Read Wancho Naga Filemon 1 Bible Online

Filemon 1 - Wancho Naga bible

Filemon 1

¹Khrista hanpakma kun ma tüikya Pol hia kwom tüinao Timothi nyi tokhange: Jowanpa mwottho ma üitho tamchu zuikhui Filemon,

²ilaxle nang hom ma asoxkya müimüithom tamchu kwom nanao Afia hia kwom füi tomwüi süpahi Arkipa hwom hato:

³Zang kem Hopa hia Jowanpa Jisu Khrista-e hünzom ang chingcha hia mongsom naxfa.

⁴Tüinao Filemon, kue zangjop-jopba nang mün lünle ilaxle Zang ang münchong fapu.

⁵Chemthüikoxle Jowanpa Jisu Khrista tokya nang mongong tamchu Zang khünaknu tokya nang mongkün bama kue atatle.

⁶Khrista Jisu füikya notom ma kem tsün ma atakle hüikya mohiman pangnu bama, nang mongong tom-hankya tokhange süzule awanle lax angkya a ku zangjop changle.

⁷Ku mongkün tüinao, nang mongküne ku ang tüle mongmüi tamchu mongchyen fale. Nange Zang khünaknu kün-mong azünle zo ang tomdaoa.

⁸Khrista ma kue nang ang, nange mok angkya oli mok ang kaxtom kox ang ku ma mongchyen müntüile münchang,

⁹ikoxlechu nang tokya ku mongkün khoma, kue nang ma tsaiju kaxjupu. Ku, Pol tuita Khrista Jisu ma Zang da tuita tamchu chix mün khoma kun ma ngokya mix changkoxlechu,

¹⁰Khrista ma kusa Onesima bama kue chix mün ma tsaiju kaxjupu; chemthüikoxle kun to ngopong ma chasa ma ku chix hopa ang achangdaoa.

¹¹Hanpak tuita ma nang zongto chix chilaxli khünak tuita changkya, ikoxlechu athax chix a künyi pangnyi zongto laxli ang achangle tüile.

¹²Athax kue chix nang hato achatpu, ilaxle chix füi tomle ku kün-mongchu wüi ngui ang tompu.

¹³Nang lüix ma ku to fong angkya kuxma, Kaxho Müikya khoma ku kun to ngokya tukma, kue chix ikha to ku hama thomse tsupu.

¹⁴Ibachu kue nang ma chitik homtoxle ile mokse chitsu; itülüi, kue ija nang küntsu monglua to naxmok le texpu. Idaile nang mong matsu tanto kue ile chemchu münmok.

¹⁵Nange chix nang füi tomle othuithuima thom ang kop angkya kuxmale Onesima onox ma nang füi atsaile ngokyachu changdao tüilax.

¹⁶Ilaxle athax chix a dahai tuita tata le münchang ikoxle ija süthak le; chix a Khrista ma mongkün tüinao changle. Ku zongto chix tüle sukya changle! Ilaxle ija ningle chix nang zongtochu, tuita dahai le chichangle Jowanpa ma tüinao tuita ang achangle otukux suüihex!

¹⁷Idaile nange ku nang üitho changpu le jangtex, nange ku chemle pongle kopse hex, ilailaile chix pongle kop-hüi.

¹⁸Chixe nang zongto thai daokya jangtüi tamchu chemchem thashe jangtüi thüiningle ija ku ma julax.

¹⁹Ikhama, ija ku chak jao makhange zapu: Pol, kue nang ang ija achatle koxüi. (Changle, nang jao kox angkya ku ang thashe tüile ikoxlechu imo münwün ngohom.)

²⁰Idaile tüinao, chingchalaxle Jowanpa münma ija ku kax pongle shongkop fa, ilaxle Khrista ma tüinao tuita le ku ang mong shong amüifa!

²¹Kue ija zapongma, kue nang ang chemle akaxpuix, ija nange moküile ongpu: ingaxchu nange ifüi sütsexle mokle faüile kue ongpu.

²²Ifüi tomle, ku hanpak ang nui tuita achwonle thomlax, chemthüikoxle hünzom pangnu zangjop to lanlaxle Zange ku hünzom ang tamchatle koxüile ongpu.

²³Epafra, owa Jisu Khrista khoma hexle ku füi tomle kun to tüipuix, chixe hünzom pangwüi ang salam fale.

²⁴Ilailaile ku mwottho ma üitho Mark, Aristarkas, Dema hia Luk hwomechu salam fale.

²⁵Hünzom pangnusa füi Jowanpa Jisu Khrista chingcha ngohüi.