Read Wancho Naga Jihusua 5 Bible Online

Jihusua 5 - Wancho Naga bible

Jihusua 5

¹Jordan shuanu zongma hannopchi angkya Amor nok wanghom pangnusae tamchu Mediterenian tinu achole tüikya Kanan nok wanghom pangnusae, Israel khünaknu bakle machang machangle JOWANPAe Jordan shuanu zop ang koxputale atat ang kop. Israel nok hüikya khoma hwom tüle abüt-aban ilaxle monghixle chang.

²Ifüima JOWANPAe Jihusua ang thüi: “Daxcha makhange bit-sa zinglax ilaxle Israel khünakbu ang anaole chuwüi Khwonzüt-Zom zingle laxkox.”

³Idaile JOWANPA kaxtom ningle Jihusua-e mok ilaxle Khwonzüt-Zomzing Haxkho le nyakkya ma khama Israel nok ang Khwonzüt-Zom zingle kox.

⁴Chemtue Israel khünakbue Ijip nok dantoxpuix, lükabu hwom pangwüi ang Khwonzüt-Zom zing tsuaklaxle tüikya. Ikoxlechu khünaknue zanglao punyi sak-hax faonu akaile aham, ipongma lüka naosom owa angchu Khwonzüt-Zom zingle chikox. Ikoxlechu, ija hanpak oshuk chito, hwome Ijip toxpongma zankat sangle tüikyabu, hwome JOWANPA kax ma chilaxle tüikya khoma pangwüi zile paodaoa. Chixe tsaotsütdaokya lailaile, hwom putong hwom ang tsaokya, tüle ahak-aluale tamchu haxzaoe awangle tüikya haxtok hwome ngün ang chikox.

⁷Ibu khünak su-sabu ang Khwonzüt-Zom zingle machang ilaxle ija tsünzün thom ang Jihusua-e ija zomzingle kox.

⁸Khwonzüt-Zomzing mwot tsuakkya füima mak mamüi-mamüile khünaknu pom ma nui.

⁹JOWANPAe Jihusua ang thüi: “Anyix kue Ijip nok to da ang ngokya thajao-wünhai awütle fapu.” Ikhoma ija onui ang Gilgal le nyak, anyix kople ikha ang ile wüi nyakle.

¹⁰Israel khünaknu Gilgal ma pomzai laxle ngopongma, ija a Jeriko zui angkya haxsha ma, hwome ija lyetkua nyixbün ali lükya hansong ma Kaitox Pangpwon sax.

¹¹Ifüinyix a hwome Kanan haxtok ma münkya puamün osütwang nyix changle; akokya sax üntoxle twonkhax chiawonkya an saxkya nyix.

¹²Ifüima mama dütle ngokya zak, ilaxle Israel noke tamchatle sax ang chikop. Ija makhange hwome Kanan haxtok ma manzaile alaikya süt sax.

¹³Jeriko hato soxle hüipongma Jihusua-e allele chix tunthoma changlo tuita koplaxle mixsün tuita ajongle ngokya ngünle lax. Chix hato hüilaxle Jihusua-e atüi: “Nang kwom kha angkya süpahi tuita hia zanpa hex?”

¹⁴Ija mixsüne lan: “Ku a ija opupuchu münchang! Ku a ikhama JOWANPA süpahi lompa tuita changpu.” Jihusua-e shwomle chix chitong to nguakle hüilaxle thüi: “Ku a nang dapa changpu, alixachong. Nange ku füi chem wünse tüipu?”

¹⁵Ijama ija JOWANPA süpahi lompa-e thüi: “Nang chisox sukdao; nang a otsao haxtok ma ajongle ngopu.” Ilaxle chix füi chemle akaxpuix, ile mok.