele asox. Chixe Israel nok tüichong mixmüibu, lompabu, kaxfünpabu tamchu nguakax-wangkhobu pangwüi se, ilaxle ibu JOWANPA ngwotnui to ngui.

²Jihusua-e khünaknu pangnu ang thüi: “Ija a JOWANPA Israel nok Zang-e akaxkya kax changle: ‘Kaitanto wüi hünpu hünpa hwom eufrats shuanu talaxle ngokya ilaxle hwome mixnok baozangbu to shwomle ngokya. Ibu pupa hwom khama mixsün tuita Terah le amünkya tüikya. Chix a Abraham hia Nahor hokhi hopa changkya.

³Ifüima hünpu Abraham Eufrat shuanu tachi haxtok tokya kue zünle lax üntoxle Kanan haxtok bakle faole aham ang tom. Kue chix ang osix-oli müimamale kox. Kue chix ang Isak kox.

⁴Ilaxle Isak ang kue Jakop hia Esau nyi kox. Kue Esau ang Edom angkya haxhua chikao haxtok chix haxsüt ang kox, ikoxle hünzom putong Jakop hia sasün hwom Ijip to ju.

⁵Ofüima kue Mosa hia Arun nyi apao, ilaxle kue Ijip nok haxtok ma tüle sikngün apüile kox, ikoxlechu kue hünzom laile pao ang tom;

⁶Kue hünzom putong hwom Ijip haxtok tokya laile paopu ikoxle man hia man-kanlinbu füi Ijip nok süpahibue hwom achua.

⁷Ikoxlechu hünzom putong hwome Tütsak Tinu alopkya füi tomle hwome ku hato akhongle changpu, ilaxle Ijip nok hia hwom nyi bama kue zangnak alai, kue ija tinu Ijip nok ding to thuple hüi ang tom ilaxle hwom a ti ma khangle zi ang tom. Kue Ijip nok to chemle mokdaopuix hünzome awan ngopu. “‘Hünzom sak-hax to okuilole ngohom.

⁸Ifüima kue hünzom pangwüi Amor nok haxtok to apüipu. Amor nok a Jordan shuanu zongma handünchi ma tüikya. Hwom hünzom füi azan ikoxlechu kue hwom towüi anao ang tom. Hünzome hwom haxtok lax, ilaxle hünzom hüikya füi tomle kue hwom amüt.

⁹Ifüima Moab nok wanghom, wanghompa Balak, Zippor sasün, chix hünzom füi azan. Chixe Beor sasün Balam hato kaxho akatle hünzom to thuakzomle chang angkya kaxkox.

¹⁰Ikoxlechu kue Balam kax to chiapa, ikhoma chixe hünzom to mohiman; ile kue Balak chak tokya hünzom azün.

¹¹Hünzome Jordan shuanu tale lelaxle Jeriko tingnu to ngui. Jeriko nok chuwüi Amor nok, Kanan nok, Hip nok, Hit nok, Peri nok, Girga nok, Jebu nok, ibu lailaile hünzom füi azan ang lai. Ikoxle ibu pangnusa to kue hünzom ang lüt ang tom.

¹²Hünzom hüile ngopongma, Amor nok wanghom anyi jwonle apao angkya kuxma hwom chabüt-lasün ang koxpu. Ija to hünzom changlo hia hapnubu füi chakmok angkya chemchu chitüi.

¹³Chemthüikoxle hünzome thomo-manzaile machangkya haxtok tamchu ojao hünzome chizingkya tingnubu kue hünzom ang koxpu. Athax hünzom ikhato ngo ang koppu, ilaxle hünzome otuechu chiküitoxkya zu angkya grep tamchu chithwon toxkya pün angkya olip khaile sax ang koppu.’”

¹⁴Jihusua-e chizakle akaxle thüi: “Idaile athaxpi, JOWANPA achuak-achenle changkox ilaxle künkox-mongkoxle tamchu mongong tüikya füi chix thothale changkox. Mesopotamia hia Ijip haxtok to hünzom putong hwome shwomle ngokya baozangbu füi atsaiün, ikoxle JOWANPA, chix tata thothale changlax.

¹⁵Hünzome chix thothase le chitsu, hünzome opupu thothaüihex, ija anyix wüi wünle tsuaklax; hünzom pupa hwome Mesopotamia nok to shwomle hüikya baozangbu to shwomüi hia chichangba athax kem ngole tüikya Amor noke shwomkya baozangbu to shomüi. Kwom homkha tamchu ku, kwome a JOWANPA thotha lüwüi ngoüi.”

