Read Wancho Naga Jakop 4 Bible Online

Jakop 4 - Wancho Naga bible

Jakop 4

¹Hünzom khama tata füi achax-azankya hia ahe-atsikya ojong tokhange hüi? Ibu a ojao chizak le hünzom mong khato azanle ngokya mongzok tokhange laikya münchang hexnyi?

²Hünzome lomkya oli hünzome kop ang chitho, ikhoma hünzom mik amüt ang atha-anyem; hünzome mong ma tületüle laxse tsu, ibu kop ang chitho, ikhoma hünzom azan tamchu ahe. Hünzome laxse tsukya hünzome kop ang chitho chemthüikoxle ibu hünzome Zang ma chiju.

³Üntoxle hünzome jupongma ibu hünzome chikop, chemthüikoxle hünzom tutexbu a chimüi; jukya oli hünzom mongzom ma müi angkya olom ma twon ang hünzome jukoxle.

⁴Hünzom chaxwannu zuikhui ang achangkya a Zang zongto zan ang achangpu le hünzome matsing hia? Hünzome chaxwannu zuikhui ang ngose tsukya a malailai to Zang füi zan ang achangpu.

⁵“Zange kem ma ngo ang tomkya chasa to Zange tüle akhüixle”, le thüikya Otsao Lai kax kaxbi ngaoba le taxlax.

⁶Ikoxlechu chixe fakya chingcha ifüi sütsexkya changle. Chemthüikoxle Otsao Lai-e thüile: “Ngamkyabu to Zange abaxle, ikoxle puinaikybu ang chixe chingcha fale.”

⁷Idaile hünzome ma alüile Zang chak to danlax. Bao to abaxlax, jangchangba chix nang thoto paoüi.

⁸Zang hato soxle hüikox, ikoxle chix nang hato soxle hüiüi. Ochax khünakbu, hünzome ma chak tsuxlax! Künkux-mongkwombu, hünzome ma mong atsaolax!

⁹Mongmakya tüilax, soplax, üntoxle mikfi ajenlax; hünzom nyit sopkya ang achanglax, hünzom mongma mongmüi ang achanglax!

¹⁰Jowanpa thüntho ma hünzom puinai le tüilax, ile jangchangba chixe hünzom asale nwonüi.

¹¹Kutüi kunaohom, hünzome tata to kaxma taxthüi. Opupue mix ang kaxma thüipuix chichangba mix kaxfün puix, chixe wanlom füi kaxma akaxpu tamchu wanlom kaxfünpu, ikoxle nange wanlom kaxfün le jangchang thüikoxle, nang a wanlom lwot tokya mix chichangle kaxfünkya mix ang changpu.

¹²Wanlom fakya mix tamchu kaxfün mix tuita wüi, ija a Zang changle, owae sün ang tsuak ilaxle amüt angchu wüi tsuakpuix. Jangchang thüiba ma tomzi bama kaxfün fa ang nang owa changlax?

¹³Anyix chichangba ngainyix kwom ija tingsho to paoüi ilaxle ikhato zanglao atale thalexle ngunkop-syenloüi, le akaxkyabu, hünzome ku kax apa hüi.

¹⁴Ngainyix nang tsün chemle changüi hex; ingaxchu hünzome tsingle chitsuak! Chemthüikoxle, onox ma ngünlan toxlaxle amuale maxkya wünkhut hünzom changle.

¹⁵Hünzome akaxse a ija changkya: “Jowanpa mong jangtsuba kwom ozün ma ngoüi, ilaxle ibu chichangba ebu moküi.”

¹⁶Ikoxle athax hünzom ngampu, üntoxle tsaichong-kaxbongpu; ibu bong-chongkya pangwüi othai changpu.

¹⁷Ikhoma, keme mok angkya müikya olom awanlaxle chimok thüikoxle, ija kem zongto ochax changle.