Read Wancho Naga Jihusua 9 Bible Online

Jihusua 9 - Wancho Naga bible

Jihusua 9

¹Jordan shuanu zongma hannopchi angkya wanghombu: Haxhua nok, haxchithong nok, Mediterenian achole tüikya haxsha nok, shuakux chito Lebanon alople tüikya pangnusae, Israel noke pangnu to lütle hüikya zing atat; wanghom ibu a Hit nok, Amor nok, Kanan nok, Peri nok, Hip nok ilaxle Jebu nok wanghombu changkya.

²Hwom bibi pangwüi athütlaxle Jihusua hia Israel nok füi azan ang lai.

³Ikoxlechu Gibeon angkya khünaknu opang Hip nok changkya hex, hwome Jihusua-e Jeriko hia Ai nok to mokkya ozing atat,

⁴ilaxle hwome chix dyen angkya katzua lax. Hwome sütling hidaole afox üntoxle hwome hwom mantsakbu, müikhwon nyitsong otsyenbu hia grepti-ju shokya pe ozang füi hünzing.

⁵Hwome obui hia singdaokya chisoxbu hwom chabu ma soxle kop ilaxle nyitsyenbu awunlaxle, an ozan hia babün puadaokya onyabu laxlaxle,

⁶Gilgal angkya hwom pom to nguilaxle Jihusua hia Israel nok ang thüi: “Kwom a tsailo nok tokya nguipu, kwome hünzom füi pongsaxle muamüise tsupu.”

⁷Ikoxlechu Israel noke lan: “Kwome hünzom füi chemkhoma muamüile pongsax angkya tüipu? Owatsing hünzomchu tomzi nok wüi changtüilax.”

⁸Hwome Jihusua ang thüi: “Kwom a nang thotha ang nguipu.” Jihusua-e hwom ma atüi: “Hünzom a opang changkya? Hünzom a ojong tokya nguikya?”

⁹Izuma hwome chix ang ija pukax zex: “Alixachong, kwom a tüle tsailo nok tokya nguipu, chemthüikoxle kwome JOWANPA hünzom Zang bama atatle hüipu. Chixe Ijip nok to chempang ole mokpuix ibu kwome atat ang kople,

¹⁰ilaxle Jordan shuanu handünchi ma tüikya Amor nok, Heshbon angkya wanghompa Sihon hia Bashan angkya wanghompa Og, opang Ashtaroth ma ngopuix, hwom to hünzome mokkya pangwüi kwome atatpu.

¹¹Kwom chaxwan angkya lompabu hia khünaknue kwom ang sütling achwon laxle hünzom füi apong ang pao angkya kwom tsanpu. Hwome kwom ang nang füi muamüile chang angkya tamchu kwome nang thothale ngo angkya akaxdaoa.

¹²Kwom an to hulax. Kwome ija füi hom angkya laipongma okham ma tüikya. Ikoxle athax hulax! Athax an ija a zandaoa tamchu babün ngaxchu puale changdaoa.

¹³Chemtue kwome ija grepti-ju zingle changkya hex, ipongma nyitsong ibu a hozün changkya, ikoxle hulax! Athax ibu a büidaoa. Lomjang-sailo to ahamle hüikya kwom chisox hia nyi-za kyetdaoa.”

¹⁴Israel nokbue hwom angkya süt hidaole lax, ilaxle ija bama JOWANPA ma chitik-chisho.

¹⁵Jihusua-e Gibeon nok füi zuikhui hex-ole nokmüi zing ilaxle ibu hwom khato ngo ang tom. Israel nok lompabue hwom katzua otya ma thom angkya ibu pomtho ma tsaosaxle akax.

¹⁶Ija katzua tsuakle changkya nyix azom füima, Israel khünakbue hwom a tomzi nok angkya khünakbu changpule awanle lax.

¹⁷Ikhoma Israel khünakbu lomle paokoxle nyix azom füima ibu khünakbu ngokya tingnu; Gibeon, Kefirah, Beroth hia Kiriath Jearim tingnubu alop.

¹⁸Ikoxlechu Israel noke hwom chilang, chemthüikoxle hwom lompabue ibu füi JOWANPA, Israel nok Zang mün ma tsaosaxkya tüidao koxle. Ija bama noknusae lompabu to ngao,

¹⁹ikoxle hwome lan: “Kwome hwom füi JOWANPA, Israel nok Zang mün ma tsaosaxle changdaoa. Athax keme hwom to chakmok angkya müntüi.

²⁰Kwome tsaosaxdaokya khoma hwom kem khato ngo ang kox angkya wüi changle; ile chichang thüikoxle Zang-e kem to sikngün apong ang tomüi.

²¹Hwom a naxngokox, ikoxle hwome kem hanpakma hadün-tikhole changüi.” Ile hwom lompabue ile chang angkya olom apua.

²²Jihusua-e Gibeon nok chix hato apüi angkya kaxkox, ilaxle chixe hwom ma atüi: “Hünzom ikhato nuisox ma ngo üntoxle tsailo nok tokya nguipule kwom chemkhoma dyen?

²³Hünzome ile changkya khoma hünzom to thuakzomle changdaoa. Hünzom khünakbu a othuithuima da ang ngoüi ilaxle kwom zangshwomkya nui ma lax angkya hadün-tikhole chang angkya hünzom mwot ang changüi.”

²⁴Hwome lan: “Alixachong, changle, kwome ile mokdao ngüna, ikoxle ija a, JOWANPA hünzom Zang-e chix dapa Mosa füi kaxtom koxle, hünzom ang ibibi haxtok komkaile koxdaoa ilaxle hünzom nguile hüikya zuma ikhato ngole tüikya khünaknu pangwüi langle awüt angkya kaxzing atatkya khoma kwome ile mokpu. Chemthüikoxle kwom hünzom thua tüle zalaxle tamchu kwome ma mik max angkya thua zalaxle ile mokdaoa.

²⁵Athax kwom a nang chak fang ma tüile; nange chem sule le texpuix, kwom to ile hwonlax.”

²⁶Ikhoma Israel khünaknue ibu khünak chilangle ozün ma thom angkya hanpakma Jihusua hwome khose.

²⁷Ifüi tomle chixe hwom a da ang zing. Israel khünakbu tamchu zangshwom-hom hanpakma hadün-tikhole chang angkya mwot hwom ang kox. Anyix kople ibue ija mwot, JOWANPA chix to shwom-tö le chang ang zünle kopkya haxmik-longkho ma hwome ile wüi mokle hüile.