Read Wancho Naga Ibri 13 Bible Online

Ibri 13 - Wancho Naga bible

Ibri 13

¹Khristanbu ningle tata to künkak mongkün füi ngolax.

²Ma hom to nguikya mixwünbu wünpwon angkya taxalak. Ile mokkya tokhange chitsing homtoxle kaxtaimix wünpwon le pong kopkya khünak züizüi tüikya.

³Kun khato ngokyabu taxalak, ikoxle hünzom chuwüi hwom füi tomle kun to ngokya ningle thütlax. Hwom füi tomle hünzom chuwüi sikngünkya ningle thütlaxle sikngün ma ngokyabu taxalak.

⁴Noke wüi aju-asomkya achuak achen angkya oli, ilaxle kakonu hia kakopabu tata chiale le ngo angkya changle. Chakzongkwonte le hia chinunchakkaile tüikyabu to Zange kaxfün angkya changle.

⁵Ngun to kün-luakya füi hünzom atsaile ngolax, üntoxle hünzom ma ma tüikya füi mongzom müile ngolax, chemthüikoxle Zange thüile: “Kue nang otuechu danle müntox; kue otuechu nang awütle müntox.”

⁶Idaile mongchonghax üntoxle akaxhax, “Jowanpa a ku to fongmix, ku otuechu münza. Owae ku to chemthüi thoüi?”

⁷Hünzom füi Zang Kaxho akaxkya, pongwang angkya hünzom lompabu taxalak. Hwom chemle ngole hüi üntoxle chemle zi, ibu to aküi le tam ajangle anolax, ilaxle hwom mong ningle chang ang azonglax.

⁸Jisu Khrista a münyix, anyix üntoxle othuithuima otyatya.

⁹Küjo küjekya hozün hwon-nwotbue hünzom ochei to pao ang taxtom. Osüt oling bama wanlombu tokya makhange chichangle Zang chingcha tokhange omong tsakzong kopkya wüi sümüi, ibu wanlom tokya tokhange hexle lap chemchu chitüi tox.

¹⁰Jehudi nok zangshwom nui to mokkya nguapabue kem zomtong angkya tö sax angkya olom müntüi.

¹¹Ochaxbu hanpakma tö kox ang Jehudi nok zongma Nguakhoe ataxkya Otsao Nui to müi aji apüile; ikoxlechu müi tompo a homtho to huakle.

¹²Ija khoma Jisu chuwüi, chix aji jao makhange ochax tokya khünaknu atsao ang tingnu pankai to zile.

¹³Idaile, chix thünzak tom-han ang kem homtho to laihax.

¹⁴Chemthüikoxle ija chaxwannu ma kem jento ngo angkya kem ang tingsho müntüi; keme hüiüi tüikya tingsho to hule ngopu.

¹⁵Jangchangba keme othuithuima chix makhange Zang ang münchong fakya tö oja tun füi chix ngaikya oziak hex, ija tö koxhax.

¹⁶Müikya mwot mok ang tamchu tata to fongtsox angkya taxalak, chemthüikoxle ibu a Zang mongmüi ang tomkya töbu changle.

¹⁷Hünzom lompabu kax ma laxlax üntoxle hwom kaxtombu apalax. Hwom mwot bama hwome Zang ang akiakkya kox angkya changkoxle, ojao chizak le hwome hünzom to hule nye ngole. Hünzome hwom kax ma laxle jangtüi thüikoxle, hwome hwom mwot mongmüimüile moküi; ile chichang thüiningle, hwome ibu mongma füi moküi, üntoxle ijae hünzom ang chem olüichu chifaüi.

¹⁸Kwom hanpakma zangjople ngohüi. Kwome awanle ngopu, kwom khangka hingle tüile, chemthüikoxle chaliama kwome chem supuix ija mokse tsupu.

¹⁹Tamnüilechu Zange ku chwonle wüi hünzom hato tamchat ang tom angkya bama ku hanpakma chizak le jopngo hüile akaxpu.

²⁰Oshuk chitüikya Tsaotsüt shintopkya chix aji khoma owa Akhokya chun-nyetmix ang changpuix, ija kem Jowanpa Jisu, zidaokya Zange chatle azang ang tom.

²¹Chix mongtex mwot mok ang mongsom Zange hünzom hanpakma laxli müikya oli pangnu füi angui awangle naxfa, tamchu Khrista makhange chixe chix mong amüi angkya oli kem ma naxmok. Üntoxle othuithuima Khrista ang fuazangkya naxchang! Amen.

²²Ku zuikhuihom, chingchalaxle ija zongdün kaxho to adule apahüi; chemthüikoxle hünzom hato ija ku laiza aluile lokyanu münchang.

²³Kem tüinao Timothi kun tokya dandaokya bama hünzomechu naxtsing laxle texpu. Chix chwonle janghüi thüiningle ku hünzom hato nguikya zuma chixchu wüi laxlax toxüi.

²⁴Hünzom lompabu pangwüi ang tamchu Zang khünaknu nok ang kwom salam fakox. Itali tokya mongong mixbuechu hünzom hato hwom salam akatle.

²⁵Jowanpa chingcha hünzom pangnu füi wüi ngohüi.