Read Wancho Naga Ibri 6 Bible Online

Ibri 6 - Wancho Naga bible

Ibri 6

¹Idaile owang pongkya khristan kaxho füito dantoxlaxle kempi mixmüi zangwün hato thoto lehax. Tüta pongchu chithap angkya mwot füi atsai laxle Zang to mongongle hüikya

²thüikoxle bapti laxkya hia khangkho ma chak dankya; zidaokya anaole zokya hia oshuk chitüikya kaxfün, ibu bama keme homting hozün zing angkya mwot münchang.

³Kem thochi to lehax! Üntoxle Zange jangdan thüiningle, ija a keme mok angkya oli jao changle.

⁴Chichang thüikoxle hwom mongong dantox daokyabu tamchatle mong zangwün angkya hato chemle chat ang tomüi? Tam a hwom Zang zangngai ma ngokya; hwome zangkangting hingho wanle anodao üntoxle hwom süntom Otsao Chasachu wüi pongle hüidao;

⁵hwome apongle hüikya makhange Zang kax a müikya wüi changpu le awanpu, üntoxle füichi tsün tsakzong hwome ajangle laxdaoa.

⁶Ingale hwome ma mongong danle toxpu! Hwom tamchatle mongzangwün angkya hato ahüi angkya tsuak angkya oli münchang, chemthüikoxle hwome Zang Hosa tamchatle pünsak ma takle langpu tamchu tamchatle chix ang noknu thüntho ma zak tam akopkya changpu.

⁷She tokma dütle wat ngokya zangwat ti lingkya üntoxle zaipupa ang lap kop ang koxle pünsa zuasa alaile fakya, ija chaxwannu to Zange mohiman hüi.

⁸Ikoxlechu ijae hux hia nat jang anyem thüikoxle, ija chem ang münchang; ija a Zang thuakzom kop angkya tamchu oli thule wün to zok angkya thama ma tüile.

⁹Bachutix tüinaohom, kwome ile akax koxlechu, kwome hünzom to mong münao, hünzom khosün kux ang tüikya sümüikya mohiman hünzom ma tüile le kwome awanle ngopu.

¹⁰Zang a masüi mixlüikya münchang. Hünzome ma füikya khristan üithobu ang kox-zun le ngokyabu üntoxle fongkya olom tokhange chix hato mongkün ahokya chichangba hünzome mokdaokyabu chemchu chixe alak angkya münchang.

¹¹Hünzom pangnusasae wüi ma küntsu monglua oshuk alople thom angkya kwom mongtex, ikoxle tix hünzome monghom ngokya oli changle naxhüi fa ang,

¹²hünzom zaxkak mongdom le namchangbae le kwome müntex, ikoxle mongong hia adukya füi tüikyabu ningle namtüibae le texpu, ikoxle tix Zange tsaole thomkyabu kop ang tomüi.

¹³Otue Abraham füi Zange chix kaxtsao koxpuix, chixe tsaodaokya pangwüi kox angkya hexo le tsaosax. Chix thak ma owachu chitüikya daile, ija tsaosüt ma chixe ma mün lün.

¹⁴Chixe thüi: “Kue nang to mohimanüi, üntoxle nang ang ku sixli faüi le tsaopu.”

¹⁵Abraham ma monglomkya tüi, ikhoma Zange chem tsaosüt thomlaxpuix ija chixe kop.

¹⁶Otue khünak tuitae tsaosaxüi hex, izuma chixe ma thakma achongkya mün lünüi, üntoxle ija tsaosüte alakya zangwün afünüi.

¹⁷Opange chix kaxtsao kop angkya changlaxpuix, ibu ang Zange chix mongtex otuechu lüichüi angkya münchangle tsing ang koxse tsule; ikhoma chixe kaxtsao to tsaosaxkyae bopu.

¹⁸Zange alüi-achüi ang hia atse ang chithokya ija nyi tüile. Ikhoma, kem opang chix ma azangle tüilaxpuix, keme kem pomtho ma danthomkya monghom to shingmongle kün angkya huanuma zong adünle.

¹⁹Khosün tüile le ongkya ija monghom a kwom chasa hanpakma fakbüi tuita ningle otsak ozong hia mongong chongkya changle.

²⁰Kem hanpakma achale chix, Melkizedek zom tole, Nguakho ang Jisu ikha to dong.