Read Wancho Naga Jakop 3 Bible Online

Jakop 3 - Wancho Naga bible

Jakop 3

¹Kutüi kunaohom, hünzom aluile nwotmixbu ang chiachang koxle müiüi, chemthüikoxle hünzome awan ngopu, kem hwon-nwot mixbu kax mixfüi ataxle tsakle fün angkya changle.

²Kem othuithuima thaihompu. Ikoxle ojao chithaile zangwünkya khünak jangtüi thüikoxle, chix okhonguikya mix tamchu chix tsangtsa komle akumathum ang thokya mix changle.

³Kem kax ma laxle tüi angkya kuxma keme man wikha ma danglang ataple kox, üntoxletix kem mong atsutsu chito ija aham ang tsuakpu.

⁴Chichang thüiba khua tuita ajangle anohu: Ipongpong chongkya tamchu zangwin zongkya füitix jeple ahamkya changkoxlechu lak füi khuachei mixe chix mong atsutsu chito chüile pao ang thole.

⁵Le bamachu ija ningle changpu: Ija muaküsa changle, ikoxlechu tüpong-tüpong tsaichong-kaxbongle tüi ang tsuakle. Tüpong-tüpongkya faonu ngaxchu amoküsa wünchua füi zokle ashun ang thokya bama ajangle anohu!

⁶Le a tuita wün ningle changpu. Kem mik-chak khama le a tuita chitsaokya chongkya changle. Ijae tsangtsa komle chitsaokya ang achangle, ilaxle tsünpo ma jao wün alaile tamchu ija to haolum e wünnu adün ang tomle.

⁷Khünak keme müi nüjen, o nüjen, alyangle ahamkya nüjen, tamchu nax nüjen pangwüi tsom laxle kax ma laxle tüi ang tomle.

⁸Ikoxlechu anyix kople le tsom ang thokya mix owachu matüi. Ija a zik-hinge awangle tüikya tamchu akumathum ang tam chithokya ochax changle.

⁹Keme ija le zingpupa Jowanpa tamchu Hopa ang münchong fa angkya hanpakma üntoxlechu Zang lailaile zingkya khünak thuakzom ang twonle.

¹⁰Münchong fakya hia thuakzomkya kaxfabu leza tuitata makhange wüi alaile. Kutüi kunaohom, ija ile chichang angkya oli!

¹¹Tümik tüta khatochu ti tikya hia khaxkya nyi mikta makhange tomle münfuak.

¹²Fupsa pün tuita ma otuechu olip münziak; grep zu tuita ma otuechu fupsa münziak, ilailaile humlua makhange otuechu tsaothakya ti münlai.

¹³Hünzom khama tsingwankya hia jetüi hwonlangkya mix owawa tüicha? Chixe puinaikya hia je-hwon füi mwotmüi mokkya hia tsün müile ngokya tokhange ija kaxkhi fa angkya changle.

¹⁴Ikoxle ma mong khato nang ma khukya, khaxkya, nüfux, ibu tüile jangchang thüiningle nang a je-hwon khoma tsaichong-kaxbongkyae otsingtsing zongto ochax taxlyen.

¹⁵Iningkya je-hwon zangkangting tokya münchang; ija a chaxwannu kux, ija a chitsaokya tamchu bao füikya changle.

¹⁶Ojongto tata to khukya hia khaxkya nüfux tüiüi hex, ikhato won chimüikya tamchu ochax pangnu oli tüile.

¹⁷Ikoxchu thakchi tokya je-hwon a pongwang ma tsaotha le changüi; tamchu ija a mongsomjale, somdangle tamchu asyen-abui le changüi; ija a chingchajaja oziak opuae awangle tüile; ija a mapai mixzünkya tamchu künkux-mongkwom füi janle tüile.

¹⁸Tumüi lomzingkyabue tumüi ma küi-thwomle toxkya oziak opua angkya otsao mongsom khaile tüile.