Read Wancho Naga 2 Thesalonika 3 Bible Online

2 Thesalonika 3 - Wancho Naga bible

2 Thesalonika 3

¹Oshuk ma tüinaohom, hünzom khato chemle changdaopuix, ilailaile Jowanpa kaxho thuithui le apukle le angkya üntoxle ija achuak achenle pongle kop angkya bama, kwom hanpakma zangjop hüi.

²Chisumüikya hia ochax khünakbu chak tokya Jowanpa-e kwom sünle kop angkya bama zangjop hüi; chemthüikoxle kaxho a noke pongle kopkya chichang.

³Ikoxlechu Jowanpa a chialekya Zang changle, ilaxle chixe hünzom ang tsakzong koxüi tamchu chisumüikya chak tokya hünzom khosünüi.

⁴Üntoxle Jowanpa-e kwom ang hünzom to mongong chalom tüi angkya fale, ilaxle kwome hünzom hama chem apuapuix, ija hünzome mokle ngole tamchu ija thuithui le mokle leüi le ojao mong chiaole kwome mongong thompu.

⁵Jowanpa mongkün tsingwankya süchongkya hato tamchu Khrista ang fakya adukya hato Jowanpa-e hünzom naxzun hüi.

⁶Kwom tüinaohom, kwome hwom ang adangle fadaokya olom chitokyabu tamchu zaxkak-fanale ngokya tüinaobu füi atsaile ngo angkya bama kem Jowanpa Jisu Khrista mün ma kwome hünzom ang kaxtom fapu.

⁷Hünzome chem mokdaopuix ija wüi mok angkya changpu le hünzome ipongmüile tsing ngopu. Kwom hünzom füi ngotanto zaxkak fana le chichang.

⁸Omün chifa homtoxle ngat to owawae fongkya kwome pongle chikop. Itülüi kwome mokpu üntoxle thangpu; hünzom opupu zong tochu kwom tuita thabakkya ang nakchang ünkox le kwome nak-hex ngai-hex mwot mokpu.

⁹Kwome ija, kwom to fong hüile thüi angkya olom müntüile mokkya chichang; kwome ija tuita hünzome anole kop angkya olom tuita ang naxchangle mokpu.

¹⁰Kwom hünzom füi tomle ngotanto, kwome hünzom füi akaxzaipu: “Mwot chimokkya mix ang sax angkya süt taxkox.”

¹¹Hünzom khama züizüi zaxkak-fanale ngokyabu tamchu mixsüt-mixmwot to poxlanle ngokyabu tüile le atatlaxle kwome ija kax akaxpu.

¹²Jowanpa Jisu mün ma kwome khünak ibu ang haxmüi zangmale ngo angkya tamchu ma wok tux ang mwot mokle chang angkya kaxtom fapu.

¹³Ikoxlechu tüinaohom, hünzom a müikya mwot mokkya ma najua angkya oli münchang.

¹⁴Kwome ija laiza makhange hünzom hato akatkya kaxho to chiong angkya mixchu tix tüikoxlax. Ile jangchang thüiba, chix to hule koplax, ifüima chix füi asax amokkya chemchu taxtüi, ikoxletix chixe thünzak kopüi.

¹⁵Bachutix chix to tuita zan changpu le hu angkya oli münchang; itülüi tüinao tuita ningle chix ang kaxkhün laxkox.

¹⁶Jowanpa, chix jaojao, owa kem mongsom otong hex, chixe othuithuima tamchu pangnu lom ma hünzom ang mongsom naxfa. Jowanpa hünzom pangnusa füi ngohüi.

¹⁷Ija a ku chak jaofüi zakya changle: Pol makhange salam. Ilele wüi laiza pangnu to kue sohi shingpu; kue ilele wüi zapu.

¹⁸Kem Jowanpa Jisu Khrista chingchajaja hünzom pangnusa füi ngohüi.