Read Wancho Naga 2 Thesalonika 1 Bible Online

2 Thesalonika 1 - Wancho Naga bible

2 Thesalonika 1

¹Pol, Sila hia Timothi hwom tokhange: Thesalonika müimüithom angkya khünaknu, opang Hopa Zang tamchu Jowanpa Jisu Khrista kux hex, hwom hato:

²Kem Hopa Zang hia Jowanpa Jisu Khrista-e hünzom ang chingcha tamchu mongsom naxfa.

³Kwomtüi kwomnaohom, othuithuima kwome hünzom hanpakma Zang ang münchong fa angkya changle. Ile mok angkya kwom zongma sukya mwot changle, chemthüikoxle mongong namwüi chongle hüile ilaxle hünzome tata to mongkünkya mong süchong süchongle chongle.

⁴Ikhoma kwom jao Zang müimüithom khato hünzom bama tsaichong-kaxbongpu.

⁵Ibu pangnu makhange Zang kaxfün sukya changle ilaxle ija khoma, chem bama hünzom sikngün le hüidao laxpuix, ija zangkangting bama hünzom asukya ang achangüi.

⁶Zange oja supuix ija moküi; hünzom sikngün ang tomkyabu hato Zange sikngün apüi koxüi;

⁷üntoxle sikngün apongkya ma hünzom ang hwom füi tomle nazak faüi. Zangkangting tokya Jowanpa Jisu Khrista tsakzong füikya chix kaxtaimixbu füi,

⁸tamchu chuale ngokya wün füi, Zang pongle chikopkyabu ilaxle Jowanpa Jisu bama wünkya Kaxho Müikya to chiongkyabu to sik angün ang nguikya zuma chixe ija moküi.

⁹Jowanpa womle tüikya üntoxle fuazangkya chix zong füi atsailaxle, tamchu chiashuk toxkya thama ma hwome sikngün apongüi,

¹⁰Ija a, chix khünaknu angkya fuazang kop ang üntoxle chix to ongkya chix khünakbu angkya achuak achenkya kop ang chix nguikya nyix nguiüi. Hünzom chuwüi hwom khama tüiüi, chemthüikoxle hwome akaxkya kaxho to hünzome ongdaoa.

¹¹Ikhoma kwome hünzom hanpakma jento zangjoppu. Chemle ngo ang chixe hünzom sele koplaxpuix, ija tsün hanpakma hünzom asule zing angkya bama hünzom hanpakma kwome kwom Zang to joppu.

¹²Ija ningle kem Jowanpa Jisu Khrista münechu hünzom tokhange fuazangkya ataküi üntoxle kem Zang tamchu Jowanpa Jisu Khrista chingcha tokhange kemechu chix angkya fuazang ataküi.