Read Wancho Naga 1 Timothi 3 Bible Online

1 Timothi 3 - Wancho Naga bible

1 Timothi 3

¹Owawae müimüithom ma lompa ang achangse jangtsu thüiba, sümüikya mwot moksele tsukya changpu le wünkya ija kax otsingtsing changpu.

²Müimüithom lompa tuita a thaikya kha chitüi le chang angkya oli: Chix a kakonu tuita wüi tüikoxle müiüi, tamchu tok-nga le chichang homtoxle malailai to akumathumkya ilaxle thutle saxmok ang awankya mix changkoxle müi angkya oli changle; chixe ma hom ma mixwün pongle kop angkya changle; chixe anwot-ano ang awan angkya changle;

³chix a tuita jutok saxngakya mix chichangba hyet lom mix ang chichangüi, jonai ma hia mongsom füikya mix ang achang angkya oli changle; chixe ngun syen to mongkünkya chitüi angkya oli changle;

⁴chixe ma kako müile apu-achang ang tho angkya tamchu pangnu lom ma wüi susabue chix chathua zale tüi angkya bama hwom züntsuak angkya changle.

⁵Chemthüikoxle khünak tuitae ma kako ngaxchu müile apu-achang ang chitho thüikoxle Zang müimüithom ning chemle apu-achang thoüi!

⁶Chix mongngam ma saxfo lwotkya chitüi angkya üntoxle bao ningle ahaile awütkya chitüi angkya kuxma, chix a mongong ma tsingju kamong le tüikoxle müiüi.

⁷Chix a tuita müimüithom ziamong tata ma chichangle kotok tochu khünaknue chathua zakya mix changkoxle müiüi, ikoxletix chix wünhaikya tamchu bao thwontsing ma mankya chitüiüi.

⁸Müimüithom ma fongmixbu machu müikya zanglom saikha tamchu mongkoxle saxmokkya tüi angkya oli changle; hwome ju aluile chilingüi tamchu ngun-syen to osingkya chitüi angkya changle;

⁹mongong ma ngaile ahokya otsingtsing to khangka füi shingmong le kün angkya changle.

¹⁰Pongwang ma hwom thwonlop kop angkya changle, ifüima hwome thwontsing ma jangtho thüiba, hwome mwottho thaüi.

¹¹Hwom kakonubuchu wüi müikya zanglom saikha füi tüi angkya ilaxle zaman mix chichang angkya changle; hwom a tok-ngakyabu füi atsaile ngo angkya üntoxle pangnuli towüi mongao chitüi le chang angkya oli.

¹²Müimüithom ma fongmix tuita ang kakonu tuita wüi tüi angkya oli, ilaxle chix kako hia naosom haxmüi zangmale apu-achang ang tho angkya oli changle.

¹³Ibu müimüithom ma fongmixbu opange ma mwot müile moklaxpuix, hwome ma chifün oshing amongpu ilaxle Jisu Khrista tokya ma mongong bama hwome mongchongle zangwün ang thoüi.

¹⁴Hünzom hato kue ija lai zapongma, ku hünzom hato chwonle wüi nguilaxle hünzom ngün ang thoüile monghompu.

¹⁵Bachutix ku namshyen thüikoxchu, Zang homkha, oja ozün ma tüikya Zang müimüithom hex tamchu otsingtsing hanpakma thongnu hia tafak hex, ikhama kem lailaile chem ningkya zanglom saikha füi saxmok üihex, ija laiza makhange hünzom ang awan ang tomüi.

¹⁶Kem zanglom otukux chongkya huxsa tuita hex, owaechu münchangle thüi ang münthoüi: “Chix khünak sündün ma angai, Chasae changle le aho; kaxtaimixbue ngün. Chaxwannu pangnu khato chix apuk-apua; zangfang pangkhato wüi chix to ong, ilaxle chix zangkangting to dün.”