Read Wancho Naga Ibri 5 Bible Online

Ibri 5 - Wancho Naga bible

Ibri 5

¹Nguakhobu pangwüi hwom khakha angkya kampu ilaxle hwom a pangnu hanpakma Zang thotha ang tompu, ija a zangjang tö hia ochaxbu bama tö kox angkya hanpakma.

²Chix malailai ngaxchu shonaile tüikya daile, chitsing chiwan hia thaikyabu zong to chix jonai le tüi angkya oli changle.

³Üntoxle chixchu wüi shonai le tüikya daile ochax khünakbu hanpakma tata le chichangle chix bamachu wüi tö kox angkya changle.

⁴Owaechu ma nguapa akhokya changündai le ma alüile achuak achenle tüi angkya münlom. Ikoxle khünak tuita Arun lailaile Nguakho ang achangkya a Zange nyakle laxkya tokhange tix wüi changpu.

⁵Ilailaile, nguakho tuita mongngam a Khrista-e ngaxchu chix ma chiamyen. Itülüi, Zange mix chix ang thüi: “Nang a Ku Sasün changle; anyix ku Hünpa ang achangpu.”

⁶Chixe mama khamachu wüi akaxle, “Melkizedek mantswon lom to le, nang oshuk chitüi le, Nguakho ang ngoüi.”

⁷Ija chaxwannu ma chix tsün ngotanto Jisu-e, zik chak tokya owae khosün ang thoüi hex, ija Zang hato akhongle tamchu mikfi füi zangjop üntoxle ju-lom le chang. Chix ahixkya ang achang üntoxlechu Zang to mongkoxle tüikya khoma, Zange chix zangjop atat.

⁸Chix Zang Hosa changün koxlechu chix sikngün makhange kax ma laxle tüi angkya awanle lax.

⁹Otue chix nguiwangkya ang achang puix, chix kax ma alaxlax nok hanpakma chix a tuita oshuk chitüikya khosün otong ang achang,

¹⁰ilaxle Melkizedek mantswon olom tole Nguakho changpu le Zange angai.

¹¹Ija bama keme wün angkya tüihule, ikoxlechu hünzom ang tongtik zahik le wünfa angkya a mwottsak tuita changle, chemthüikoxle tsingle lax ang hünzom huanuma wüi daile.

¹²Hünzom nwotmixbu ang achang ang hanpak zanghan okhongui le tüihukya dai: ikoxlechu hünzom hama pongwang pongkya Zang Kaxho bama owawae apua anole fa angkya a laxli ang achangle tüile. Sützan saxhaxkux tsyen to, athaxchu hünzome tsomti ling angkya laipu.

¹³Tsomti ling angkya khünak owawachu, chisukya hia sukya süi ang matsingkya nao tuita thatha changpu.

¹⁴Sützan a mokkya mwot makhange, chisukya hia sukya ba süi ang tsuak le tüikya mixmüibu hanpak changle.