Read Wancho Naga Jakop 2 Bible Online

Jakop 2 - Wancho Naga bible

Jakop 2

¹Kutüi kunaohom, fuazangkya Jowanpa, kem Jowanpa Jisu Khrista to ongkya khünakbu daile, hünzome otok sünngün khoma khünaknu to masüi mixlüi le taxtüi.

²Namthütba hun khoptüt langlaxle tamchu nyimüi awunlaxle hakpa sün hünzom tusox to ngui, üntoxle nyitsyen zahom laxlaxle zasa sün tuitachu wüi ngui.

³Müikya nyiwun füikya mix onüi achuak achen üntoxle chix ang thüi: “Ija ngwotnui amüikya koplax”; ikoxle zasa sün ang thüi: “Chuja khato ajongle ngolax chichangba ku chitong ma thungle.”

⁴Ile jangchang thüikoxle mapai mixzünkya ma süisüichaple mokkya tamchu chisukya lom tokhange kaxfün fakya olom ma hünzom thaikya münchang lea?

⁵Ku tüinaohom, apahüi! Mongong ma ahak-alua ang tamchu chix to mongkünkyabu ang tsaole tüikya wangting kop angkya kuxma Zange Ija chaxwannu angkya chitüi-chinangkyabu pai-zün lelaxle.

⁶Hünzome ibu zasabu wün ahaipu! Ikoxle hünzom to zothupkya tamchu kaxfün mixbu thüntho to hünzom linle apüikya; ibu a hakpa luapabu münchang hia?

⁷Hünzom ang fale tüikya münmüi zongto kaxchax akaxkyabu a hwom changle.

⁸“Ma bütukuxle tomzi to mongkün kox”, le Otsao Lai ma bangkya Wangting wanlom kax ma laxle hünzom jangtüi thüikoxle hünzome sukya mwot mokle hüikya ang changüi.

⁹Ikoxlechu otok sünngün to hünzome mapai mixzün le jangchangba hünzome ochax lyenpu ilaxle kax ma chilaxle tüikyabu le wanlome hünzom ahaile.

¹⁰Chemthüikoxle Wanlom tuita kax ma chilaxle tüikya mix a, Wanlom pangnu kax ma chilaxle thaikya ang achangüna.

¹¹Chemthüikoxle “Chinunchakkai le taxtüi”, le thüikya wanlom tuitatae wüi “Mix mik taxamüt”, le thüile. Nange chinunchakkai le münchang ikoxlechu mix mik amüt le jangchangba nang a wanlom pünkya mix ang achangpu.

¹²Kem mongtex pankya wanlome kaxfün fa angkya awankya khünakbu ningle zangwün kox ilaxle mokkox.

¹³Chemthüikoxle chingcha chitüikya mix kaxfünkya zuma Jowanpa-e chix to chingchakya müntüiüi; ikoxle kaxfün to ngaxchu chingchae wüi athakdaoa.

¹⁴Kutüi kunaohom, mae mokle chiaho thüiningle hünzom khama owawae chix ma mongong tüipule thüikya ma lap chemtüi? Ija mongonge chix khosün ang tho angchami?

¹⁵Thütba tüinao chichangba nanao hwom nyiza ma tuile ngo tamchu sax ang süt okhonguile chitüi.

¹⁶Hwom hanpakma laxli mwot-kat chikox homtoxle: “Zange hünzom to mohiman hüi! Hünzom tsangtsa zanglomlu le tamchu wokfwot tilan müile saxling ngolax”, le hünzome kaxzaza ma akaxkya ma lap chemtüi?

¹⁷Ilailaile mongongchu mwot chiwom homtoxle chix tata omang changle.

¹⁸Ikoxlechu owawae akaxüi: “Mixsün tuita ma mongong tüi, mama sün ma a mwot tüi.” Ku kaxlan a: “Mwot chitüi homtoxle mongong tüitsuak angkya mix ku hama ahohüi. Kue ku mongong nang hama mwot makhange ahofang.”

¹⁹Zang tuita wüile nange ongpuix nyi? Müihule! Bao-echu wüi ongle üntoxle namabün le zale.

²⁰Ikoxle, O anga! Mokkya mwot chitüi homtoxle mongong tata ma chem mwot müntüile nange ahose tsupuix nyi?

²¹Kem hopu Abraham Zang zongto sukya ang chemle achang? Ija a zomtong ma, sasün Isak tö koxkya chix mwot makhange changle.

²²Chix mongong hia mwot nyi tomle mokkya; chix mongong chix mwot makhange okhonguikya ang achang; ibu nange ngünpu.

²³“Abrahame Zang to mongong, üntoxle chix mongong khoma Zange chix atsaole pongle lax”, le akaxkya Otsao Laikax changle kotok to ngai. Ikhoma Abraham ang “Zang shempa”, le nyak.

²⁴Idaile mongong tata khomale chichang homtoxle mwot füi tomle tix Zang zongto khünak tuita sukya mix ang achang angkya hünzome ngünpu.

²⁵Tsahangcha Rahap füichu ile wüi chang. Israel nok zyetmixbu she hom ma athong ang kox üntoxle mama chito khange paole hwom azang ang tomkya khoma, she mwot makhange she Zang zongto sukya ang achang.

²⁶Ikhoma, chasa chitüi homtoxle tsangtsa chemle omang changpuix, ilailaile mwot chitüi homtoxle mongongchu wüi omang changle.