Read Wancho Naga 1 Pitar 2 Bible Online

1 Pitar 2 - Wancho Naga bible

1 Pitar 2

¹Jowanpa ipongpongle müikya hünzome wanle jang anodao thüiba, chimüikya oli pangnu, atsekya pangnu, künkux-mongkwom, osing-nüfux üntoxle tsaima-kaxshix pangwüi awütdao.

²Nampux tankya naosasom lailaile, hünzom khosün hato alople tsong angkya hanpakma tsaothakya chasa tsomti ma alankya tüilax.

³Otsao Lai-e thüile, “Jowanpa a müikya changpu le hünzome wanlax tamchu hulax.”

⁴Khünaknue chilaxli le awüt ikoxle Zange ija achongkya le kamle lax, ija Jowanpa ozün ma tüikya long hato oman.

⁵Ozün ma tüikya longbu ningle hünzom chix hato hüilaxle, Jisu Khrista makhange Zange pongle koptsuakkya lima chasa tö koxkya khato otsao nguapabu ang achang ang tamchu chasa zangshwom-hom zing angkya to hünzom twon ang laxkox.

⁶Chemthüikoxle Otsao Lai-e akaxle, “Kue thalix long tuita zünle koppu; ija kue Zaion ma homkom-longnu ang dan; opange chix to onglaxüi hex, mong athokya müntüiüi.”

⁷Mongongkyabu hanpakma ija long a thalix changpu; ikoxle chiongkyabu zongto ija a: “Zingpabue chilaxli le awütkya long; homkom-longnu akhokya tuita ang achang.”

⁸Anaolechu Otsao Lai-e thüile, “Ija a tuita khünaknu asua angkya long; hwom ati ang koxkya longnu tuita changpu.” Hwome chiongkya khoma ija kax ma hwom asua; ikoxlechu ile chang angkya a hwom hanpakma laiua changkya.

⁹Ikoxlechu zangnaknu khatokya khompua atsikkya zangngai hato Zang ohünotün mwotbu apuk-apua angkya hanpakma kamle kopkya jat-li, chongwang nguapabu, otsao ting-nok, Zang zongto ma khünaknu a hünzom changle.

¹⁰Hanpak tuita ma hünzom a, Zang khünaknu chichangkya; ikoxlechu athax hünzom a, chix khünaknu changle; hanpak tuita ma hünzome, chix chingcha chitsingkya; ikoxlechu athax hünzome, chix chingcha pongle kopdaoa.

¹¹Kue mongkünle texkyabu, chaxwannu ma mixwünbu tamchu püntüibu ningle kue hünzom ang thüipu: chasa füi alünle azankya müi-hi-aji küntsu monglua füi hünzom atsaile ngolax.

¹²Songsari khünakbue chem bama, oma mwot mokkyabu thom, le kaxhux fele hünzom to kaxma thüiüihex, ija bama hwome hünzom mwot müikya ngünlaxle, chix nguikya nyix Zang fuazang ang tomkya lima, hwom khato hünzom zanglom saikha müile tüihüi.

¹³Jowanpa kuxmale hünzom a khünak wanlom pangnu fangto puihüi. Wanghom ang chix pangnu thak ma apünkya mix le,

¹⁴gowarnorbu ang oma mwot mokkyabu to sikangün angkya üntoxle mwotmüi mokkyabu achuak achenle chang angkya hanpakma Jowanpa-e ajokya changpu le hwom kax ma laxle tüilax.

¹⁵Chemthüikoxle hünzom mwot müikya tokhange ongatbue kaxbi ngaoba kaxzexkya adang angkya Zang mongtex changle.

¹⁶Khangkho ngaikya khünakbu ningle ngolax; bachutix hünzom khongai ochax to chwop-khom ang taxtwon, ikoxle Zang zongto dahaibu ningle ngolax.

¹⁷Pangnusa chathua zale tüikox, mongong ma tüinaohom to mongkünle tüikox, Zang thua zakox, üntoxle chongwang chathua zale tüikox.

¹⁸Dahaibu, hünzome chazakya füi müikya tamchu somdangle tüikya hopupa thua zakya tata chichangle zongzanle tüikya hopunu chathuachu zale tüikox.

¹⁹Jowanpa tutex bama khangka hingkya füi olom ma chihüi koxlechu mae apongkya sikngün adule jangtüi thüiningle, ija khoma Zange adukya mix to mohimanüi.

²⁰Chemthüikoxle ma thaikya khoma chak kopkya to adukya mix ang achuak angkya chemtüi? Ikoxlechu ma chithai khato kopkya sikngün adukya mix to, ija khomale Jowanpa-e mohiman faüi.

²¹Zange hünzom nyakkya a ija khoma changle, chemthüikoxle hünzome chix man to angkya kuxma Khrista chix tomtata hünzom khülüix to sikngün üntoxle hünzom hanpakma apyen angkya kaxpan tuita tox.

²²“Chixe ochax chemchu chimok, chichangba chix tunpün makhange, kaxthai zang wünkya, owaechu chiatat.”

²³Chix adix-ada pongma anongle chixe adix-adale chichang; chix sikangün pongma chixe aza-anale chichang; ikoxlechu otsingtsing kaxfünpa, Zang ma chix monghom thom.

²⁴Kem ochax ma zi üntoxle otsao hanpakma ozün ma ngo angkya kuxma, Khrista-e kem ochax chix tsangtsa ma pünsak hato hünle pao. Hünzom komle müi ang tomkya a chix ma mak-khakya tokhange changpu.

²⁵Hünzom a lom asam daokya chunbu ningle changlea, ikoxle athax a chunnyetmix tamchu chasa nyetmix füito azui ang hünzom a chatle chat ang tomdaoa. E chat ang tomdaoa.