Read Wancho Naga 1 Juhan 3 Bible Online

1 Juhan 3 - Wancho Naga bible

1 Juhan 3

¹Hopae kem to otukux mongkün puix hulax! Kem ang Zangsu Zangsabu le nyakkya kople chix mongkün chongkya tüile; üntoxle otsing tomtata ma kem a chixsu chixsabu changle. Ikhoma chaxwannue kem owahex münawan; chemthüikoxle chaxwannue Zang owahex chitsing.

²Ku mongkün tüinaohom, athax kem a Zangsu Zangsabu changle, ikoxlechu kem chem ang achangüihex ija pak müntik. Ikoxlechu Khrista nguikya zuma, kem chix lailaile achangüi, chemthüikoxle chix chemle tüipuix ija tsaotha le keme ngün ang kopüi, ija keme awanpu.

³Khrista to ija mongkün tüikyabu, Khrista chemle tsaotha le tüipuix, ilailaile ma tsaotha le tamchu sule thomle.

⁴Ochax lyenkya mix a Zang wanlom amakya ma thaile ngole, chemthüikoxle ochax a wanlom pünkya changle.

⁵Khrista a ochaxbu pao ang ngaipu, üntoxle chix ma ochax chemchu chitüi, ija hünzome awanle ngopu.

⁶Idaile Khrista füi notom le ngokyabu owaechu ochax lyenle münngo; ikoxle opange ochax lyenle ngolaxpuix hwome chix mangün üntoxle matsing.

⁷Kuli-kunaohom, owa angchu nang ochei lom to zunle pao ang taxtom! Khrista chemle otsao hex ija ningle sukya mwot mokkyabuchu wüi otsao changle.

⁸Ochax mwot mokle ngokyabu a bao kux changle, chemthüikoxle baoe ami pongwang tokhange wüi ochax mokle hüipu. Bao-e mokdaokya mwot oli thule amüt ang, ija hanpakmale Zang Hosa ngaipu.

⁹Zang jaopo chix ma ngoün koxle, owa Zang Hosa changlaxpuix, chixe ochax lyenle münngo; üntoxle Zang chix Hopa changün koxle, chixe ochax lyenle ngo ang müntho.

¹⁰Zangsu Zangsabu hia baosu baosabu malili changle le tsaotha le ahokya a ija changle: Owae sukya mwot chimok tamchu ma tüi-hi-nao to mongkünle chitüi laxpuix chix a Zang susa münchang.

¹¹Pongwang tokhange wüi hünzome atatkya kaxho a ija changle: Keme tata to mongkün angkya changle.

¹²Kem Kain ningle chichangüi; chix a onu-oma kux ang chang, ilaxle honao Abel lang. Kain-e chix büthüikoxle lang? Chemthüikoxle chix mwot a chisu ikoxle honao mwot a sukya le chang.

¹³Ikhoma, kutüi-kunaohom, ija chaxwannu angkya khünakbue hünzom thua anukya ma taxabüt.

¹⁴Keme zik dantox daoa ilaxle khüzün hato hüiüna le keme awanpu; keme tüinao tata füi mongkün tüikoxle ija awanpu. Idaile mongkün ma chitüikyabu a athaxchu omang tsakzong fangto ngole.

¹⁵Owae ma tüinao to anupuix chix mix mik amütkya mix tuita changle, üntoxle mix mik amütkya mix tuita ang oshuk chitüikya khüzün müntüile hünzome awan ngopu.

¹⁶Khrista-e kem hanpakma chix tsün koxkya makhange keme mongkün chemhex ija awan ang koppu. Idaile kemechu wüi kem tüinaohom hanpakma kem tsün kox angkya changle.

¹⁷Hakpa sün tuitae tüinao tuita tuile ngokya ngün, ikoxlechu ma tüinao zongto mongka chidap, ile changkoxle chixe Zang to mongkünpu le chemle akax thoüi?

¹⁸Kuli-kunaohom, kem mongkün a kax hia zangwün tata ma chichangüi; ija a mwot makhange ngün ang tomkya mongkün otsingtsing chang angkya oli.

¹⁹Ija tix changle kem otsingtsing kux changpu le awan angkya a; ile tix changle keme Zang womle tüikya to mongong angkya a.

²⁰Kem tutexe kem ahai le jangchangba, kem tutex füi süchongkya Zang changpu ilaxle chixe pangwüi tsingle le keme awanpu.

²¹Idaile kutüi-kunaohom, ma tutexe kem ahai le chitüiba, Zang womle tüikya ma kem ang mongchyen tüipu.

²²Keme chix kaxtombu kax ma lax üntoxle cheme chix mong amüipuix ijaja mokkoxle chix ma ajuju keme koppu.

²³Kem ang fakya Khrista kaxtom ningle, chix Hosa Jisu Khrista to mongong tüi angkya tamchu tata to mong akün angkya a chixe kem ang fakya kaxtombu changle.

²⁴Zang kaxtombu kax ma laxle tüikyabu Zang füi notom ma ngole ilaxle Zang chix füi notom ma ngole. Zange kem ang fakya chasa makhange chix kem füi notom ma ngokya keme awan ang kople.