Read Wancho Naga 1 Timothi 6 Bible Online

1 Timothi 6 - Wancho Naga bible

1 Timothi 6

¹Zang mün lünle tamchu kwom mün ma owaechu kax chisumüikya chizex angkya kuxma, da ang opang ngolaxpuix, ibue ma hopunu ang chathua za angkya hia achuak achen angkya sukya changle le tex angkya oli changpu.

²Da opang ang hopunu khristanbu changlaxpuix, hwome ma hopunubu wünahai le taxchang, chemthüikoxle hwom a tüinaohom changle. Itülüi, ibue mix sümüi le hwom thotha angkya changle, chemthüikoxle opange hwom mwot makhange lap koplaxpuix ibu a hwome mongkünkya mongong khünakbu changle. Nange ibu apua angkya tamchu anwot-ano angkya changle.

³Opange othai Baibel kaxtong anwot-ano üihex kem Jowanpa Jisu Khrista kaxbu füi ilaxle hwom zanglom hwon-nwot füi nochitomle tüipuix,

⁴Ija a mongngam saxfolwot boma mama awankya chemchu müntüi. Kax bama aling alan angkya ilaxle ahe-atsi angkya chimüikya mongzok kax chix ma paxle, ilaxle ijae miktsak mongngwom, alakya, adix-adakya, ochax mongao, ibu alaile,

⁵üntoxle khüzi ma mwot chikoxkya tamchu otsingtsing chitüikya khünakbu makhange ohyet-otsi janba to alaile. Ibu a zanglom ma ahak-alua angkya olom tuita le hwome thütle.

⁶Changle, khünak tuita ma ma tüikya füi mongtex shakya jangtüi thüiba, zanglom makhange chix a hakpa luapa ang achangle.

⁷Keme chaxwannu to chem laxlaxle ngui? Chemchu laxlaxle chingui! Chaxwannu angkya keme chem laxlax toxüi? Chemchu laxlax toxüi chichang!

⁸Jangchang thüikoxle, kem ma sütling hia changtwon nyiwun jangtüi, kem zongma ibibi wüi nguipu.

⁹Ikoxle ahak aluase tsukyabu thwontsing to dütüi üntoxle hwom fang to ajo angkya hia pün angkya hanpakma ongat hia amakya mongzokbu tsün ma amanle.

¹⁰Chemthüikoxle ngun to mongkünkya a ochax pangnu hanpakma otong changle. Züizüie ija kopsele tsukya khoma mongong füi atsaile sam, ilaxle küjo küjekya küntsik mongma olombu tokhange hwom mong max angkya hato ahüi.

¹¹Ikoxlechu, nang Zang khünake, ibu lom pangnu tsyakle toxdao. Chasa Otsao, Zang womle tüikya, mongong, mongkün, thuakjokkya, ilaxle somdangkya, tamchu ibu hanpakma azong amongkya tüikox.

¹²Mongong zik ma apanle zikkox, ilaxle nang hanpakma oshuk chitüikya khüzün tsün kopkox; chemthüikoxle khünaknu thüntho ma nange shingmongle nang mongong ngaikya zuma Zange nang ija tsün hato nyakkya changle.

¹³Zang owae jamok ang khüzün koxpuix, ija Zang thüntho ma, ilaxle Jisu Khrista owae Pontias Pilat pomtho ma shingmongle chix mongong ngai, chix thüntho ma,

¹⁴kem Jowanpa Jisu Khrista ngaikya nyix mahüi tanto nang ang koxkya kax ma laxle tamchu mongao angkya chitüi le ibu kople thom angkya, kue nang ang kaxtom koxpu.

¹⁵Chix ngai angkya, ilaxle apün-awangkya, Zang chixe chaxwan zanghan thütkhak le changpong khae apüile faüi.

¹⁶Chizi angkya a chix tata wüi. Chix owaechu tümangüntox; owaechu tamngün ang thoüi münchang. Achuak achenkya tamchu oshuk chitüi le apün-awang angkya chix kux wüi naxchang! Amen.

¹⁷Ija tsün ma ahak-aluale ngokyabu ang chingam angkya, ikoxlechu opak chitikkya mwotkat to chichangle, kem mongmüi hanpakma Zang owae pangnu li mongtsutsu le koxpuix, chix to hwom monghom thom angkya kaxtom laxkox.

¹⁸Müikya mwot mok angkya, müikya mwot ma ahak alua angkya, mixfüi ahan-achüi le lax ang mongtsutsu le tamchu achwonle ngo angkya bama hwom ang kaxtom laxkox.

¹⁹Ilailaile tix hwome athax füichima ma hanpakma oja oshing mongkya chifün ang changüihex, ija tuina athün ang thoüi. Üntoxle hwome tsün oja otsingtsing tsün hex, ija kop ang thoüi.

²⁰Timothi, nange hume ang kople thomkya nange sünle thomlax. Üntoxle züizüi khünake othai to “tsingwankya”, le nyakkya adix-adakya zangwün hia ongat ningle kax ma alankya nange tsiakle toxlax.

²¹Chemthüikoxle züizüie ija tüile le thüilaxle ija khoma hwome mongong lom asamle. Zang chingcha hünzom füi ngohüi.