Read Wancho Naga Ibri 10 Bible Online

Ibri 10 - Wancho Naga bible

Ibri 10

¹Wanlom a hwom otsingtsing le chichang le, hüile ngokya müikya olibu zongma ochaxbu changle. Ija khoma zangpua foto chatchatnaole tö koxle ngokya tokhange zangshwom ang nguikyabu otuechu nguiwangkya ang achang ang müntsuak.

²Zangshwomkya khünakbu otsingtsing tomtata hwom ochaxbu tokya otsao ang jang achangdao thüikoxle, hwom tütuechu ochax khoma thaile ngokya mongto texle chilaxse, üntoxle tö koxkya pangwüi zakse.

³Ikoxlechu ibu tö koxkya makhange khünaknue hwom ochaxbu texle atak lax ang zangfo zangfole mokle hüi.

⁴Chemthüikoxle maihupong hia zwon ajibu füi ochaxbu pao ang müntho.

⁵Ija khoma, Khrista chaxwannu to ngui pongma, chixe Zang ang thüi: “Tö hia dan koxkyabu to nange chilua, ikoxlechu nange ku hanpak ang, tompo tuita achwon daoa.

⁶Müi otompo lan le zokle ashunkya, chichangba ochaxbu pao ang tö koxkya, ibu füi nang mong chimüi.

⁷Iponge kue thüi: Ku hanpakma wanlom ma, zale tüikya ningle; O Zang, nang mongtex ma, mok ang ku ikhama tüile”.

⁸Pongwang ma chixe akax: “Tö hia tö koxkyabu chichangba zomtong ma müibu zokle ashunkya üntoxle ochax pao angkya hanpakma tö koxkyabu nange chilom chichangba ibu füi nang mong chimüi.” Ibu pangwüi wanlom ma tüipupule tö koxkya changkoxlechu wüi chixe ija akax.

⁹Ifüima chixe thüi: “O Zang, nang mongtex mok angkya ku ikhama tüile.” Idaile Zange ozang tö koxkyabu awüt üntoxle ibu manma Khrista tö koxkya dan.

¹⁰Tamfang ma nok hanpak ang Khrista-e chix tsangtsa jaojao tö koxkya tokhange kem pangwüi otsao ang achang, chemthüikoxle chix hanpakma Zang mongtex chemhex ija chixe mok.

¹¹Jehudi nok nguapa noke wüi thothakya ma mwot nyixfo to mok üntoxle tö oli tuitata wüi obi thomthom ma hexle kox; ikoxlechu otuechu ibu tö koxkyabue ochaxbu pao ang chitho.

¹²Ibachu Khrista-e othuithuima mwot to thapkya tö, ochaxbu hanpakma tö tam wüi kox, üntoxle ifüima chix Zang tsaxchi ma thung.

¹³Zange chix zanbu chix china ang chifa fangma mathom tanto, athax a chix ikhato tanle tüile.

¹⁴Chemthüikoxle tö tam wüi koxkya makhange otsao ang achang daokyabu othuithuima nguiwangkya ang achangle fadaoa.

¹⁵Üntoxle Otsao Chasae wüi chix kaxkhi fale. Pongwangma chixe thüi:

¹⁶“Athax füichi ma kue, hwom füi tan angkya, Tsaotsüt a ija changle; Jowanpa-e thüi: Kue ku wanlombu, hwom kün-mong ma shole koxüi; hwom tutex ma ibu zale faüi.”

¹⁷Üntoxle chixe akax, “Athaxpi kue hwom ochaxbu, tamchu chisukya mwotbu, ibu texle münngo.”

¹⁸Idaile otue ibu thailak fapuix, ochaxbu pao angkya tö kox angkya chem mwot müntüi.

¹⁹Idaile, ku zuikhuibu, Jisu zikya makhange ataxkya Otsao Nui to hüi ang kem ang mongtex pankya tüile.

²⁰Atsyenkya nyi oja chix tsangtsa hex, ija makhange chixe kem ang lomzün, khüzün lom dapdaoa.

