Read Wancho Naga Ibri 12 Bible Online

Ibri 12 - Wancho Naga bible

Ibri 12

¹Kem hanpak ang kaxkhi kox angkyabu kem akhople ija chongkya othom tüile. Ikhoma kem lom tsyenkya pangnu li tamchu kem to mongle kün thomkya ochax füi atsaihax, üntoxle kem thüntho ma tüikya zikkya khato monge texkya füi zik-hax.

²Owang tokhange oshuk kople kem mongong thomkya Jisu angkya kem mik taxachex hax. Pünsak sikngün khoma hexle chix ang mong chiatho! Itülüi, chix hanpak ang tanle ngokya mongmüi khoma, pünsak ma zikya thünzak tuita changpu le chixe chithüt, üntoxle athax chix a Zang ngwotnui tsaxchi ma thungle tüile.

³Hünzom ang mong chihix angkya tamchu mong chiatho angkya hanpakma, owae ochax khünaknu miktsak mongngwom adule hüipuix, ija Jisu chem ning lükya ziamong makhange lepuix, ajang anohu!

⁴Hünzome ochax füi azankya zuma ma aji ajen angkya kople adule mahüi.

⁵Tamchu hünzom naosom ang lax üntoxle hünzom zong adünle wünkya kax ija kax hünzome alakdaoa: “Kusa, Jowanpa-e zünte le taxchang; chixe sikangün pongma, nang ang mongmale taxchang;

⁶chixe mongkünkyabu to Jowanpa-e zünle; ilaxle chixe pongle kopkya nao, pangnusa towüi chixe akumathumle.”

⁷Akumathumkya thwontsing to chimale hünzome adu hüi. Zange susa ningle hünzom to hwonpu; honu hopae chizün chisaikya nao chem tüi?

⁸Naosom pangnu akumathumkya olom ma hünzom zünsaikya olom chitüi thüikoxle, hünzom a sa tsingtsing chichangkya samuabu changle.

⁹Tamtailechu kem ang müi-hi-aji ma honu hopa hwom tüipu, hwome kem to zünsaipu ilaxle keme hwom chathua zapu. Ija thakto chasa ma kem Hopa chak to kem tsün koxlaxle ozün ma ngo angkya otukux achongkya hex!

¹⁰Hwom zongto sukya olom ma kem müi-hi-aji honu hopabue onox ma kem zünsaile; ikoxle Zange zünsaikya a kem zongma naxmüi le zünpu tamchu kem chix otsao süntswon ma wom angkya hanpakma changle.

¹¹Kem to akumathumkya tuk ma, kem zongma mongmüi chichangle mongma angkya oli tuita ningle tüitoxle. Ibachu, ofüima a, opang ija füi akumathum le hüipuix hwom hanpak ma otsao mongsom aziak ziakle.

¹²Idaile ajongle thomkya hünzom chak nwonlax üntoxle chikux anoxkya atsakkox,

¹³ilaxle nang chitswon tangtho lom ma thomkox, ikoxtix cha faikya pakle chipaoüi, ikoxle müile mix müiüi.

¹⁴Pangnu füi tumüi ang azonglax, chemthüikoxle ija chichang homtoxle owaechu Zang ngün ang münthoüi.

¹⁵Zang chingcha angkya anongle chichat angkya bama khünkhile hunga ngolax. Nyem laxle ija ma tüikya zik hing füi huanuma khünaknu tingtui ang tomkya khaxkya pün tuita ningle owachu taxchang.

¹⁶Ma tüichongpa sünkho saxkhua tuita ang hangle awütkya Esau ningle owachu chasa ma chitsaole taxtüi.

¹⁷Hünzome awan, ofüima chixe hopa mohiman laxsele tsu; ikoxlechu chixe ija pongle chilax, chemthüikoxle mikfi tunji le chixe ija lomkoxchu, chixe chem mokdao laxpuix, ija alüix angkya olom chiatak.

¹⁸Israel khünakbu ningle ma to pole awankya hato wünchua, zangnak üntoxle zangfwom shixkya, zangchei, nyazong ozing üntoxlechu kaxzing, ibu füi tüikya Sinai haxnu to hünzom chingui.

¹⁹Otue khünaknue kaxzing atat laxpuix, hwome mama kaxzing atat ang sütaxtom le thüi:

²⁰chemthüikoxle: “Müi tuitae changkox ngaxchu ija haxnu to janglyet thüiba long füi thuple lang angkya jao changle”, le akaxkya kaxtom hwome adu ang chitho.

²¹Ija osün ngünkya tüle-tüle za-adünkya changkoxle Mosa-e thüi: “Ku abünle üntoxle zale.”

²²Itülüi, hünzom Zaion haxnu üntoxle ozün ma tüikya Zang tingsho, hajat-hajat kaxtaimixbu füi tüikya zangkangting Jerusalem to ngui.

²³Zangkangting to mün zale tüikya oputwang thom pwonla tusox to hünzom ngui. Noknu kaxfünpa Zang üntoxle nguiwangkya ang achangkya otsao khünak chasabu hato hünzom ngui.

²⁴Tsaotsüt achongkya Jisu, tamchu Abel aji füi ngaxchu sümüikya tsaosüt aji sakkya hato hünzom ngui.

²⁵Kaxzexkya mix kax ma chilaxle chitüi angkya bama hünzom likhün lax, chemthüikoxle chaxwannu ma likhün angkya kax owae zexpuix, ija kax ma chilaxkyabu ngaxchu paole azang ang chitho, jangchangba zangkangting tokhange kaxkhün zexkya mix thüntho angkya tomning chemle paole azang thoüi!

²⁶Iponge chix kaxzinge chaxwan sile alox, ikoxle athax chixe tsaodaoa: “Tamchatle kue, chaxwannu tata le chichangle zangding ngaxchu sile aloxüi.”

²⁷Kaxhua “Tamchatle”, le thüikyae, ija kax füi alox ang chitsuak angkya oli naxngo ang zingdaokya oli pangwüi sile aloxüi üntoxle apaoüi.

²⁸Idaile Zang ang münchong fahax, chemthüikoxle sile alox ang chithokya Wangting keme pongle koppu. Chixe pongle kopkya lima tamchu chix chathua zakya füi keme Zang shwomhax;

²⁹chemthüikoxle kem Zang a zokle ashun angkya wün changle.