Read Wancho Naga Jihusua 7 Bible Online

Jihusua 7 - Wancho Naga bible

Jihusua 7

¹JOWANPAe Israel khünakbu ang Jeriko tingnu angkya amüt angkya oli chemchu taxlax-ole thüikya kaxtom kax ma hwome chilax. Akhan le amünkya mixsün tuitae ija kaxte, ikhoma JOWANPA ang Israel nok füi tüle mongtsik-mongma. (Akhan a Karmi sasün Zabdi hosu Judah homjen Zerah saxthom angkya changkya.)

²Bethawen zui, Bethel zongma handünchikao ma tüikya Ai tingnu to zyetle hu angkya hanpakma Jihusua-e Jeriko makhange khünak züizüi tsanle akat. Hwome zyetle hutsuak füima,

³hwom Jihusua hato kaxwün wangle thüi: “Ai tingnu tingtak ang pangwüi chika koxchu müiüi. Hajat anyi hia azom tokhange akatlax. Ikhato azan ang süpahi bakle taxkatngozi; ija a aluile chongkya tingnu münchang.”

⁴Ikhoma, Israel khünak hajat azom tukuxle tingtakle sing, ikoxle hwom mix alüile zantho to zikle pao angkya lai.

⁵Ai tingnu angkya khünake hwom panja makhange shebarim kople achuale achatlaxle, Israel khünaknu haxkho tokya zikle julaxle zaktho-lehale nale maxngo pongma hwome khünak mixhuak 36 to lünle lang. Ifüima Israel khünaknu ang mongchen chitüile zale ashwot.

⁶Jihusua hia Israel nok lompabue manyi-maza akyet, ma alüile JOWANPA Tsaotsüt Suak tuntho to hax to tswonle awüt, ilaxle ikhama hansong alople, khang ma labu awangle koplaxle, ma mongma ahole nui.

⁷Ilaxle Jihusua-e thüi: “Khüthak Zang! Nange kwom Jordan shuanu atale jao omalax ang apüikya? Amor nok chak to kox ang apüikya hia? Kwom amüt ang apüikya hia? Kwom a Jordan shuanu tachi towüi ngo ang tomlax angpu.

⁸O JOWANPA, Israel nok, zan-noke jwonle apaoputale kue chemwün angkya tüi?

⁹Kanan nok hia ija haxtok ma tüipupu pangnusae ija zing atatüi. Hwome kwom akhople koplaxle kwom pangwüi langle awüt angkya changle! Ifüima nange ma münchong-ngampai khosün ang chem moklaxüi?”

¹⁰JOWANPAe Jihusua ang thüi: “Zolax! Nang ile haxkha to büthüikoxle jiple ngopu?

¹¹Israel noke ochax lyenle changdaoa! Kue hwom ang fakya kaxtom kax ma chilaxle, hwom ang amütdao-o e thüikya mwot-kat tütali hwome tüidaoa. Hwome ibu ahux, ibu bama kaxthai akax, ilaxle ibu matüi mana füi tomle thomdaoa.

¹²Ikhoma Israel nok zan tunthoma shingmongle ajong ang müntho. Ibu thoto hwom paole, büthüikoxle athaxpi hwom jaojao max angkya thama ma tüingo koxle! Kue taxlax-ole thüikya mwot-kat laxkya ma-amüt tanto ku nang füi ngo ang müntho!

¹³Zolax! Khünaknu atsaolax ilaxle hwom ku hato hüi ang achwon ang tomkox. Hwom füi ngainop wüi achwon angkya kax laxkox, chemthüikoxle ku, Israel nok Zang-e ija kax akax angkya tüile: ‘Israel khünaknu, kue hünzom ang amütdao-ole thüikya tütali bwot-ba hünzome koplaxle tüile! Hünzome ija awütle ma-atsao tanto hünzom zan tuntho to ajong ang müntho!’

¹⁴Idaile ngainop swomsae hwom homjen-homjen ma süile ku pomtho to apüi angkya changle le akaxkox. Ifüima kue opupu homjen süile kopüihex, hwom saxthom-saxthom ma süile thüntho chito hüi ang tomüi. Owa kako kue zünle kopüihex, hwom a mixhuak ma süile ku hato hüi ang tomüi.

¹⁵Kue taxlax-ole thüikya tütali owama bangpuix, chix a kako-homkha hia chix tuina pangnusa füi afomle zokle ashunüi, chemthüikoxle chixe Israel nok hato müimamakya thajao apüidaoa ilaxle ku Tsaotsüt amale changdaoa.”

¹⁶Ngainop ningle Jihusua-e Israel nok homjen-homjen ma süile tuntho chito apüi, ilaxle Judah homjen zünle kop.

¹⁷Chixe Judah homjen saxthom-saxthom ma hüi ang tom, ilaxle Zerah saxthom zünle kop. Ifüima chixe Zerah saxthom kako-kako ma süile hüi ang tom, ilaxle Zabdi homkha zünle kop.

¹⁸Ifüima chixe Zabdi homkha angkya khünak mixhuak-mixhuak ma süile hüi ang tom, ilaxle Zabdi hosu, Karmi sasün Akhan zünle kop.

¹⁹Jihusua-e chix füi akax: “Ku sasün, ikhama JOWANPA, Israel nok Zang tunthoma otsingtsing ngailax. Nange chem mokdaopuix, ija ku hama ngaihüi. Nange ku miksho ma pyen ang taxazong.”

²⁰Akhan-e lan: “Ija changkox-a. Kue JOWANPA, Israel nok Zang tunthoma ochax lyendaoa, ilaxle kue mokkya a ija changpu.

²¹Kwome tingtakle kopkya tuina khama kue Babilon nok nyimüi, khopjan tuak anyi tukux ilaxle hun dwon tuak ta tukux, ku mik-hu ma tüle mikzalole ngünlaxle, kue laxsele osingkya khoma ibu kople thomkoxa. Hünzome ibu ku nyihom mong ma othongchi ma khop-jan sholaxle akhünle thomkya ataküi.”

²²Ikhoma Jihusua-e khünak züita tsanle apao ilaxle hwome ibu lün ma womdaokya mwot-kat otsingtomtata ma, othong ma khop-jan sholaxle hax to akhünle thomkya atak.

²³Hwome ibu nyihom mong angkya alai, ilaxle Jihusua hia Israel nok lompabu tuntho to apüi, ilaxle ibu pangwüi JOWANPA tunthoma dan.

²⁴Jihusua tamchu Israel khünaknu pangnue, Akhan füi tomle khop-jan, chun, chix nyihom, ilaxle chixtui-chixna komkaile kop, ilaxle hwome ibu pangwüi Tingtui haxsha to pao.

²⁵Jihusua-e atüi: “Nange kwom hato ipongkya thama büthüikoxle ngui ang tompu? Athax nang hato sikngün JOWANPAe apüiüi!” Khünaknu pangnusae Akhan long füi thuple lang, hwome chix homkha chu bakle thuple lang ilaxle hwom füi tomle tuinabu chu komkaile zokle ashun.

²⁶Hwome ibu ding ma thupkya long tüle atsongle athün, ija anyix kople tüingole. Ija khoma anyix kople ijakha ang Mikmüt Haxsha le nyakle tüile. Ifüima JOWANPA mongtsik dang.