Read Wancho Naga Jakop 1 Bible Online

Jakop 1 - Wancho Naga bible

Jakop 1

¹Zang tamchu Jowanpa Jisu Khrista da Jakop tokhange: Chaxwan tok ma chiakle tüikya Zang khünaknu nok hato salam.

²Kutüi kunaohom, otue hünzom lomtang ma thwontsing pangnu oli apongüihex, izuma hünzom shomüi mixbu changpu le texlax,

³chemthüi-koxle iningkya thwontsing to otue hünzome mongong makhange lütüihex, izuma adu tsuak angkya zong alaile.

⁴Nang chasa tsün tsongle atya angkya hanpakma üntoxle chem machu thaithaxkya chitüi le okhongui angkya hanpakma, adukyae mwot tsuak ang laxkox.

⁵Ikoxle hünzom khama owawa je-hwon ma okho chinguikya mix jangtüi thüiba, chixe Zang ma ju ang laxkox; chemthüikoxle thaikya lomle chingo homle mongtsukya füi koxkya Zange ija chix ang faüi.

⁶Ikoxle chixe jukya zuma mongao hia anakya chemchu chitüi le ju angkya changle; chemthüikoxle mongao tüikya mix a zangwin to jeple ahamkya tinu tichap ningle changpu.

⁷Iningle tüikya khünake, Zange chix ang tütalichu koxüile taxtex;

⁸chemthüikoxle chix a ma mwotkho chijatkya mong anyi füikya mix changpu.

⁹Chitüi-chinangkya khristabu Zange hwom nwon pongma mongmüi angkya oli changpu,

¹⁰üntoxle hakpa-luapa khristabu Zange fangto ajo pongma hwom mongmüi angkya changle, chemthüikoxle ahak-aluakya a kotho maipua ningle zale leünüi.

¹¹Zanghan khamle huakle dong üntoxle opün zokle ashun; ija opua dütle pao, üntoxle ija osün amale awüt. Ilailaile hwom thalex juatai mwot to sütngo pongma ahak-aluakyabu max ang tomüi.

¹²Thwontsing pongma adu ang thokyabu mohiman, chemthüikoxle otue hwome iningkya thwontsing kaile le ang thopuix, chix to mongkünkyabu ang koxüi hexo le Zange tsaole thomkya khüzün khohom hwome kopüi.

¹³Kem to iningle thwontsinge wankya zuma: “Ija thwontsing Zang tokhange hüikya changle”, le keme chithüiüi; chemthüikoxle haxshixe otuechu Zang thwontsing ang müntho, üntoxle Zange owatochu thwontsing le münchang.

¹⁴Ikoxle otue khünak tuita to ma mikzalokyae abe-achapüi hex, tamchu jikle paoüihex, izuma chix to thwontsingle.

¹⁵Ifüima ochax lom to mongzokkya otue kem ma awoküihex; ochax puxle alaiüi; üntoxle otue ochax tsongle hüiüi hex, zik puxle alaiüi.

¹⁶Ku mongkün tüinaohom, hünzom dyen-ngan ang taxtom!

¹⁷Müikya tamchu okhonguikya hingho pangwüi zangkangting tokhange hüikyabu changpu. Ija a, ding to zangngai zingle alaikya, owa tamchu chijei chichangba loploplüi le chitüi, ija Zang tokhange hüikya changle.

¹⁸Chix chakzing pangnu khama kem ang pongwang lükya chifün tüi angkya kuxma, chixe kem, otsingtsing kax füi chix mongtex makhange kem ozün ang achangle dan.

¹⁹Ku mongkün tüinaohom, ija texle ataklax! Apa ang pangnusa wüi mom angkya changle, ikoxchu zangwün ang hia mongtsik ang zaxhun ma changkoxtix müiüi.

²⁰Khünak mongtsik makhange Zang mongtex sukya moktsuaküi le münchang.

²¹Idaile hünzome chitsaokya oli pangnu üntoxle awangle ngokya chimüikya ochax awütlax, üntoxle nang mong ma hüikya kax ojae nang azün ang thoüi hex, somdangle ija kax pongle koplax.

²²Chix kax apa lanlankyae nang to dyen-ngan ang taxtom; itülüi, Ija mwot ang achangle mok kox.

²³Kax apa zaza laxle mwot ang achangle chimok thüiningle nang a süntsing to hulaxle, chemle tüipuix ilailaile, ma alüile ngünle laxkyabu füi tuita.

²⁴Hwome ma to alüile müile hu üntoxle pao ilaxle jantakya bama wüi ma chemle tüikya dai le alakle asam.

²⁵Ikoxlechu khünaknu ang khangkho angai le koxkya sukya wanlom to hu üntoxle atat zaza laxle asam le chichang homtoxle mong ma tikshingshing le kop üntoxle mwot ang achangle mokle jangchang thüiningle, nange mokkya mwotlom pangwüi ma nang to Zange mohimanüi.

²⁶Khünak owawae ma mong alüile dyen-nganle malualua to ma atsaole texlanlan laxle ma akumathumkya chitüi homle jangtüi thüiba, chix otsao zanglom ma chem lap müntüi.

²⁷Zang kem Hopae, changkya üntoxle otsao zanglom ang ekya a ija changle: Hwom sikngün pongma zomnu khaxsabu to humekya üntoxle chaxwannu onu-oma chemechu nun-maokya chitüi le malailai to ibu füi atsaile ngo tsuakkya, ibibi changle.