Read Wancho Naga 1 Pitar 3 Bible Online

1 Pitar 3 - Wancho Naga bible

1 Pitar 3

¹Ilailaile hünzom kakonubu, hünzom ma kakopabu owawa Zang kax to chiongle tüikoxlechu, ma kakonu zanglom saikha müikya tokhange,

²thüikoxle hünzom chathua zakya hia tsaothakya zanglom saikha ngünlaxle, Zang kax füi chichang koxlechu iningkya makhange thüingaxchu hwom kop ang tho angkya bama, ma kakopabu fangto puile ngolax.

³Hünzom osün amüi ang otok zapua, thütba khoshit nasaikya, hun lik-wün laxkya chichangba nyiza laxkya, iningkyabu aza-apuale taxchang,

⁴ikoxle mong othongdua to, künsom mongdang hia dangjajakya chasa, omüt osam chitüikya zapua ang achanglax; ija chasa a Zang miksho ma thalix changle.

⁵Chemthüikoxle kaipongma otsao mixchabue, Zang to monghomkya füi, ma kakopabu fangto puinai le, hwome ma sün amüi ang tom.

⁶Sarah a iningkya mixcha tuita changkya. She-e Abraham kax ma lax ilaxle chix ang hopunu le nyak. Hünzome chem müipuix ija mok üntoxle tüta thuachu chizale jangtüi thüiba, ipongkhae she susabu ang hünzom changle.

⁷Ija lailaile hünzom kakopabuechu ma kakonubu füi, mafüi hwom wüi zong chitüikya le tsingkya füi ngo angkya oli changle. Hwom chathua zakox, chemthüikoxle hwomechu wüi hünzom füi tomwüi Zang angkya khüzün hingho mantswon angkya changle. Hünzom zangjop to poxpyen angkya chemchu chitüi angkya kuxma ija moklax.

⁸Oshuk ang: Hünzom pangwüi mong tuita ma, chingcha jajakya tüi-hi-nao ningle künkak mongkün füi mong nonai tamchu künsom mongdang le changlax;

⁹oma lüix to oma chichangba thuakzom lüix to thuakzomle jan anongkya taxtüi; itülüi, mohiman mix laxkox, chemthüikoxle mohiman a Zange hünzom nyakkya zuma hünzom ang koxüile tsaokya changle.

¹⁰Otsao Lai-e akaxkya ningle, “Owae khüzün to mongkünse tsu; tamchu hanpak omüi ngünse tsupuix; kaxma-ngaoshix taxakax, üntoxle atse le zang taxwün.

¹¹Ochax tokya chix chatlax, üntoxle mwotmüi moklax; mong bakle koxlaxle; mongsom tangchualax.

¹²Otsao khünakbu khangkho ma, Jowanpa-e nyele ngole; ilaxle hwom zangjop to apale; ikoxlechu ochax mokkyabu to chixe abaxle.”

¹³Mwotmüi moksele hünzom mongto tsukyabu jangtüiba hünzom zongto chichangle owa tüiüi?

¹⁴Ikoxle sukya mwot khoma hünzome sikngün apong angkya jangchang thüiba, hünzom otukuxkya mohiman! Owa thuachu taxza üntoxle taxaban.

¹⁵Ikoxchu hünzom mongtsang ma, Khrista a Jowanpa changpu le achuak achenkya tüilax. Hünzom ma tüikya monghom bama owawae kaxtik-ngaoshokya jangtüiba, chix kax to lan ang othuithuima achwonle ngolax.

¹⁶Ikoxlechu ija kax to zingmüi ma tamchu chathua zakya füi lankox. Hünzom zanglom saikha müikya ngünlaxle, Khrista füito azuikyabu le hünzom ahai le ada pongma hwome thünzak kop angkya kuxma hünzom tutex tsaotha le thomlax.

¹⁷Chemthüikoxle, ija Zang mongtex jangchang thüiba, ochax mokkya füi müikya mwot khoma sikngün apongkya wüi amüikya changle.

¹⁸Chemthüikoxle hünzom Zang hato apüi ang, ochax khünakbu khülüix to müikya khünak tuita Khrista, nok hanpakma tamfang ma ochaxbu bama zi. Tsangtsa ma chix lang ang kox, ikoxlechu chasa ma chix azang ang tom,

¹⁹üntoxle chasa khüzün ma paolaxle chixe kople thomkya chasabu hato hwon-ano.

²⁰Hwom a, Noa-e khua müile ngopongma, Jowanpa-e ozulole adule tan koxlechu Zang kax ma chilaxle tüikya chasabu changkya. Ija khua ma tüikya hwom mixhuak achyet, ti zan to max ang chitom le khosün,

²¹Ija a athax hünzom khosünle tüikya, ti ma baptikya ocha ahokya tuita changpu. Ija a tsangtsa angkya ziak sole awütkya chichang, ikoxle tutex omüi makhange Zang tunthoma tsaosaxkya tuita changpu.

²²Zangkangting to donglaxle Zang tsaxchi kao ma thung üntoxle owae kaxtaimixbu tamchu zangkangting tsakzong thakma apün-adale ngopuix, Khrista chix chatle azangle zokya tokhange ijae tsuakle.