Read Wancho Naga 2 Timothi 2 Bible Online

2 Timothi 2 - Wancho Naga bible

2 Timothi 2

¹Kusa Timothi, Khrista Jisu füikya notom ma kem tomkux ang tüikya chingcha ma tsakzong le tüikox.

²Khünak obiobi thüntho ma nange atatle kue apuk-apuakya hwon-nwot koplax, ilaxle mae mongongkyabu opange mamabu hatochu anwot-ano ang thoüihex, ibu ang ija mokle pao ang laxkox.

³Kax ma laxle tüikya Khrista Jisu süpahi tuita ningle, nange sikngün ma wom ang thüikox.

⁴Mwot ma zünpünpünkya süpahi tuitae ma thakma tüichong ang ngokya alixachong mong amüise tsuüi, idaile zangjang khünaknu füi afyet awutle saxmok le chichangüi.

⁵Zik ma apankya khünak tuitae wanlombu tole chichang thüikoxle hingho kop ang chithoüi.

⁶Manzai mix owae azongle mokdao laxpuix, owang angkya puamün süntswon angkya chix chang angkya oli.

⁷Kue chempang akaxpuix ibu bama ajanglax, chemthüikoxle Jowanpa-e nang ang ibu pangnu awan tsuak angkya koxüi.

⁸Jisu Khrista owa zidaokya chatle azangle zopuix, owa Dawid sixli changkya hex, Kaxho Müikya apuk-apua pongma kue anwot-anokya lailaile chemle changpuix, chix texle ataklax.

⁹Kaxho Müikya apukkya khoma, kue sikngün apong ilaxle mütkop daokya mix tukuxle ku khale thom. Ikoxchu Zang kax a kople chithom,

¹⁰ikhoma Zange zünle kopkya khünaknu kuxmale kue pangnu adu, ija a Khrista makhange ahüikya khosün hwomechu naxkoplax ang tamchu oshuk chitüikya fuazang apüi angkya hanpakma changle.

¹¹Ija kax a otsingtsing changle: “Kem chix füi tomle jangzi daoba, kemchu chix füi tomle ngoüi.

¹²Kem adule jangchang thüikoxle, kemechu chix füi tomle apün-awangüi. Keme chix ema chilaxle jangchangba, chixechu kem ema münlaxüi.

¹³Kem mongong chitüi le changkoxchu, chix ma mongao angkya müntüi; chixe ma thaikya ang münachang tsuak.”

¹⁴Hünzome khünakbu ang ija apuale falax, ilaxle kax ma alanle chichang angkya bama Zang thüntho ma hwom ang khünzule kaxkhün laxkox. Kax ma alankyae müikya oli moküile münchang ikoxle ija kax to apakyabu amaüi wüi.

¹⁵Chiazak le chix thothapa tuita ningle, Zang otsingtsing kaxho Müikya thaikya chitüi le anwot-anokya khünak tuita ningle, Zange sule le lax angkya hanpakma nange otsuaktsuak ma azongle moklax.

¹⁶Ongat hia adix-adakya zangwünbu füi atsaile ngolax, chemthüikoxle ijae khünaknu Zang ha angkya atsaile jwonle apaole.

¹⁷Iningkya hwon-nwot a tuita hak saxle awütkya mak ningle changpu.

¹⁸Hwome mongong lomtang danle toxdaoa ilaxle kem anaole zokya ang achangle hüidaoa le anokya hwon-nwot tokhange hwome mongong mixbu züizüi mong ama le ngole.

¹⁹Ikoxlechu shingmong homting oja Zange zingle toxdaopuix ija a alox ang münthoüi; üntoxle ija ma ibu kax zale thomle: “Chix hanpak opang hex Zange hwom awanle ngole” ilaxle “Opange chix Zang hanpak changpu le thüiüi hex, hwom a othai mwot mokle ngokya chat angkya changle.”

²⁰Homnu chongkya tuita ma sütling hia müi-nyax pangnu li tüile; züizüi a hun hia khop makhange zingkyabu changle; mamabu a pün hia hax makhange zingkyabu changle; züizüi a khütkhaxkya tuke lax ang, mamabu a zangjang to laxle ngo angkya hanpakmale changle.

²¹Owawae ma ibu ochax pangnu tokya atsaole jangzingba, chix a khütkhaxkya tuke twonüi, chemthüikoxle chix atsaole thomkya tamchu hopupa mwot to thapkya, müikya mwot pangnu to twon ang achwonle thomkya changle.

²²Khüse pongma mongzok füi atsaile ngolax, ilaxle sukya, mongong, mongkün, tamchu mongsom hanpakma mong tsaokya tokhange fong angkya hanpakma Jowanpa ahyenkyabu füi tomle azonglax.

²³Ikoxlechu ongat hia chitsing chiwan zangwün füi atsaile ngolax; nange awan ngopu ibu a hyet ma shuüi.

²⁴Jowanpa da otuechu chiaheüi. Chix nok zongto wüi chingcha füi, tamchu müikya hia adukya füi tüi angkya oli changle.

²⁵Ma zongto tüikya mix achangle fa ang chix a puinai le tüi angkya oli changpu, chemthüikoxle ile changkya makhange hwom ang mong alüix angkya hia otsingtsing awankya hato chat ang Zange sho amüile faüi.

²⁶Üntoxle izuma hwom khangka hingle hüiüi tamchu bao owae hwom koplaxle hwom kax ma laxle ngo ang tompuix, chix kam angkya azangle pao ang tsuaküi.