²¹Kem ang Zang hom hopunu ang akhokya nguapa tuita tüipu.

²²Idaile chimüikya tutex tokya atsao daokya mongtsangbu hia ti füi sodaokya tsangtsabu füi, künzu-mongzule üntoxle mongao chitüikya mongong füi kem Zang hato hüihax.

²³Chikchexle chichang homtoxle keme tsaole ngaidaokya to monghom füi shingmongle künhax, chemthüikoxle owae tsaodao laxpuix chix a mongao chitüi angkya mix changle.

²⁴Mongkün aho ang tata to fong angkya üntoxle mwot müikya mok ang tata tuitex le tüihax.

²⁵Züizüie mokle hüi ngokya ningle, keme tata füi apong asaole ngokya wanlom taxamüt hax. Itülüi, keme sisile mix keme tata ang zong adün hax, chemthüikoxle Jowanpa hanpak chwonle hüingole.

²⁶Chemthüikoxle kem ang otsingtsing tsing ang tomkya füima keme chaktung ma ochax lyenle jangngo thüiningle ochaxbu pao angkya hanpakma athax chem ningkya tö kox angkyachu müntüi.

²⁷Itülüi, atale toxkya pangwüi a hüiüi tüikya kaxfün üntoxle Zang füi opüima ngokyabu amüt angkya khomatsikkya wün hüi angkya thua zangale tanngo angkya tix wüi changle.

²⁸Tütapu changkoxchu Mosa Wanlom kax ma chilaxle tüikya mix, mixhuak anyi chichangba ifüi süluile kaxkhi lax üntoxle kaxfünkya zuma thaile jangchang thüiningle chingcha ojao chitüi le langle.

²⁹Jangchangba, ochax tokya hwom atsaole fakya Zang aji chem angchu chilaxle hwon tamchu chingcha fakya chasa adix-adale opange Zang Hosa tha ajaole changlaxpuix, ajang anohu, hwome kop angkya zothup otukux thama changüihex!

³⁰Chemthüikoxle: “Kue olüix khomüi, kue jan alüiüi, tamchu Jowanpa-e chix khünaknu kaxfünüi”, le thüikya keme awanpu.

³¹Ozün ma tüikya Zang chak ma dong angkya tüle zadün changle!

³²Tho to hünzom füi chemle changdao laxpuix texle ataklax. Itukwane, Zang wünyane hünzom to nyan füima, olom-olom ma hünzome sikngün apong hupu, ikoxlechu ibu chax-zane hünzom to lüt ang chitho.

³³Hanpak tuita ma noknu thüntho ma hünzom adix-ada tamchu chisumüile hwon, üntoxle mamatue hünzom a ma to ile hwonkyabu füito wom ang azongle bang.

³⁴Da ang kople thomkyabu sikngün hünzome ahanle lax, üntoxle hünzom mwot-kat komle azik-amüt pongma hünzome pwonla atungle adule hüi, chemthüikoxle oshuk chitüi le ngo angkya oli athaxchu hünzome koplaxle tüile le hünzome awan.

³⁵Idaile hünzom ang mong taxmax chemthüikoxle ijae ma füi tomle chongkya hingho laxlaxle ngoüi.

³⁶Zang mongtex mwot mok ang tamchu chixe tsaokyabu kop angkya hanpakma hünzome adu angkya changle.

³⁷Chemthüikoxle Otsao Lai-e akaxkya ningle, “Janba ma wüi, üntoxle hüiüi tüikya mix nguiüi; chix tule le münngo.

³⁸Ibachu, otsao ku khünaknu, hwome ongüi üntoxle ozün ma ngoüi, ikoxlechu hwom owawa jang achax thüiningle, ibu füi ku mong münmüiüi.”

³⁹Kwom a anongle chat üntoxle samle maxkya khünaknu münchang. Itülüi, kwom ma mongong tüile üntoxle khosünle tüile.