Read Wancho Naga Ibri 1 Bible Online

Ibri 1 - Wancho Naga bible

Ibri 1

¹Kaikai le Zange, kem pupa hwom füi obi thomthom ma hexle tamchu malom-malom to ajebu makhange zangwünkya,

²ikoxle Ija hanpak oshuk ma chixe kem füi Hosa makhange zangwünkya changle, owa makhange Zange ding hia hax zingpuix, üntoxle oshukma pangnu li mantswon ang Zange owa kamle koplaxpuix, ija mixsün a chix changle.

³Zang fuazangle fakya chix makhange aho üntoxle chix kax makhange Zange ding hia hax ozün ma thomkya chix a Zang jaojao changpu le aho. Khünaknüsae ochax thailak atak ang kop füima, chix zangkangting to Zang, thüikoxle pangnu thak angkya Zang tsaxchi ma thungle tüile.

⁴Zange chix ang koxkya mün chemle hwom mün füi süchongpuix, ilailaile Hosa a kaxtaimixbu füi süchongle zing.

⁵Chem ang, Zange otuechu chix kaxtaimixbu ang, “Nang a Ku Sasün changle; Anyix Ku Hünpa ang achangpu” chichangba “Ku chix Hopa changüi, üntoxle chix a Kusa changle” le chithüi.

⁶Ikoxlechu chix somwang Nao chaxwannu to apao ang hanpak nguile hüikya zuma chixe thüi: “Zang kaxtaimixbu pangnue wüi, Chix shwom angkya changle.”

⁷Ikoxle kaxtaimixbu hama Zange thüi: “Zange chix kaxtaimixbu zangwin ang, üntoxle chix dabu wünle ang zing.”

⁸Ikoxle Hosa bama Zange thüi: “O Zang, nang wangting ashukle chitoxüi! Nange, nang khünaknu thakma sule apünüi.

⁹Chem supuix ija to nange mongkün; chem chisupuix ija thua nang anu. Idaile Zang, nang Zange, nang zünle koppu; nang füikyabu ang koxkya süthak, nang ang mongsom hia chazakya fadaoa.”

¹⁰Chixe ilechu wüi akax, “Nang, Jowanpa, nange owang pongma chaxwannu zingle alai; nang chak tomta makhange nange zangdingbu zingpu.

¹¹Ibu maxünüi, ikoxchu nang ngoüi; ibu pangwüi nyi ningle buiünüi.

¹²Nyinu ningle nange ibu adopüi, üntoxle ibu nyibu ningle lüiüi. Ikoxle nang a othuithuima otyatya, üntoxle nang tsün tam münashuk.”

¹³Zange kaxtaimixbu owa ang ngaxchu: “Ija ku tsaxchi ma ngolax, kue nang zan pangnu china ningle nang chifa fangma mathomba” le chixe thüi.

¹⁴Jangchangba kaxtaimixbu a chem? Hwom a Zang thothakya chasabu opange Zang khosün atak angkyabu hato tsanle apaopuix, ibu changpu.