Read Wancho Naga Ibri 8 Bible Online

Ibri 8 - Wancho Naga bible

Ibri 8

¹Kwome wünle hüikya kaxmik pangnu a: Otsao Chongwang ngwotnui ma Zang tsaxchi ma thungle kem ang Nguakho tuita tüile.

²Khünake münchang ikoxle Jowanpa-e zingkya ataxle tsaokya otsingtsing zangshwom nui makhange chixe Nguakho mwot mokle.

³Chemle Nguakho tuita tö pangwüi kox ang hia müi langle Zang shwom ang kampuix, ija lailaile kem Nguakho angchu tö kox angkya oli tuita tütüi angkya changle.

⁴Chix chaxwannu ma tüipuix thüikoxle, Mosa Wanlom ma tüikya tö kox ang nguapabu tüihukya daile, chix a nguapa ang ngose jao chichang.

⁵Hwome nguapabu ningle mokle hüikya a tuita zangkangting to tüikya opyen changle. Ija a Mosa füi chem tüidaopuix ija tuitata wüi changle. Chixe zangshwom nui nyihom zing ang thüipongma Zange chix ang thüi: “Haxnukho to nang hama aho daokya olom ma zing ang khünkhi lax.”

⁶Zang hia khünaknu bama sümüikya Tsaotsüt chixe zingle dankya ningle, athax a, hwom füichu wüi ataxkya zom mwot mok angkya Jisu ang kox; chemthüikoxle ija sümüikya kaxtsao oli ma athong-ana laxle tüikoxle.

⁷Pongwang angkya Tsaotsüt ma thaikya chitüi thüikoxle anyi lükya Tsaotsüt chilax ngose.

⁸Ikoxle Zange chix khünaknu ma thaikya atak üntoxle thüi: “Jowanpa-e thüile: Hanpakbu hüile ngole; otue kue Israel hia Jehudi khünakbu füi Tsaotsüt hozün zingüi hex.

⁹Kue hwom chak ma syet üntoxle Ijip angkya lai ang koxkya nyix hwom putong hwom füi, kue Tsaotsüt tankya ningle; ija a münchang angkya changle. Kue hwom füi zingkya Tsaotsüt kax ma laxle, chitüikya khoma kue, hwom jao to mong chikox.

¹⁰Athax ija hanpak hüikya zuma, Kue Israel khünakbu füi mok angkya Tsaotsüt tuita changle; Kue ku wanlombu, hwom mong ma shole faüi; ibu hwom kün mong ma zale faüi, Ku a hwom Zang ang; hwom a ku khünaknu ang changüi.

¹¹Hwom opupuechu nokpu tomtom ang, anwot-ano angkya münchang, chichangba ‘Zang tsinglax’ le, manok maza füi münakax; hixkya makhange chongkya kople, hwom pangnue wüi ku tsingüi.

¹²Kue hwom ochaxbu thailak koxüi; hwom ochaxbu mong ma münthom.”

¹³Ozün Tsaotsüt zangwün tokhange, Zange owang pongkya mix ozang ang achang; üntoxle chemli ozang ang tamchu oshan ang achangpuix, ija lebama wüi osün chingün le changüi. Le changüi.