Read Wancho Naga 2 Pitar 1 Bible Online

2 Pitar 1 - Wancho Naga bible

2 Pitar 1

¹Jisu Khrista wangshem tamchu chix da tuita Simon Pitar tokhange: Zang hia khosünpa Jisu Khrista otsao ma hwom füi tomle tuita thalix mongong kopkyabu hato:

²Zang hia kem Jowanpa Jisu Khrista tsingwankya tokhange chingcha hia mongsom thakho nguile hünzom hanpak ang naxchang.

³Owae ma fuazang hia ataxle müikya süntswon ang kem sele laxpuix, keme chix awanle laxkya makhange, kem ozün ma tüipongma tamchu otsingtsing zanglom tsün ngopongma laxli komle Zang otsao tsakzong makhange kem ang fadaoa.

⁴Ibu tokhange kem Zang jaopo ma wom angkya üntoxlechu ochax tutex khoma laikya chaxwannu tuma wanshix tokya azangle tsuak angkya bama, chixe kem ang tsaodaokya achongkya tamchu thalix hinghobu kem ang fadaoa.

⁵Ija khoma hünzom mongong to onüi müikyae bo; onüi müikya to tsingwankyae bo;

⁶tsingwankya to alüile akumathumkyae bo; ma alüile akumathumkya to adukyae bo; adukya to otsaoe bo;

⁷otsao to khristan künkak mongküne bo; khristan künkak mongkün to mongküne bo; le chang angkya hanpakma hünzome tsuakkya apongle azongle moklax.

⁸Chemthüikoxle ibu hünzom kux ang achang üntoxle sisile zaxle jangtüiba, ibue hünzom ang Jowanpa Jisu Khrista tsingwankyae ma chiziak chipua le tüi ang müntom.

⁹Ikoxle hünzom ma ibu chitüi jangthüiba, hünzom a cha tokya ngün ang chithokya tamchu amipongkya ochax tokya ma khosün kopkya alak daokyabu changle.

¹⁰Ikhoma, ku mongkün tüinaohom, Zange hünzom nyakkya hia zünle kopkya bama komkaile awan lax ang zongbakle azonglax; hünzome ile jangmok thüiningle otuechu ma mongong dantoxlaxle münpao.

¹¹Chemthüikoxle iningle tix kem Jowanpa tamchu khosünpa Jisu Khrista oshuk chitüikya wangting to hünzom ngui ang tomüi.

¹²Hünzome ibu tsingle ngoün koxlechu üntoxle hünzome pongle kopkya otsingtsing ma hünzom tsingju kamong le tüiün koxlechu, kue ibu jento hünzom mongto texle atak ang tomüi.

¹³Ku ozün ma ngotanto ibu bama hünzom mongto texle atak ang tom angkya a ku mwot changpu le kue texpu.

¹⁴Chemthüikoxle kem Jowanpa Jisu Khrista-e ku füi ngaitho le akaxdaoa, thüikoxle, kue ija tsangtsa tsün chwonle wüi dantox angkya changle le awanle.

¹⁵Ikhoma athax ku zi füimachu ibu zangwün hünzom mongto jento texle atakle lax angkya lompong awanle fa angkya bama kue tsuakkya apongle mok angkya changle.

¹⁶Kem Jowanpa Jisu Khrista zaxzangle nguikya bama hünzom ang tsingle lax ang tom pongma kwome khünake zingle alaikya pukax to ongle chingo; ikoxlechu kwome ma mik füi chix fuazang ngündaokya mo wünpu.

¹⁷“Ija a kue mongkünkya Ku Sasün changle; chix füi ku mongzom müipu!”, le pangnu thakma akhokya fuazang tokhange kaxzing laile, Zange chix achuak achen pongma kwom ikhama tüikya.

¹⁸Kwom chix füi tomle otsao haxnukho to tüipongma; zangkangting tokhange hüikya ija kaxzing kwome atat.

¹⁹Ikhoma ajebue apukkya kaxho to otsing changpu le kwome sisile mongongpu. Anyixningkya zangngai ang machang tanto, üntoxle hünzom mong ma nyankya lyettsi malai tanto, zangnakle ngokya khato zangngai fakya wüntik tuita ningle, ija kax to hünzome mongkox koxle müi angkya changle.

²⁰Ibachu pongwang ma ija tsingle koplax: Otsao Lai kax tuitachu ma mongtex ma owaechu taitsuak angkya fang münchang.

²¹Chemthüikoxle khünak tutex makhange hüikya jekax tümüntüi. Jowanpa tokhange hüikya kaxho zex pongma khünaknu a Otsao Chasae koplaxle tüikya.