Read Wancho Naga 1 Pitar 1 Bible Online

1 Pitar 1 - Wancho Naga bible

1 Pitar 1

¹Jisu Khrista wangshem Pitar tokhange: Pontas, Galatia, Kapadosia, Asia üntoxle Bithinia haxtokbu to püntüibu ningle chiakle tüikya Zange zünle kopkya khünaknu hato.

²Jisu Khrista kax ma laxle tamchu chix aji makhange atsaole ngo angkya hanpakma Hopa Zang mongtex makhange zünle kopkya tamchu chix Chasa makhange otsao khünakbu ang zingle tüikya a hünzom changle. Chingcha hia mongsom okhongui le hünzom kux ang naxchang.

³Zang tamchu kem Jowanpa Jisu Khrista Hopa ang keme münchong fahax! Chemthüikoxle Jisu Khrista chatle azangle zo ang koxlaxle chix chingcha chongkya makhange chixe kem ang tsün hozün fale. Ija makhange kem a khüzün monghome awangle,

⁴ikhoma Zange chix khünaknu ang kox angle thomkya ahak-aluakya mohiman kop angkya to keme hule tanpu. Shanle chipao angkya chichangba chima angkya chichangba za le chipao angkya, ibu chixe hünzom hanpak ang zangkangting to thomle.

⁵Ibua, oshuk ma ngaile aho ang achwonle tüikya khosün bama mongong makhange Zang tsakzonge sünle thomkyabu hünzom hanpakma changle.

⁶Tüning-tüningkya sikngün hia thwontsingbu tokhange onoxnox ma hünzom ang mongma angkya tüihukoxlechu, ija bama mongmüikox.

⁷Ibu a nang mongong ojing tomtata changle le aho angkya hanpakma changle. Ma ang tho angkya hun tangtang ngaxchu wün füi wanle anole; ilailaile nang mongong oja hun füi thanu achongkya hex, Ija a adukya alai angkya kuxma, wan angkya jaojao changle. Ile changkoxtix Jisu Khrista ngaikya nyix nange achuak achenkya, fuazangkya üntoxle chathua zakya kopüi.

⁸Nang mike tümangün ikoxlechu nange chix to mongkünpu, ipongkhae nange chix chingün, ikoxlechu nange chix to mongongpu. Ikhoma nange kax ma ngai ang chitho le mongmüi ma tamchu fuazangkya füi nang ang pwonla dongpu;

⁹chemthüikoxle nange chix to mongongkya mongtex chem hex, ija mongtex, nang chasa khosün nange kople tüikoxle.

¹⁰Zange hünzom ang fa angkya hingho ibu bama ajekya ajebue ija khosün tangchua ilaxle azongle lom.

¹¹Ija otue tamchu chemle nguiüi hex le hanpak zanghan awan ang hwom tüle azong. Hwom ma tüikya Khrista chasae hwom hato küithole hile apua ngokya a: Khrista-e tületüle sikngün apong angkya ikoxchu ifüima tületüle fuazangle lai angkya hanpak changkya.

¹²Zangkangting tokya ajokya Otsao Chasa tsakzong makhange kaxho mix opange hünzom hama ibu Kaxho Müikya apukkya hünzome atat laxpuix, ibu a kaxtaimixbue ngaxchu tsingle laxse tsukya oli changle. Ija kaxho pongma ajebu ang Zange ibu a hwom lap hanpak münchang ikoxle hünzom lap hanpak changle le angaile kox.

¹³Idaile mok angkya hanpakma hünzom kün-mong achwonlax. Mik-hingle ngolax üntoxle Jisu Khrista ngaikya zuma hünzom ang fa angkya mohiman to hünzom ang monghomkya tüilax.

¹⁴Zang kax ma laxle tüilax, üntoxle nange chemchu chitsingle ngotanto tüikya osing mongzao füi nang im-jo le taxtüi.

¹⁵Itülüi, nang ahyenle laxkya Zang chemle Otsao hex, ilailaile nangchu wüi mokkya olom pangnusa ma tsaole tüilax.

¹⁶Otsao Lai-e thüile: “Nang otsao ma ngolax chemthüikoxle ku a otsao changle.”

¹⁷Khünaknu nok ang, mamwot mwot ma thütle, mapai mix chizün homle otya kaxfün fa angkya Zang ang zangjop pongma hünzome “Apa”, le nyaktüi; jangchang thüiba ija chaxwannu ma tsün ngotanto chix chathua zale ngokox.

¹⁸Chemthüikoxle hünzome pupa tsün tokhange kople hüikya obato maxün angkya hünzom khüzün shak ang otha chem thompuix ija hünzome awanpu. Ija a ma ang thokya hun hia jangjong fang chichang;

¹⁹Ija a ofwot chizaikya hia münwan chitüikya Chun Hosa Jisu Khrista thalix aji changle.

²⁰Chix a, chaxwannu zingüi thoto wüi Zange kamle kopdaokya mix tuita üntoxle hanpak oshuk nguile hüi pongma hünzom hanpak ang chix ngai.

²¹Chix zidaokya chatle azang ang tom ilaxle fuazang ang tomkya Zang to hünzome chix makhange tix mongongpu; ikhoma hünzom mongong hia monghom tangthole Zang ma thompu.

²²Hünzome otsingtsing kax ma laxkya füi künkux-mongkwomkya chitüi homle, tüinaoe tüinao to mongkün angkya hanpakma hünzom chasa tsaothale zingle fakoxle, hünzom tüinaoe tüinao to mong bakle koxkya füi, küntsao-mongtha le tamchu chizakle akün-aluale tüikox.

²³Chemthüikoxle ozün ma tüikya tamchu oshuk chitüikya Zang kax makhange, otuechu chizitox angkya Jowanpa susabu ang achang ang hünzom tamchatle pux ang tom.

²⁴Otsao Lai-e akaxle, “Khünaknüsa nok wüi fum-sui ningle; hwom fuazang bakle fao maipuabu ningle. Fumsui zile pao, üntoxle maipuabu dütle sam;

²⁵ikoxlechu Jowanpa kax othuithuima ngo.” Ija kax a hünzom hato apuk-apuakya Kaxho Müikya changle.