Read Wancho Naga Tita 3 Bible Online

Tita 3 - Wancho Naga bible

Tita 3

¹Hünzom apün-awangkyabu hia apün-ada angkyabu chak to dan angkya, hwom kax ma lax angkya tamchu pangnu lom ma wüi müikya mok ang achwonle ngo angkya, ibu hünzom khünakbu hama mongto texle atak ang laxkox.

²Owa angchu omale kax chithüi angkya, ikoxle mongsom hia zuikop manle tüi angkya ilaxle pangnu zongto wüi othuithuima jonai le tüi angkya hwom hama wünkox.

³Chemthüikoxle tam a kwomchu wüi ongat ningle, kax ma chilax ilaxle thaile tüikya changpu. Kwom a pangnu lito asingle nüfux zaikya da ang ngokya. Kwome kwom tsün chingcha chitüile hia mixfün müikya ngünse chitsukya lom ma koxle hüi; mixe kwom to tsak ilaxle kwomechu hwom to khu.

⁴Ikoxlechu otue kem khosünpa Zang chingcha hia mongkün ngaile ahopuix,

⁵chixe kwom khosün. Ija ma keme lita müikya mwot mokdaokya khoma le chichang, ikoxle chix chingcha tokhange tix chixe kem khosünpu. Ija khosün mwot chixe, kem sole atsaokya ilaxle azünle puxkya hia tsün ozün fakya Otsao Chasa makhange mok.

⁶Kem khosünpa Jisu Khrista makhange Zange Otsao Chasa kem ang okhonguile thokle kox.

⁷Ikoxletix wüi keme chix chingcha makhange Zang füi muamüi angkya ataküi tamchu keme monghomle ngokya oshuk chitüikya khüzün tsün kop angkya hato kem hüi ang thoüi.

⁸Ija kax a otsing tomtata changle. Ija bama nange onüi khünzule namwünbae le kue texpu, ikoxletix opange Zang to mongong laxpuix hwome müikya tamchu nok zongto wüi mwot ma hüikya müikya mwot mok ang hanpak fa angkya bama hwom mong ma kakle texüi.

⁹Ikoxle ongat to kax ma alankya, pupa hwom mün jenlo le zakya, ahe-atsikya tamchu wüi wanlom bama azankya, ibu a mwot to chihüikya tamchu asukya chichang.

¹⁰Ahak ahankya alaikya mix ang othom anyi tukux ma kaxkhün laxkox, ifüima chix füi saxmok angkya mwot chemchu müntüi.

¹¹Iningkya khünak a oma-oshix changle le hünzome awan ngopu, tamchu chix ochaxe chix thaikya ahole.

¹²Otue kem Artema chichangba Taikhika hünzom hato akatüihex, Nikopoli to ku füi apong ang ngui ang otsuaktsuak ma azonghüi, chemthüikoxle kue zangwa ikha to alyetüi le mongzang wündaoa.

¹³Wanlom nwotmix Zena hia Apolo nyi hwom wünham lom ma süt angkya to hünzome tsuakkya apongle asunkox, ilaxle hwome laxlili hwom ma komle tüichale hulax.

¹⁴Otsing tomtata ma othang odang apongkya to asun azu angkya bama, kem khünakbue müikya mwot mokle ma hanpak ashix angkya awanle kop angkya oli changle.

¹⁵Ku füi tomle tüikyabu pangnusae wüi hünzom hato salam akatle. Mongong ma kem zuikhuibu pangnu ang wüi kwom salam laxkox. Hünzom pangnu füi wüi Zang chingcha ngohüi.