Read Wancho Naga Ibri 11 Bible Online

Ibri 11 - Wancho Naga bible

Ibri 11

¹Mongong a keme monghom le texkya oli bama atsingsho angkya, tamchu keme mike chingünkya oli bama mongao chitüi angkya hanpakma changle.

²Hwom mongong khoma kaipongkya khünakbu ang Zange changkox a le thüi angkya atak.

³Zangfangjanu a Zang kax makhange zingle alaikya changpu le keme mongong füi tix tsing ang thole, ikhoma chem ngün ang thole tüilaxpuix ija a ngün ang chithokya makhange zingle alaikya changle.

⁴Abel-e Kain füi sümüikya Zang ang tö koxkya a mongong makhange changpu. Ija chix mongong khoma Zange chix a otsao khünak changle le lax, chemthüikoxle Zang chix jaoe chixe koxkya tö pongle kop. Chix mongong khoma, chix ziünkoxlechu Abel-e zangwün.

⁵Inok zi ang chitomkya a chix mongong khoma changle. Chix Zang hato dün. Chix ding to dünüi tho to, Enok Zang mong amüi ang tomkya Otsao Lai-e akaxle.

⁶Mongong chitüi homtoxle owaechu Zang mong amüi ang müntho, chemthüikoxle chix hato hüikya pangnusae, Zang ozün ma tüikya tamchu chix alomlom ang onüi kop-lo ang koxkya to mongong tüi angkya changle.

⁷Chixe ngün ang chitho koxlechu Noa ang füichi hanpakma Zang kaxfün atat ang tomkya a mongong changkya. Chixe Zang kax ma lax üntoxle khua müi, oja mong ma chix tamchu hwom kako pangwüi khosün puix. Ikhoma, chaxwannu a max ang tom, üntoxle Noa-e Zang angkya mongong makhange hüikya otsao mantswon kop.

⁸Zange chix ang koxüihex le tsao saxkya chaxwan to laile pao ang nyak pongma Abraham ang Zang kax ma lax ang tom. Chix ochichi to pao angkya hex opak chitik homtoxle chixe ma chaxwan danle tox.

⁹Zange chix ang koxüihex le tsaosaxkya chaxwan to mongong makhange chix tuita püntüi ningle nyihom ma ngo. Taningkya Zang kaxtsao mantswon kopkya Isak hia Jakop nyichu ile wüi ngo.

¹⁰Chemthüikoxle Abrahame oting ma sütle jento ngo angkya, Zange zingle alaikya tingnu tanle ngokya changle.

¹¹Chix azusong khato üntoxle Sarah chuwüi naosom ngui-wang angkya ozya kaile azu füima, mongonge Abraham hopa tuita ang achang ang tom. Chemthüikoxle chix tsaosüt otya ma thom angkya changle le chixe Zang to mongong.

¹²Abraham omang bütukuxle changün koxlechu, ija mixsün tuita makhange ding angkya lyettsi büta tamchu tinu kax angkya sak huak büta tüle-tüle osix-oli ngui.

¹³Ibu khünak pangwüi mongong ma zi, Zang kaxtsaobu hwome chikop tox, ikoxlechu ochu tokhange hwome ibu ngünle lax üntoxle pongle kop, üntoxle ngaitho le chaxwannu ma hwom püntüi tamchu mixnokbu changpu le hwome lax.

¹⁴Iningle akaxkyabu tokhange hwome ma chaxwan tsingtsing hanpakma hule ngokya tsaotha le awan ang tomle.

¹⁵Hwome danle toxdaokya chaxwan hanpakma mongto texle chingo; hwome ile texle jangngo thüikoxle, hwom ikha to chat angkya oshua müikya atakse.

¹⁶Itülüi, hwome sungle ngokya a sümüikya, zangkang tingsho changle. Ikhoma hwome chix ang hwom Zang le nyak koxle Zang ang chem thünzak müntüi, chemthüikoxle tingsho a chixe hwom kux ang achwonkya changle.

¹⁷Zange chix thwontsingkya zuma, mongong makhange Abrahame sasün Isak tö kox. Abraham a Zange tsaosax daokya mixsün tuita changkya, ikoxlechu chixe sasün tuita wüi tüikya Zang ang tö kox ang achwon.

¹⁸“Kue tsao daokya nang sixli a Isak makhange laiüi” le Zange chix füi akax daokya.

