Read Wancho Naga 2 Pitar 3 Bible Online

2 Pitar 3 - Wancho Naga bible

2 Pitar 3

¹Ku mongkün tüinaohom, ija a hünzom hato anyi lükya ku laiza changle.

²Ku laiza pangnyi ma wüi, otsao ajebue kaiwüi akaxkya kaxbu üntoxle hünzom wangshembu makhange hünzom ang akaxle fakya Jowanpa tamchu khosünpa Jisu Khrista kaxtom hünzom mongto texle atak ang tomkya füi kue tsaothakya tutex hünzom mong ma azwot ang tompu.

³Hanpak oshuk ma mikza lokya lom ma ma tsün ngole hüikyabu ngaiüi, pongwang ma hünzome ija awanle koplax.

⁴Hwome hünzom wanjaile akaxüi: “Chix tamchatle nguiüi hexo le tsaokya chix omaün? Kem pupa hwom kaiwüi ziüna, ikoxlechu chaxwannu a zingpongkya ningle pangnu li wüi otyatya ma wüi tüile!”

⁵Owang pongma wüi Zang kaxtom makhange ding hia hax zingle alai. Haxwannu a ti angkya tamchu ti füi zingle alai,

⁶üntoxle kaikya chaxwannu amütkya a ti, thüikoxle tinu mualyemkya ti makhange changkya.

⁷Ikoxlechu anyix tüikya ding hia haxchu wüi, wün füi amüt angkya hanpakma Zang kaxtom tuitata makhange wüi sünle thomkya changle. Ibu a, Zang chilax homtoxle ngokyabu kaxfün angkya tamchu amüt angkya nyix hanpakmale thomkya changle.

⁸Ikoxlechu ku mongkün tüinaohom, hünzome oli tuita taxalak! Jowanpa miksho ma nyix tuita hia zanglao hajat tuita le malili müntüi; chix zongma monyi wüi tuita changle.

⁹Owawae ajangkya ningle Jowanpa a chix kaxtsao mok ang domdai pule münchang. Itülüi, chix a nang füi adule ngopu, chemthüikoxle chixe owachu amütse le müntsu, ikoxle pangnusa wüi ma ochax tokya khosün hato chatle namhüibae le texpu.

¹⁰Ikoxlechu Jowanpa Nyix a ahuxmix ningle nguiüi. Ija nyix zangdingbu tüle-tüle ozing alai le azutle paoüi, üntoxle ding to tüikyabu tüle-tüle khamkyae ashunle amütüi, üntoxle haxwannuchu ikhama tüikya zünmok füi afomle maxüi.

¹¹Ibu pangnu li ilailaile amüt angkya changkoxle, hünzom chemningkya khünakbu ang changse dai? Hünzom tsün a otsao tamchu Zang hanpak ang atsaole thomkya tsün ang ngo angkya oli changle;

¹²Chemthüikoxle hünzom a Jowanpa Nyix, oja nyix ding zokle ashun üntoxle amütüi hex, ilaxle ding angkya lyettsi-lyetsabu tületüle khamkya wünkham to achukle awütüi hex, ija nyix chwonle ngui angkya bama zongle mokmole tamchu tanle hungokyabu changpu.

¹³Ikoxlechu kem a Zange tsao daokya: Hozün zangkangting hia hozün chaxwannu, ojong khato otsaobu ngoüihex, ija hanpakma tanle nuipu.

¹⁴Idaile ku mongkün tüinaohom, hünzome ija nyix tanle nui pongma Zang miksho ma thaikya chemchu chitüi le tamchu chix füi mongsom ma ngo ang zongbakle azonglax.

¹⁵Ilaxle kem Jowanpa-e okuilo le adukya a khosün changpu le elax; ilailaile kem mongkün Pol-echu chix ang Zange fakya je-hwon füi hünzom hato zapu.

¹⁶Ilailaile chix laiza pangnu ma, kaxmik ibu mo wünle zale. Ibu khama kax züizüi a tsingle lax ang tsak le tüile. Ongat hia mong chiajingkyabu Otsao Lai kax mama khatochu tüikya tukuxle ijongkha thaile taile. Ikhoma hwome ma hato alüile omüt apüile.

¹⁷Ikoxlechu ku mongkün tüinaohom, hünzome ija awandaoa. Idaile wanlom chilax homtoxle thaile ngokya khünakbue, hünzom azangle ngokya chifün angkya adüt ang jikle chipao angkya bama mik-hingle ngolax.

¹⁸Üntoxle kem Jowanpa tamchu khosünpa Jisu Khrista chingcha ma thuithui le tsongle hüilax. Athax üntoxchu othuithuima fuazang chix kux ang naxchang! Amen.