¹⁶Khünaknue lan: “Kwome mix baozangbu to shwomüi ma otuechu JOWANPA danle müntoxüi!

¹⁷JOWANPA kem Zang-e tix kem pupa hwom tamchu kem Ijip nok to da ang ngokya danle apüipu, ilaxle chixe mokkya ohünotün mwotbu keme ngünle hüipu. Keme kaile toxdaokya jat-libu haxtok akaile le pongma chixe kem ziakople thompu.

¹⁸Ija haxtok to kem nguile changpongma, ikhama ngole hüikya Amor nok pangwüi JOWANPAe jwonle apaopu. Idaile kwome chuwüi JOWANPA thowüi thaüi; chix a kwom Zang changpu.”

¹⁹Jihusua-e khünaknu ang thüi: “Ikoxlechu hünzome JOWANPA thothale chang ang chitho tüilax. Chix a otsao Zang ilaxle chixe hünzom thaikya ochaxbu alak ang chithoüi. Chixe chix zan to kakyabu füi adu ang müntho,

²⁰ilaxle mixnok baozangbu thothale changüi ma hünzome chix danle toxkoxle, chix a hünzom zan to kaüi ilaxle hünzom to sikangünüi. Chix hünzom zongto müile hüidaobachu chixe hünzom max ang tomüi.”

²¹Khünaknue Jihusua ang thüi: “Ile münchangüi! Kwome JOWANPA thowüi thaüi.”

²²Jihusua-e hwom ang thüi: “Hünzome JOWANPA thotha lüwüi changüihex-ole zünle kopkya zangwün bama mikngün kaxkhi angchu hünzom wüi alüile changpu.” Hwome lan: “Changle, kwom wüi alüile ma hanpakma mikngün kaxkhi changpu.”

²³Ikoxle Jihusua-e thüi: “Jangchangthüiba hünzom ma tüikya mixnok baozangbu füi atsaiün ilaxle JOWANPA, Israel nok Zang hato hünzom ang mong chatlax.”

²⁴Khünaknue Jihusua ang thüi: “Kwome JOWANPA kwom Zang thothale changüi. Kwome chix kaxtombu kax ma laxle tüiüi.”

²⁵Ikhoma, ija nyix, Jihusua-e khünaknu hanpak ang tsaotsüt tuita zing, ilaxle Shekem ma chixe hwom ang wanlombu, hwome to le chang angkya hanpakma kox.

²⁶Jihusua-e ibu kaxtom Zang Wanlom laipex ma zale kop. Ifüima chixe longnu tuita lax ilaxle Ok pünnu fang ma JOWANPA ngwotnui ma ija küile ajong.

²⁷Chixe khünaknu pangwüi ang thüi: “Ija longnu a kem hanpakma tuita kaxkhi ang ngonuiüi. Ija longnue JOWANPAe kem füi akaxkya zangwün komkaile atatle laxdaoa. Ikhoma ija a, hünzom chix zan to kale chichang angkya hanpakma, hünzom hanpak ang kaxkhi ang ngonuiüi.”

²⁸Ifüima Jihusua-e khünaknu mahaxtok-tok to chat ang tom.

²⁹Ifüima, Nun sasün Jihusua, tuita JOWAN dapa zanglao 110 nguikya ma zile pao.

³⁰Hwome chix, chix haxtok, Gash Haxnu zongma shuakuxchi ma tüikya haxhua nok Efraim ma tüikya Timnath Serah ma akhün.

³¹Jihusua ozün ma ngokya kople Israel noke JOWANPA thothale ngo. Chix tokfüimachu, JOWANPAe Israel nok hanpakma mokle hüidaokyabu ngün ang kopkya lompabu bakle mazi-mazile hwome ile wüi mokle ngo.

³²Israel khünaknue Ijip nok tokya Jusep mang wünkya chuwüi Shekem ma akhün. Chix za khomkya haxtok a Jakop-e Shekem hopa Hamor ma khop ngunkhix 100 koxlaxle shakkya kha changle. Ija haxtok a Jusep su-sa hwome lax.

³³Arun sasün Eliazar zi ilaxle chix a Gibeah ma akhün. Gibeah a Efraim haxhua nok ma tingnu tuita. Ikha chixe sasün Finehas ang koxle tox.