¹⁹Zidaokya mixchu Zange chatle azün ang thoüile Abrahame ong, üntoxle wünhax thüikoxle ilailaile chixe Isak chatle achatle lax.

²⁰Mongong makhange Isak-e Jakop hia Esau nyi füichu mohiman hanpakma tsaosax.

²¹Mongong makhange Jakop-e chix ziüi khakha ma Jusep sasün hwom pangwüi to mohimanle tox. Chixe chix kaithox dingma ate laxle Zang shwom.

²²Mongong makhange Jusep-e, chix zitu nguikya zuma, Israel khünaknu Ijip nok angkya laile pao angkya akax, üntoxle chix mang to chemle changüihex, ija bama adangle fatox.

²³Mosa honu hopa hwome mongong makhange, chix pux füima lyetkua azom jao pyenle thom. Hwome chix tüle-tüle osün müikya nao changa le ngün, ilaxle hwome wanghom kaxtom ma chilaxle tüi ang chiza.

²⁴Mongong makhange, Mosa-e chix tsong füima, Farao sacha wangchasa zong to chix sasün chichang khato le thüi.

²⁵Onox ma ochax füi mongmüikya füi chixe Zang khünaknu füi sikngünkya towüi lua.

²⁶Ijip nok tuina pangnu füi Khrista bama thajao wünhai wüi achongkya tuina changpu le chixe tex, chemthüikoxle chixe füichi ma kop angkya hingho chix mikza ma thom.

²⁷Wanghom küntsik mongma thua ojao chizale, mongong makhange Mosa-e Ijip chaxwan danle tox. Mike chingüntsuakkya Zang ngünle laxdaokya tukuxle tamchat mong chidong le chix adu.

²⁸Lang angkya kaxtaimixe, Israel naosom tüichongpabu chilang angkya kuxma, mongong makhange, akaile lekya hia kahak khoma aji sakkya pongwang lükya zom chixe tan.

²⁹Mongong makhange, haxkozan to ahamkya ningle Israel khünaknue khikya tinu tale le tsuak; Ijip khünakbue ilailaile le ang azong koxle hwom a tie jok.

³⁰Mongong makhange Israel khünakbue nyix anüt akhople ahamkya füima Jeriko pan long katuk tsun ang kox.

³¹Mongong makhange she e Israel zyetmixbu wünpwonle kopkya khoma, tsahangcha Rahap, Zang kax ma chilaxle tüikyabu amütkyabu füi tomle max ang chitom le khosün.

³²Kue chatchu wün angcha? Chemthüikoxle Gideon, Barak, Samson, Jeptax, Dawid, Samuel, üntoxlechu ajebu mo wün ang ku ang hanpak müntüi.

³³Mongong makhange hwome chaxwannu füi azan ilaxle ibu to anao. Chem supuix hwome ija mok üntoxle Zang kaxtsao tüikya hwome atak.

³⁴Hwome mailangbu wikha apum, za adünkya wün max ang tom, changlo füi lang ang thüikya azang. Hwom shonai le tüikya ikoxlechu tsakzong tüikya ang achang; achax-azan pongma hwom tüle-tüle tsak üntoxle mixnok zanbu to anao.

³⁵Mongong makhange shekobue zidaokya mamixbu chatle ozün ma kop. Mamabue, sümüikya tsün ma chatle azangle zo angkya hanpakma, hwom pankya chilax ngo homle zothup le lang ang matsün kox.

³⁶Züizüie adix-adale hwon üntoxle zu füi fit, üntoxle mamabu a janbüi füi khak laxle kun ma sho ang pao.

³⁷Hwom to long füi thup le lang, hwom anyi ang achangle janzüt-bit füi azüt, hwom changlo füi lang. Hwom a zasabu, fuxtsüikyabu üntoxle chisumüile hwonkyabu: hwom chun-khwon hia zwon-khwonbue baplaxle akhop le aham.

³⁸Hwom zong to chaxwannu aluile müikyanu chichang! Püntüibu lailaile hwom, sak hax hia haxnu to samle, longlua hia tswom khato ngole aham.

³⁹Ibu makhange hwom mongong kaxkhi tüihu koxlechu, Zange tsao daokya hwome chikop.

⁴⁰Chemthüikoxle kem chiwom homtoxle hwomchu wüi nguiwangle chichang angkya kuxma kem hanpakma Zange sümüikya mwottho zingle dan. E dan.